Muganuzi 4 - Luganuzi Luswanu Kuli Wanhu Wose 2002

¹ Hanyuma nghawona wiwonelwe wose wono wukwitumwa kono'nze. Ne wanhu wono wakwiwonelwa, wakulila mahozi, nawo wasina hamba yunji mono yakuwatuza, wasina munhu hamba yumonga mono kowataza, vyono wono wakuwewonela nha wali vilungo wawacizize wene.

² Holeka nghawa kuwawonela wivu i wafu wono wakondya kubita i hanhu hono si walawuya akuno kanyhi, hambi wene nha wali ciba si nha wono wakali womi.

³ Ninga awalya wono wakali nalelwa no kuziwona zimbi zose zono zikwitumwa mono'nze, wawo nawo wali ciba si nha wono wafwa, hamba wono wakali womi.

⁴ Kanyhi ngheyijiza vyono kumbe wuhidimbazi wose wo munhu, hamonga no wunghula wakwe wose wa mu witume wakwe, vilawililaga mu wiwonela wivu munhu na muyagwe. Ninga yiyo nayo yo nghani ya bwete du, hambi nha yinha wikataze we bwete du.

⁵ Kanyhi yo nghani ya wulele du, yo munhu kwikala hamba si wukwituma cinji, hanyuma kuwa kufwa ne nzala.

⁶ Co ciba wuwe na cinhu cidodo du, akuno wina no mulamu mu nhumbula, si nha kwigaza na nghani nyinji, hambi nha yinha wikataze we bwete du.

⁷ Kanyhi nghawona nghani yinji mono'nze yono yili bwete du.

⁸ Namuwona munhu yunji mono yasina mwana hamba nduguye, hamba nhavivyo, mwene si kalekaga kwituma milimo, kanyhi mwene hamba si yakuwa kuca ne sawo yakwe, hamba si ketuzaga akuno yakwiwuza yakutya, “Ale mwene, nghumwitumamila nani mwene mono yakunyambuza nghwikapisa sunga ndece kusangalala mu ziswanu?” Ayo mbeka yo nghani ya bwete du kanyhi yo nzila'mbi ye nyikala.

⁹ Kanyhi yili ciba hono muwe wejete, si nha kuwa wuli wene. Hambi i wejete nha wotuga cihumbilizwa ca mu mulimo wawo.

¹⁰ Na hono yunji yagwe, ale, yuyo muyagwe komwinula. Ninga woyi he kuli mono yali wene kolo yeza kugwa! Hambi yuyo nha kowa yasina munhu mono komwinula!

¹¹ Vyo nhavivyo kanyhi, hono wejete wagone hamonga, wosuma kwipela civuce, ninga munhu hono yawe yali wene, alu ho kosuma nhawule kwipela civuce yali wene?

¹² Na kanyhi, munhu hono yawe yali wene, nha kusumwa no mulugu, ninga hono wawe wanhu wejete, womwimila mulugu no kumusuma. Kanyhi wumanye vyono, hono milejehe midatu yibotelezwe hamonga, si kupelu yaye kuyidumula lwa kamonga.

¹³ Yali ciba muzelelo muciwa we mahala, yuyo yamucizize mutemi mukombi kanyhi mulele, mono si yendile kubocela mafundo maswanu.

¹⁴ Ku soko kuli mwene hamba yawe yali yalawiliye mu jela, nalu yatema, hamba yawe yali yaleleywe mu wuciwa, nalu yawa mutemi, ayo si nghani yaye.

¹⁵ Nane nghehwesa kuli ze wanhu wose wono wekaye kono'nze, nghamanya vyono muli wene, moyuli muzelelo mono kosuma kutema hanhu ho mutemi mukombi.

¹⁶ Liwalo lye wanhu lyali lisina mudumo, ninga mwene yakawatema wose. Ninga hamba nhavivyo, awalya wono wakulelwa, si wosuma kumwenda yaye. Ninga mbeka yiyo nayo, yo nghani ya bwete du, kanyhi wo wigaze we bwete du, wono wusina hamba cambuzi co cose.