Muganuzi 3 - Luganuzi Luswanu Kuli Wanhu Wose 2002

Mulungu yavipanjiye vyose, cinhu na cipango cayo

¹ Nghani zose zono zikwijela mono'nze, Mulungu yazipanjiye vipango vyayo.

² Mulungu yapanjile cipango co kulelwa ne cipango co kufwa, cipango co kuhadika, ne cipango co kududula,

³ cipango co kuwulaga, ne cipango co kuponya, cipango co kumwagula, ne cipango co kuzenga,

⁴ cipango co kulila, ne cipango co kuseka, cipango co kukalala, ne cipango co kuvina,

⁵ cipango co kwiyagaza mabwe, ne cipango co kugakongholeza, cipango co kwikumbatila, ne cipango co kuleka kwikumbatila,

⁶ cipango co kulondola, ne cipango co kwajiliza, cipango co kukamisa, ne cipango co kutaga,

⁷ cipango co kudemula, ne cipango co kuhona, cipango co kunyamala, ne cipango co kulonga,

⁸ cipango co kwenda, ne cipango co kusula, cipango co wulugu, ne cipango co mulamu.

⁹ Alu munhu kamotaga cici ca mu wihidimbaze wakwe?

¹⁰ Ane nawuwona vyono mulimo mukamu muno, wono Mulungu yamupela munhu.

¹¹ Hambi Mulungu nha yavinoza vyose viwe viswanu, cinhu ne cipango cayo. Mulungu yamupelile munhu wuhile wo kumanyila za ku mwande, ninga si yamupela wuwe wo kusuma kumanya i metumo gose go Mulungu.

¹² Nane manyile vyono ku lubavu lo munhu, koyili nghani monga du yono yomukwila, nha cinji, kusangalala, no kwituma ziswanu mu vilo vyose vyo wikale wakwe.

¹³ Ase wose, yicinojeye cilye no kung'wa, cisangalalile ziswanu ze milimo yetu. Hambi aci nha cipegwa co Mulungu.

¹⁴ Nane manyile vyono nghani yo yose yono Mulungu kayinozaga yikalaga cibitilila. No munhu si kosumila lukulu kuyonjeleza cinji hamba kuyicepula cinji yaye, hambi Mulungu nha yazinoza zose ziwe nha vyono zinha, i wanhu ho wamogope mwene.

¹⁵ Naco cono cikwijela kwi zuwali, nha cali cili baho du ku wulawa katali, na cono cokwijela hanyuma, nha cali cili baho du na katali. Nayo Mulungu kanozaga cinhu cijele mu vidaha hayo hayo, ninga cene cinhu co ci cilya du.

U wu wula wiling'ano mono'nze

¹⁶ Hamonga na zizo, nakondya kucimanya cinhu cinji kanyhi mononze, vyono i hanhu hono wulanjiliye vyono kowona i mbeka ne ling'ani, kumbe 'lu wavu wo wutemile.

¹⁷ Nane mu nhumbula yangu nghawa kutya, “Ale hodu, si nghani yaye! Hambi Mulungu nha yo kowaling'aniza we ling'ani sunga ne wabi nha vivyo, hambi nha yakondya kuwikaniza cipango cono cinojeye kuli vinhu vyose, na kuli vyose vyono vikwijela.”

¹⁸ Holeka nghawa kutya mu nhumbula yangu, “Mulungu yo kawajelaga wanhu wose, ho yawalajile nha vyono wene, wehwanile malimu du.”

¹⁹ Hambi u mudumo wo munhu no mudumo we malimu, nha wo wumonga du. Hambi munhu nha kafwizaga nha vyono lilimu nalyo lifwizaga. Na vyose vyehelaga nhavivyo. Holeka munhu si yalicizize lilimu cinji co cose yaye. Vyose kuli munhu na kwi'limu, yo nghani ya bwete du.

²⁰ Wose wafwizaga no kuwuya kono walawa. Wose walawa mu manghundi, na wose wowuya kanyhi mu manghundi.

²¹ Hambi nani mono yamanyile vyono mbeka umuhe wo munhu wubitaga kucanyha, no muhe we lilimu wudodomelaga kusi yo muhangha?

²² Baho ho namanyila vyono, hasina nghani yono swanu kuciza yono munhu kosuma kuyinoza, langa hono si kusangalalila ziswanu ze milimo yakwe. Nayo Mulungu vyo yamuwiciye munhu nhavivyo. Alu nani 'mbi mono kosuma kumumanyiza munhu, zono zomutuga kumwande kolo yafwa?