Muganuzi 5 - Luganuzi Luswanu Kuli Wanhu Wose 2002

Wulece kwihuwiza musunho

¹ Ale wiyilanjililaje, wulece kwinjila caka mu Nyumba yo Mulungu. Yowa ciba kuli'gwe hono winjile mu Nyumba yo Mulungu ho wuhulicize viswanu no kwiyijiza, si nha kulavya cilavywa nha vyono wanozaga wanhu walele, wanhu wono si wamanyile kuzitemanula ziswanu ne zimbi.

² Kanyhi weze kwamula kwihwesa lono wukali si nalonga cinji, hamba wulece kuwa wuli mupelu ku wihuwiza co cose kuli Mulungu, hambi Mulungu nha yali ku wulanga nagwe wuli mono'nze. Holeka wulece kulonga nghani nyinji nha vyono yikunojeye.

³ Hambi nha munghango ye mahwele gako, vyo nhavivyo vyo kolota ne zindoto zimbi, na vyo yinha kanyhi, munghango ya mu wulonji wako we zinghani zi nyinji, yikuwa kupelu ku wulonga mumo ne zinghani zo wulele.

⁴ Holeka hono wihuwize kuli Mulungu, ale, wuwufisilizaje mbela wihuwizo wako. Hambi mwene Mulungu nha si kendezwaga ne wanhu walele. Holeka yikunojeye wufisilize cono wihuwize.

⁵ Hambi nha yowa ciba kuli'gwe hono wulece kwihuwiza cinji, si nha kwihuwiza, hamba kufisiliza yaye wihuwizo wako.

⁶ Kanyhi wulece kuzileceleza zinghani zako zikutegule mu wusutye, hanyuma kanyhi wuwe kumulonjela u mwitumami wo Mulungu wukutya, “Wayiko, si nozize ne nyono yaye.” Alu ho socici wukusaka kumunoza Mulungu yakukolelwe likuwo? Hamba socici wumunoze Mulungu yayihodanje milimo yako?

⁷ Ninga wumanye vyono, mu wulota ndoto nyinji, ayo si nghani yaye. Langa mu wulonga nghani nyinji, amo langa mo wuli wajilile. Ninga nghani mbaha, wumogope Mulungu wako.

Mikalile ya mono'nze yo nghani ya bwete du

⁸ Na kanyhi wulece kwizina, hono wuwone mu yisi, wanhu waciwa wakwiwonelwa, hamba si wakunozezwa ling'ani ne walongola we yisi, kuli zono zinojeye watendelwe. Ninga wumanye vyono, munhu wo wose we lilumbo liwaha mu yisi, mono yakuwewonela i wasocele, yuyo nayo yali hasi yo muwaha yunji, na muli wawo wose vyono wejete, ho yuli muwaha yunji kanyhi mono yawacizize wene.

⁹ Ninga hamba nhavivyo, yowa ciba hono mutemi yepiganzize mu mulimo wo kulima, hambi nha co cambuzi ce wanyawusi wose.

¹⁰ Kanyhi wumanye vyono, mono yendile mapesa, yuyo hamba si kokwigushwa na mapesa yaye hamba yatye, hambi yiyo nayo, nha nghani ya bwete du.

¹¹ Na munghango yo wonjelezece we sawo, ale, yo nhavivyo na wanya kulya nawo, vyo wonjelezekaga, nayo munya sawo, wukwihwesa yakuwa kukwizwa na cici, mu sawo yiyo? Mwene langa mulimo wakwe kuyilanga du sawo yakwe.

¹² Mbeka nghukulonjela vyono, zinhongo zo mwituma mulimo, hamba yalye yegute, hamba yekale si yegute, ninga ku cilo kagonaga nhongo swanu muno. Ninga mugoli, ayo kekalaga yehweleye du nhondo zose, hambi winjipe we sawo yakwe nha wumugazaga du cilo cose.

¹³ Kanyhi nakondya kuyiwona nghani yinji 'mbi muno muno mono'nze, yono munhu keyiwicilaga, sawo yono hanyuma yayo, hamba si yomutaza cinji co cose.

¹⁴ Na hanji zimbali zijelaga, nayo kawa kuyajiliza sawo yiyilya yose, hamba kusigalilwa na cinhu cinji, cono na lunji, yali yamupele hamba mwanagwe.

¹⁵ Na vyo yinha, hambi munhu nha vyono yaza mononze yali cipwi yasina cinji co cose, mu wulawa mu'nda yo nyina, ale, vyo nhavivyo vyo kolowuya kanyhi yali cipwi kuko kono yalawilila. Hamba si kosuma kusoleleza na cinji co cose ca mu nhuguti yakwe.

¹⁶ Nayo nghani yiyi yo 'mbi du muno muno. Ati du kowuya nha vyono yaza. Na mbeka yegazaga du na nghani ya bwete.

¹⁷ Nayo ho yakekala mu citi no wukalale, na mu wugazice, hamonga na mu matamwa ne likuwo mu mikalile yakwe yose ya mono'nze.

¹⁸ Alu azi ane zo nakondya kuziwona, vyono kumbe, nghani swanu yono yomukwila munhu yoyi, kulya, kung'wa hamonga no kusangalalila mana gono yetujiye mu nhuguti yakwe mu milimo yono yakwituma bahano hono'nze, mu vilo vivyo vicefu du vya mu wikale wakwe, vyono Mulungu yamupeye, hambi nha vyo yawicilwa no Mulungu.

¹⁹ Holeka hono yawe Mulungu yamupeye munhu wugoli ne sawo, kanyhi yawe yamupelile ne cilejeho co kuvitumamila no kuvisangalalila vivyo, ale, yimunojeye munhu yuyo yalumbe, kanyhi yavimotaje vivyo vyono yetujiye mu nhuguti yakwe mweneco. Hambi avyo nha cipegwa du cilawa kuli Mulungu.

²⁰ Na vyono Mulungu yo yamukomboye yawe no wusangalale, holeka munhu si kosuma kuwa na mahwele mu mikalile yakwe yiyi ye vilo vicefu.