Mika 3 - Luganuzi Luswanu Kuli Wanhu Wose 2002

Mika yakuwahomelela i walongola wa Isilayeli wubi wawo

¹ Ale muhulicize, anye nyo walongola wa Isilayeli! Yinojeye kuli'nye muyimanye ling'ani,

² ninga 'lu 'nye muzisulile ziswanu, langa mwendile izimbi. Mukuyihinza nyhuli ye wanhu wangu akuno wali nyumi, no kuyitema nyama mu mafupa gawo.

³ Kanyhi mukuwalya nyama wanhu wangu, mukuyihinza nghuli yawo, no kugabenanga mafupa gawo, no kuwaguza wene, nha nyama nhelekwe mu nyungu.

⁴ Hambi icipango nha cikuza, cono anye nanye molomulilila Muwaha Mulungu, ninga mwene si kolomupitulenyi yaye, hamba si kolowuhuliciza no wulombe wenyu, ku soko 'nye mwetuma zimbi.

⁵ Wanhu wangu nha wakukongwa ne wawizi wo wulambi, wono wakuwehuwiziza vyono wokwikala wapolile, wawo wono wakuwalipa, na wono siwakwituma zizo, wakuwakajiziza wulugu. Ninga kuli wawizi wawa, u Muwaha Mulungu yakuwatya.

⁶ “Anye nyo wawizi, lizuwa lyenyu lili behi malika, nalyo lizuwa lyeza kumuswelenyi. Hambi nha mwawajiliza wanhu wangu, holeka hamba simowa no wugubulilwe wunji wo wose, hamba simosuma kuwila kanyhi cinji co cose.”

⁷ Na wawo wono wakuwila zono zikuza, wolokolwa cevu ku soko yo wuwizi wawo wo wulambi, nawo wose wolonyetywa, hambi Muwaha Mulungu nha si kolowapitula yaye.

⁸ Ninga ane, Muwaha Mulungu kamhela vilungo vyo muhe wakwe, hamonga no wusume, no wuling'anizi, kamhela 'ne vilungo, ho niwalonjele Isilayeli u wubi wawo vyono winha.

⁹ Ale muhulicizaje anye nyo watemi wa Isilayeli, na anye wose mono muyisulile ling'ani, no kuyipitulanya imbeka liwa yisutya.

¹⁰ Anye mono mukuzenga likaya lyo Mulungu Yelusalemi, mucanyha ye misinji yo wuwulaji no wuwula ling'ani.

¹¹ Nawo i walongola, wakulitema likaya kwe mafupo, nawo wakohani, wakuwejiza wanhu Wulajilize ho watuje musahala, nawo wawizi, wakulonga zo wugubulilwe wawo ho walipwe mapesa. Nawo wawa wose wakwiyitya ti, vyono Muwaha Mulungu yali hamonga nawo. Kanyhi wakutya, “Hasina zimbi zono zocagana, hambi Muwaha Mulungu nha yali hamonga nase.”

¹² Holeka ku soko yenyu, Sayuni yololimwa nha mugunda, nayo Yelusalemi, yolowa yilundo lya matongo, ne litunda lye Nyumba yo Mulungu, lyolowa mbago.