Muganuzi 2 - Luganuzi Luswanu Kuli Wanhu Wose 2002

¹ Holeka nghehwesa mu nhumbula yangu nghatya, “Leka ta niyinjize muli ze cinyemo-nyemo, ho sume kwisangalaza.” Ninga hamba nhavivyo, nghamanya vyono yiyo nayo, yo nghani ya bwete du.

² Baho ho namanyila vyono, luseko nha lukwale du, na vyono nazo ze cinyemo-nyemo, kumbe zisina cambuzi co cose.

³ Nane naza kuwa nehwesa muno, hodu nghalamula nisangalaze mahala gangu ne divayi, ninga akuno ho nghali nghudindimizwa no wuhile wangu wo wutuga mahala. Kanyhi nghalamula vyono ciba cityatye ne wanhu walele, ho sume kuwona hono yiyo yo nzila swanu ye wanhu, ya mu mikalile yawo micefu ya baha hono'nze.

⁴ Netuma metumo mawaha, hambi nha nezenjela makaya, kanyhi nghelimila ne migunda ya zabibu.

⁵ Nghenozeza sunga ne busitani, hamonga ne viwanza, nghahadika mumo mibici ye mikalo ye mawala gose.

⁶ Nghahimba sunga ne malamba ge malenga, so wumwajilila malenga mibici yiyo.

⁷ Nghegulila sunga ne wawanda we cilume na we cicekulu, na wanji wakalelelwa mu kaya yangu. Nali nina sawo nyinji muno muno, matewa ge zing'ombe sunga ne zingholo nyinji muno, kuciza munhu wo wose mono yanongolela kwikala no kutema mu Yelusalemi.

⁸ Nane nghewutila mapesa menji muno, hamonga na zahabu nyinji, mu wulawa mu viwutwa vyo wutemi, vya mu zisi zono nali nizitemile. Sunga walume ne wacekulu, wose wakasangalaza so nyimbo zawo, nane nghetujila wacekulu wose wajitulwa waswanu, wono mulume wo wose, yali yawasulumile, wono nene no mweneco nasulumila kuwa nawo.

⁹ Nghawa mutambule muno muno kuciza wose wono wanongolela kwikala mu Yelusalemi, sunga ne mahala gangu nago, gakanojela muno muno.

¹⁰ Na co cose cono nacisaka, nacituga musunho muno. Hamba si neyimila muli ze nyemo yo yose yilya. Nane nghavisangalalila vyose vyono netuma. Nayo yiyo, yikawa wo musahala wangu so mulimo wono netuma.

¹¹ Hanyuma nghawa kwamula kwihwesa muli zose zono nali netuma, na vyono nazituma ko wuhidimbazi wuwaha muno muno. Nghamanya vyono zose zizo kumbe zali nghani ya bwete, kotya wisumanize ne mbeho, musina cambuzi co cose mono'nze.

¹² Hobaho nghawa kwihwesa nhunizo yo kuwa munhu we mahala, hamba kuwa wuli munhu mono si yaceleleye, hamba kuwa wuli mulele. Hambi mutemi nha kosuma kunoza du zono yanozaga mutemi mono yamulongolela.

¹³ Baho nghamanya vyono, kumbe kuwa na mahala, kuswanu si nho wulele, nha vyono winha wuzelu wuswanu wucizize citi.

¹⁴ Hambi munhu we mahala nha yena meso, nayo yamanyile na kono yakubita, ninga munhu mulele, kajendelaga mu wutitu du, hamba kumanya na kono yakubita. Ninga hamba nhavivyo kanyhi, nghamanya vyono kumbe, u munhu we mahala, hamonga no munhu mulele, wose mudumo wawo wo wumonga du.

¹⁵ Hobaho nghehwesa nghatya, “Kumbe, zono zomwagana u munhu mulele, zo zizo du zono zonyagana na nene no mweneco. Alu co ca hayi 'mbi, co kuwa ne mahala gose gagano?” Ale, nghehwesa kanyhi ngheyipitula nili wene nghatya, “Ayi nayo mbeka, yo nghani ya bwete du.”

¹⁶ Hambi mbeka nha hasina munhu wo wose mono kamukumbucilaga we mahala, hamba mono kamukumbucilaga mulele. Hambi mu vilo vyono vikuza, wose nha wosemelwa lukulu. Hambi u munhu we mahala nha kafwizaga, sunga na ayulya munhu mulele, nayo kafwizaga!

¹⁷ Baho, hodu nghawa kuyisula i mikalile ya mono'nze, vyono zose zono zikwitumwa mono'nze, mbeka zamhela magaziko mawaha. Nazo zose zo nghani za bwete du, kumbe wo wigaze we bwete du, wono wusina cambuzi co cose.

¹⁸ Nane mbeka nghayisula ne milimo yangu yose yono netumaga baha mono'nze, hambi nha namanya vyono, nane, yowa yinojeye nimulecele munhu mono konhyatya mu wutemi.

¹⁹ Hambi nani kanyhi, mono komanya vyono yuyo mono kotema kowa munhu we mahala, hamba kowa mulele? Ninga hamba yiwe nhavivyo, mwene kotema muli zose zono netuma mu mahala gangu baha mono'nze. Ninga hamba yiwe nhavivyo, azo zose nha nghani ya bwete du.

²⁰ Ale, naza kwihwesa kanyhi muli zose zono netuma mononze, mbeka nghawa kudobanya du.

²¹ Hambi munhu, nha ketumaga milimo, yakwitumila mahala, ko wizuce hamonga no wunghula wakwe wose, ninga kali kenji kamulecelaga munhu yunji mono yakutyatya, yuyo yo kawa kuzimota ze mana go mulimo, wono si yawulavizya nhuguti yaye. Yiyo nayo, mbeka yo nghani ya bwete du, kanyhi yo nghani yono 'mbi muno muno.

²² Mwene munhu kamotaga ci cici ca mu wuhidimbazi wo wipiganze wakwe wose mono'nze, hamonga ne mawine, no mukatalo vyono yatuga?

²³ Hambi mikalile yakwe yose, nha yimemile magayo du, sunga no witume wakwe wukuwa nha nghani ya bwete, hambi nha sunga na mu cilo mose, mahala gakwe si gatulaga yaye! Zizo nazo go muyangu, yo nghani ya bwete du.

²⁴ Gwe, hasina yinji swanu yono yimukwiliye munhu, langa hono si kulya no kung'wa, hamonga no kuwusangalalila mulimo wakwe. Yiyi nayo nghuwona vyono yilawaga kuli Mulungu,

²⁵ vyono hono wulece kupegwa no Mulungu, si kosuma kuwa na ndigwa hamba si kosuma kusangalala yaye.

²⁶ Hambi Mulungu nha kamupelaga mahala munhu mono yamwendile mweneco, hamonga no wizuce ne nyemo. Ninga u munhu mubi, Mulungu kamupelaga mulimo wo kududula no kulundilila du, hanyuma Mulungu kawa kumupela munhu yunji mono yakumwendeza. Ninga 'gwe, zizo zose nazo, nha nghani ya bwete du, kanyhi wo wigaze we bwete du, wono wusina cambuzi co cose.