Muganuzi 12 - Luganuzi Luswanu Kuli Wanhu Wose 2002

¹ Wumukumbucilaje Muwumbi wako mu vilo vyo wuzelelo wako, lono i vilo vibi vikali si vinaza yaye, hamba lono yikali si yinaza yono kolotya nhavi, “Aa, vinhu avi vyose hamba si vikunyendeza kanyhi yaye.”

² Holeka wuzitumaje zizino lono lizuwa likali natukuwazwa, hamonga no wuzelu, no mwezi, sunga ne zinyelezi zose, na lono mavunde gakali sinagubika kanyhi, lono mvula yikali yawuka.

³ Mwi'pango lono i miwoko yako yono yakukamisaga, yolocicima, ne migulu yako yono yili vilungo, nayo yolowa yisina vilungo. Ne meno gako, nago golowa gasina vilungo vyo kutafunyila ndigwa yako, ne meso gako nago golowa si gakuwona viswanu.

⁴ Nago i makutu gako si gakuhulika i mazozo ga mu zinzila. Hamba si kolohulika bwete ne lizozo lye masine yo kusaga, hamba mulilo we masumbi yaye, hambe mazozo ge zindeje, si golokusinhusa yaye mu zinhongo.

⁵ Mwi'pango lono wanhu wowa wena woga, no wogofywe wotagalila mu zinzila zose. Sunga no wujendanje wose ako na ako wowa wukamu muno muno. Mwi'pango lono kowa wakombipa, watuga 'mvwi zose, lono kolowa kweza kukamu muno kuli'gwe kujenda, lono no wusulumizi wako wose wowa wakondya kuwuka. Wumanye nha vyono cikubita ku wikalo we cibitilila, na holowa cililo ciwaha mu zinzila.

⁶ Baho langa, u luputi lwe fweza ho lolodumucila, ne tala ye zahabu nayo, baho ho yilatulicilaa. Ne liguludumu nalyo lyo kukwejela malenga mwi'sima lyolobeneka, ne njilo ye malenga yilatulika.

⁷ Ale, mwi'pango lilyo, nagwe go munhu mono wuli manghundi, muwili wako nagwe, ho wulawuyila mu manghundi kono walawilila, no muhe wako nawo, womuwuyila Mulungu mono yacipela.

⁸ Yo nghani ya bwete du, yo nghani ya bwete du, ane nghukulonjela mbeka no Muganuzi! Vinhu vyose vyono wukuviwona, mbeka yo nghani ya bwete du.

Ze ndumilizo

⁹ Nayo Muganuzi ku soko ye mahala gakwe, yakajendelela kuwejiza wanhu zo wumanye wakwe. Yakazihwesa muno mu nhumbula yakwe, yakazilondola-londola no kuyimanya imbeka yazo. Hanyuma yakawa kuziloloseza mu wumanye wakwe.

¹⁰ Nayo Muganuzi yakehidimbaza muno yatuje zinghani zono zikwendeza, nayo yakawa kuzandika mu nghango yo wunghula wakwe, zinghani zose zono zili mbeka.

¹¹ Nazo zinghani ze wanhu we mahala, zihwanile zinghome zono zina visonje, zono wadimi wazitumamilaga kuzitonga zingholo. Ne zimbazi zono zikonghoywe no kuwikwa hamonga, zizo zikalaga zikamile kotya zimambo zono nghomanhilwe hasi. Hambi nha zalawa kuli Mulungu u mudimi yumonga wa sese wose.

¹² Ninga hamonga na zizo, 'gwe mwanangu, nghukunena wilanjililaje! Weze kumanya vyono u wandici we vitabu, wusina ndumo, no wusoma muno nawo, wuletaga wukatale wuwaha wo muwili.

¹³ Hamonga na zizo zose, ho yili nghani monga kanyhi ye ndumilizo, nayo yoyi, “Mogopaje Mulungu, kanyhi wibate ne malajilizo gakwe.” Yiyi yo nghani mbaha muno, yo yaleka munhu yakawumbwa ho yayitume.

¹⁴ Hambi Mulungu nha koloyiling'aniza milimo yetu yose, hamonga ne metumo getu gose, gono cetumilaga mu cinyele, hono gawe maswanu hamba gawe mabi.