Maluko 12 - Luganuzi Luswanu Kuli Wanhu Wose 2002

I cihwanicizo co mugunda we Mizabibu ne walimi

¹ Yesu yakanza kulongana nawo mu cihwanicizo yakutya, “Munhu yunji yalima mugunda we mizabibu. Yakawusitila no mululu, na haciligati yayo, yakahimba likombo lyo kukobonjela divayi, yakazenga ne cilingo citali. Yakawukoza mugunda wuwo kuli walimi, u mwene yakatuluka muhinzo sunga ku yisi ya kutali.

² Na mu wupilo we mikalo, yakatuma mwitumami wakwe kuli wawalya iwalimi, ho yamuletele mikalo yo mugunda wakwe.

³ Ninga wawalya walimi wakamwibata, wakamutowanga, wakamuwinga yasina hamba cinji.

⁴ Yakatuma kanyhi mwitumami yunji, na yuyu nayo kanyhi, wakamutula mazeya mu mutwe, no kumutendela vibi.

⁵ Nayo yuyulya munya mugunda, yakatuma mwitumami yunji kanyhi, ninga iwalimi wawo wakamuwulaga. Na wanji, wenji wono watumwa, wanji wakatowangwa, na wanji wakawulagwa.

⁶ Nayo yakawa yakali yasigaliywe no munhu monga du, nayo yo mwanagwe mwendece. Na handumilizo, yakamutuma yuyo akuno yakutya, ‘Womogopa mwanangu.’

⁷ Ninga iwalimi wawo wakalongana weneco wose, wakutya, ‘Ayu yo muhazi, alenyi nye cimuwulaje, ho wuhazi wakwe wuwe wetu!’

⁸ Holeka wakamwibata, wakamuwulaga, no kumugumila kunze yo mugunda wuwulya we mizabibu.

⁹ “Ale lu, u munya mugunda ho kotendaci? Kokuza yawongomeze i walimi wawo, no kuwukoza mugunda wuwo we mizabibu kuli wanhu wanji.

¹⁰ Wulenyi, si mwasoma i Mandiko gaga gono gakutya, ‘Ilibwe lyono walilema iwazenji alu lyanozwa liwe lyo libwe liwaha lyo musinji,

¹¹ U Muwaha yoyayinozize inghani yiyi, nayo yo nghani yo wizine kuli'se.’ ”

¹² Iwakohani wawaha ne Wejizi wo Wulajilize ne wanyamhala, wakatanga vyono i cihwanicizo cico calongaga weneco. Holeka wakajela kumwibata, ninga wakalyogopa i lipuga lye wanhu. Holeka wakamuleka wakawa kubita.

Kulipa kodi kuli Kayisali

¹³ Ale, Iwafalisayo wanji, hamonga ne watyatyi we cipuga ca Helode, watumwa ho wamugwizize Yesu mu wulonje wakwe.

¹⁴ Wakamubitila, wakamutya, “Mwijizi, nha cimanyile vyono agwe uli munhu we mbeka, mono kulongaga ze mbeka du, hamba sikucelelelaga munhu wo wose. Hamba lilumbo lya munhu, nha si cinji kuli'gwe, ninga kuwejizaga imbeka ye nzila yo Mulungu. Wule, viswanu kumulipa kodi Kayisali, hamba ng'o? Alu cilavye, hamba cilece kulavya?”

¹⁵ Ninga mwene Yesu yali yawumanyile u wukoci wawo, holeka yakawatya, “Alu so cici mukunjela? Mundajilaje ta silinje niyilanje.”

¹⁶ Nawo wakamulajila. Nayo yakawawuza, yakutya, “Hwani yiyi no lwandiko lulu vya nani?” Wakamutya, “Vya Kayisali.”

¹⁷ Yesu yakawatya, “Mumulavizye Kayisali vyakwe Kayisali, nayo Mulungu vyakwe Mulungu.” Wakamwizina muno.

I nghani yo wuzuce

¹⁸ Iwasadukayo wono watezaga kusina wuzuce, wakamuziza Yesu wakamuwuza, wakutya,

¹⁹ “Mwijizi, Musa yacilajiliza yakatya nhavi: ‘Hono munhu yafwe, yalece mugolece yasina mwana, yinojeye umwanakwawe yamuhale mugolece yuyo mufwile, ho yamulelele wana umuwahawe mono yafwa.’

²⁰ Ale, kwali na wanhu mupunghati walume, sogo yawo yumonga. Umulongozi yakatola, yakafwa yasina wana.

²¹ Na we kejete yakamutola yuyo mucekulu, nayo kanyhi yakafwa yasina wana, na we kadatu nayo nha vivyo.

²² Nawo wose vyono wali wali mupunghati, wakafwa wasina wana. Na hanyuma yayo, nayo yuyo umugolece mufwile yakafwa.

²³ Ale, mwi'zuwa kolo wanhu wakuzuka, u mucekulu yuyo kolowa mugolece wa nani? Hambi wose vyono wali wali mupunghati nha wali wamutolile.”

²⁴ Nayo Yesu yakawatya, “Anye nyo weneco musutizye muno, vyono si mugamanyile i Mandiko Gono Gelile hamba ivilungo vyo Mulungu.

