Mika 4 - Luganuzi Luswanu Kuli Wanhu Wose 2002

Muwaha Mulungu kowatema wanhu wose ko mulamu

¹ Mu vilo vyono vikuza, litunda lyono Nyumba yo Mulungu yizenjigwe, lyolokwinulwa muno hali mayagwe gose, ne cizuli calyo colowa cipulute matunda gose. Ne wanhu we makungugo gose, wololibitila.

² Ne wanhu wayo wolotya, “Alenyi cibite kwi'tunda lyo Muwaha Mulungu, ku Nyumba yo Mulungu wa Isilayeli mwene yo kocifunda ase zono yakuhila cizitume. Nase cojendela mu zinzila zono mwene yazihagula. Hambi i mejizo go Muwaha Mulungu, nha galawaga ku Yelusalemi, kanyhi yakulonga ne wanhu wakwe ku wulawa ku Sayuni.”

³ Nayo kologalamula makungugo, muli makungugo ge vilungo, gono gali behi na gono gali kutali. Nawo wolotyana mimaje yawo yiwe masili, ne migoha yawo yiwe hengo zo kutemanjila. Ne makungugo, si golokwihoma yaye, hamba kwiwikaniza hamba kwiyijiza kanyhi zo wulugu.

⁴ No munhu wo wose kolokwikala yapolile, yena ne nyemo mu migunda yakwe ye mizabibu ne mikuyu, hasina munhu yunji mono kolomogofya. Muwaha Mulungu we Mihanga yo yehuwize zizi.

⁵ Likungugo ne kungugo lihembaga no kogopa u mulungu walyo, ninga mu vilo vivyo, colomuhemba no kumogopa Muwaha Mulungu wetu cibitilila na cibitilila.

Isilayeli wolowuya ku wulawa ku wuhamywe

⁶ Muwaha Mulungu yakutya, “Ivilo vikuza, lono nolowakonghola hamonga wanhu wangu wono nawalipiciza, wakagazwa ku wuhamywe.

⁷ Wakawa wakusenzegula, kanyhi wali kutali no kwawo. Ninga hamba nhavivyo nowanozeza mwamulizo mupya wawo wono wasigala, nawo wowa likungugo yiwaha lye vilungo. Nane notema hali wene mwi'tunda lya Sayuni, ku wulawa mu vilo vivyo sunga cibitilila.”

⁸ Nagwe go Yelusalemi, i hanhu hono Mulungu yo mudimi, mono kawalanjililaga wanhu wakwe, kolowa kanyhi likaya yiwaha lyo wutemi wono wali wako.

⁹ Alu so cici wukulila kwe 'zi yiwaha? Hamba so cici wukuwona wusungu nho mucekulu mono yali mu nghunga yo lusawo? Ku soko vyono wusina mutemi, ne watazi wako wono wakutazaga zinghani, wose wakondya kufwa?

¹⁰ Muwone wusungu mwinyongole anye wanhu wa Yelusalemi, nho mucekulu mono yali mu lusawo, hambi aluno nha mowuka mwi'kaya, mubite mukekale mwi'hala. Kanyhi mowa munojeye mubite ku Babiloni, ninga kuko ko Muwaha Mulungu kolomuponyezyenyi ku wulawa kuli walugu wenyu.

¹¹ Hambi makungugo menji nha gekonghoye ho gamuhomenyi. Gakutya, “Yelusalemi yinojeye wuhodangwe! Nase coliwona likaya lili lyawa yitongo!”

¹² Ninga hamba nhavivyo, i makungugo gaga, sigamanyile zono Muwaha Mulungu yakwihwesa. Hamba si gakumanya vyono, mwene yagahangulize hamonga ho yagalipicize, nha vyono wawulundaga wuhemba mu cuga wawa kuwutowa.

¹³ Muwaha Mulungu yakutya, “Anye nyo wanhu wa Yelusalemi, ale, mubite mukawalipicize walugu wenyu, nane nomunozenyi muwe ne vilungo nhe nghambaku, yono yina mahembe ga cuma ne mabangho ga shaba. Nanye mogahoma makungugo menji no kugasumiza, ne sawo yawo yose yono wayituga kwe vilungo, ayo mondavizya nene, ane no Muwaha Mulungu we yinze yose.”