Mika 7 - Luganuzi Luswanu Kuli Wanhu Wose 2002

U wulalame wo muwizi

¹ Woyi hee! Hambi ane nha neza nha munhu mono yadabuce, mono yagana musina mikalo yono yisigazwe mu mibici, hamba zabibu mu manhambi ge mizabibu. Hambi zabibu zose hamonga ne mikalo yo mukuyu, nha vyakondya kuhepwa.

² Hasina munhu mwihuwilwa mono yasigaye mu'si, hamba munhu mono yali cihuliko hali Muwaha Mulungu. Munhu wo wose kalondolaga cilejeho ho yetume zo wuwulaji. Munhu wo wose kamupelembaga nduguye ho yamugwize.

³ Wose wanghula muno ku wituma zo wavu. Wanhu wawaha hamonga ne mahakimu, wakulomba mafupo. Nayo u munhu muwaha yakuwalonjela zono yakuhila mu nhumbula yakwe nawo wawa kwilumbaniza nayo.

⁴ Sunga no munhu muswanu muli wene, yakuwa yasina cambuzi nhe maselegwa. Ninga lizuwa lyakondya kuza, lyono Mulungu kowalipiciza wanhu, nha vyono yawasugula mu nzila ye walindilizi wawo ne wawizi wakwe, ku wulawa katali. Alu weza wali mu mahwele.

⁵ Wulece kumwihuwila mwikalani muyago, hamba kumwitumbila mono mwiyendile nayo. Wilanjililaje muli zono wukulonga, hamba yiwe kuli mugolece wako.

⁶ Na mu vilo vivyo, i wana wolowa kuwatendela wasogo zawo nha wanhu wono wasina mahala, nawo i wana we cicekulu, wakwiwanganila ne wanyina zawo. Ne wahinza wono watoligwe, nawo wakugombana ne wakwe zawo we cicekulu. Hambi i walugu wo munhu, nha wo wawo wa mu kaya yakwe mweneco.

⁷ Ninga 'ne, nomulanjilila Muwaha Mulungu, nomulindila Mulungu, mono komhonya 'ne. Nayo Mulungu wangu kohulika 'ne.

Witumbilo no wulombe we wanhu

⁸ Ne walugu wetu wowa wasina soko yo kucisimanga. Heya, hamba ciwe cagwa, ninga cokwinuka kanyhi. Alu cili mu wutitu, ninga Muwaha Mulungu kociletela kanyhi wuzelu.

⁹ Ase cetuma zo wubi hali Muwaha Mulungu, holeka aluno yicinojeye cilikangalile kwa cipango likuwo lyakwe. Ninga ku ndumilizo kocitaza no kucipela ling'ani kuli ze masutya gono cali citumile. Mwene kocilavya, kociwika ku wuzelu, holeka cowa cili womi, nase cimuwone na vyono yakuciponya.

¹⁰ Nawo walugu wetu, woloziwona zizi wakolwe cevu. Ne walugu wanji wolocilonga wawe kutya, “Alu yali hayi u Muwaha Mulungu, u Mulungu wenyu?” Nase colowawona wakondya kusumwa, wakukanyanjilwa hasi nhe madabaga, mu zinzila za mwi'kaya.

¹¹ Nye nyo wanhu mono mwikaye mu Yelusalemi, I cipango co kuzenga kanyhi majinji ge likaya cikuza. Na mu cipango cico i mipaka ye yisi yenyu yologazimhywa.

¹² Ne wanhu wenyu wolomuwuyilenyi ku wulawa mhelo zose, wolokuza ku wulawa kucilima ku Ashuli, na ku wulawa kutakama ku Misili, ku wulawa mu mipaka ye likolongo lya Efulata, ku wulawa kwi'lenga sunga mu matunda go kutali.

¹³ Ninga yisi yolowa nyika, ku soko yo wubi we wanhu wono wekaye mumo.

U wulombe

¹⁴ Gwe Muwaha Mulungu, weze mudimi kuli wanhu wako, iwanhu wono wawahagula. Hamba wawe wekaye kutali mwi'bago. Ninga yisi yose yono yiwapilime yina moso muno. Walekaje wabite wakaliswe ku Bashani na ku Gileyadi nha vyono wanoza mu vilo vye katali.

¹⁵ Gwe go Muwaha Mulungu, witumaje mapoto ku soko yetu, nha vyono wetuma mu vilo vyono waciwusiza ku yisi ya Misili.

¹⁶ Ne makungugo goziwona zizi, gawe kogopa no kuviwonela soni vilungo vyawo, na ku so woga, hamba si wolonga cinji kanyhi, langa wodinda makutu gawo.

¹⁷ Nawo wolowa kutambala hasi nha nzoka. Wokuza ku wulawa mu makaya gawo ge magomawakali, akuno wakucicima wena no woga. Wowuya kuli Muwaha Mulungu u Mulungu wetu, akuno wena no woga kuli mwene.

¹⁸ Gwe Muwaha Mulungu, hasina mulungu yunji mono yehwanile gwegwe, hambi 'gwe nha kuwanenelaga u wubi wawo wanhu wako wono wasigala, hamba si kwikalaga ne likuwo cibitilila. Ninga kuwezaga ne nyemo, ho wulajile lusungu lwako kuli'se.

¹⁹ Kowa no lusungu kanyhi kuli'se nhe vilo vyono vyapuluta. Kanyhi kowusambanjila wubi wetu hasi ye magulu gako, no kuwutaga wubi wetu ku visolo vye lilenga!

²⁰ Agwe kolajila wihuwilwa wako no lusungu lwako kuli wanhu wako, mu lulelo lwa Abulahamu na Yakobo, nha vyono wawehuwiziza i walezi wetu ku wulawa mu vilo vye katali.