Mika 6 - Luganuzi Luswanu Kuli Wanhu Wose 2002

Wulalame wo muwizi

¹ Ale muhulicize calo co Muwaha Mulungu kuli Isilayeli. Ale winuce 'gwe Muwaha Mulungu wulete calo cako. Matunda ne vitunda vihulice zizo zono wukulonga.

² Anye nyo matunda, nanye nyo misinji ye cibitilila ye yinze, muhulicize calo co Muwaha Mulungu kuli'nye, Muwaha Mulungu yena calo kuli wanhu wakwe, mwene yakubita kuyileta nghani yo kwilolosa kuli Isilayeli.

³ Muwaha Mulungu yakulonga yakutya, anye nyo wanhu wangu, ane namutendelenyi ci? Hamba nawa nili mutegulo kuli'nye so nghani ci? Ale ta mumhitulaje.

⁴ Ane nghamusolenyi no kumuwusenyi ku wulawa ku yisi ya Misili, no kumuponyenyi ku wulawa mu wuwanda. Nghawatuma Musa, na Haluni, na Milyamu, ho wamutonjenyi ku wulawa kuko.

⁵ Anye nyo wanhu wangu, mukumbucile zizo zono Balaki u mutemi wa Mowabu, yali yewikanize ho yamutendelenyi 'nye, na vyono Balamu mwana wa Beyoli yamupitula. Kanyhi mukumbucile zono zejela, lono mwali muli mu nzila, ku wulawa ku nghambi ya Shitimu sunga ku Giligali. Holeka momanya zono nghamutendelenyi ho nimuponyenyi 'nye.

I liwuzo lye wanhu

⁶ Cinhuci cono nomutegulila Muwaha Mulungu, u Mulungu wa ku wulanga, lono nghuza kumuhemba? Hamba sole nzeku swanu yono yina mwaka monga, nimulavizye nha cilavywa cinyanywe hali mwene?

⁷ Muwaha Mulungu kokwendezwa hono nimutegulile matewa na matewa ge zingholo, hamba makolongo elufu na elufu ge mafuta ge mizeyituni, yono si yidumaga? Hamba nimulavizye mwanangu mulongozi kulelwa, ho ndipile wubi wangu?

Lipitulo lyo muwizi

⁸ Aa ng'o, hambi Muwaha Mulungu nha yacilonjela ziswanu zono zinojeye hali mwene, zono yakuhila kuli'se, nha zozi, Citume zono zili ling'ani, cilajile wendo kuli mwene, no kujenda ko winenenyhezi hamonga no Muwaha Mulungu wetu.

⁹ Hambi nha go mahala, mu wumogopa Muwaha Mulungu. Mwene yakucema mwi'kaya yakutya, “Muhulicize anye nyo wanhu wa Yuda, mono mwikongholeye mwi'kaya!

¹⁰ Mu zikaya ze wanhu wabi, movili viwutwa vyono wavitujiye mu zinzila zimbi. Hamby nha wakwitumamila vipimo vyo wukonji vyono ane si nivyendile.

¹¹ Alu nowanenela nhawule wanhu wono wakwitumamila vipimo ne mizani yo wukonji?

¹² Wanhu wako i wagoli, wakuwegalila waciwa, na muli nyenye, wose muli walambi.

¹³ Holeka nane nakondya kwiwikaniza so wongomezwe wenyu no wuhodangwe wenyu ku soko yo wubi wenyu.

¹⁴ Nanye molya, ninga simokwiguta yaye, langa mokwikala vyo mudabuce du. Na mu luhamo lwenyu, si mosuma kusola cinji citelevu, na cono mocisoleleza citelevu, ane nocihodanga mu wulugu.

¹⁵ Molohadika zimbeyu, ninga simolodudula cinji yaye. Molominya mafuta ge mizeyituni, ninga si mologetumamila yaye. Kanyhi molonoza ne divayi, ninga hamba si moloying'wa ng'o.

¹⁶ Na zizi zolomuzizenyi ku soko vyono mwagatyatya metumo mabi go mutemi Omuli, na go mwanagwe mutemi Ahabu. Vyono mukujendela mu zinghani zawo, holeka nane nomutegulenyi sunga ko ku wongomezwe, ne wanhu wose womubedegalenyi, no kumwitumilenyi vyono wakuhila.”