²⁵ Hambi iwanhu kolo wakuzuka, nha siwolotola hamba kutolwa yaye, langa wolowa wehwanile ne wamalayika wa ku wulanga.

²⁶ Ninga ze wafu vyono wazukulagwa, Alo simunasoma citabu ca Musa mwifungu lyono likulonga ze cititika cono cakaga moto? U Mulungu yamulonjela Musa yakatya, ‘Ane yonene Mulungu wa Abulahamu, na Isaka na Yakobo.’

²⁷ Holeka u mwene yo si Mulungu we wafu langa we womi. Anye mukuwa kusutya muno muno.”

I lilajilizo liwaha

²⁸ Yunji wa muli wejizi wo Wulajilize yakaza, nayo yakawuhulika u wiwanganile wawo. Nayo yaza kumuwona Yesu vyono yawapitula viswanu, yakasejelela yakamuwuza yakutya, Ati, mu malajilizo gose, i lilajilizo lilongozi lyo lya hayi?

²⁹ Nayo Yesu yakamutya, “Ililongozi lyoli, ‘Hulicize ta Isilayeli! U Muwaha Mulungu wetu, mweneco du yo Muwaha.

³⁰ Nagwe wumwendaje Muwaha Mulungu wako kwe nhumbula yako yose, na ko mutima wako wose, na kwe mahala gako gose, na kwe vilungo vyako vyose.’

³¹ Na lye kejete lyo'li, ‘Wumwendaje muyago nha vyono wiyendile go mweneco. Hasina lilajilizo linji yiwaha lyono licizize gaga.’ ”

³² Ale, yuyulya umwijizi wo Wulajilize yakamutya, “Ale viswanu Mwijizi! Kulonga mbeka vyono u Mulungu yumonga du, hamba hasina yunji langa mwene du.

³³ Holeka yimunojeye munhu yamwende u Mulungu kwe nhumbula yakwe yose, na kwe mahala gakwe gose, na kwe vilungo vyakwe vyose, no kumwenda muyagwe nha vyono yeyendile mweneco. Ne Nghani yiyi yo mbaha muno yicizize sunga ne vilavywa vyo kunyanywa hamonga ne makumbiko ganji gose kuli Mulungu.”

³⁴ Nayo Yesu yaza kuwona vyono umunhu yuyu yamupituye kwe mahala, yakamutya, “Agwe si wuli kutali no wutemi wo Mulungu.” Hanyuma ya zizo hasina munhu mono yejelela kanyhi kumuwuza cinji.

Muli ze nghani ya Kilisito

³⁵ Na lono Yesu yejizaga mu Nyumba yo Mulungu, yakawuza yakutya, “Alu nhawule iwejizi wo Wulajilize watezaga vyono Kilisito yo mwana wa Dawudi?

³⁶ Na Dawudi mweneco mu wutongwe no Muhe Mono Yelile yalonga yakatya, ‘U Muwaha yamulonjela Muwaha wangu yakatya, Wikale ku lubavu lwangu lo kulume, sunga kolo nghuwika iwalugu wako wukanyago we magulu gako.’

³⁷ “Na Dawudi mweneco nha yakumucema Kilisito, Muwaha. Alu Kilisito ho kowa wule mwanagwe kanyhi?” Ne lipuga lye wanhu likawa limuhulicize akuno lisangalaye muno.

Yesu yakuwasugula wanhu kuli ze wejizi wo Wulajilize

³⁸ Mu mejizo gakwe Yesu yalonga yakutya, “Musuguce kuli wejizi wo Wulajilize, wono wendile kujenda jenda ako, na ako akuno wavwalile zikanzo zinhali no kulamuswa ne wanhu kwe cogopo mu Sokoni, kanyhi wendile kwikala mu magoda matambule mu matang'anilo go wuhembelo,

³⁹ no kwikala i hanhu hatambule mu zindigwa ze zisikukuu.

⁴⁰ Wakuwewonela i wacekulu wafwile, no kuwasolela i vinhu vyawo, akuno wakwikonjeleza ko kulomba wulombe wutali muno! Ninga mwizuwa lyo wuling'anizwe, wolotuga wulipicizwe wuwaha muno.”

I cilavywa co mudala Mufwile

⁴¹ Yesu yali yekaye behi ne lisanduku lyo wuwiko we zisawo. Nayo yakawa yakulanjilila vyono wanhu wenji walavyaga zipesa no kuzitajila mu wuwiko we zisawo ze Nyumba yo Mulungu. Iwagoli wenji wakalavya pesa nyinji.

⁴² Baho yakaza mudala yunji muciwa kanyhi mufwile, nayo yakalavya vipesa vyejete vyono vina cifo ca sendi 'kumi.

⁴³ Baho Yesu yakawacema iwejizwa wakwe yakawatya, “Mbeka nghumulonjelenyi, mudala ayu muciwa kanyhi mufwile, nha kalavya kuciza wanji wose wono watajiye zipesa mwi'sanduku lyo wuwiko we zisawo.

⁴⁴ Hambi wose nha walavya ku wulawa mu wucizilize wo winji we zisawo zawo, ninga mudala ayu, hamba yawe nha muciwa, ninga kalavya vyose vyono yena navyo, kalavya vyose vyono yali yetumbiye so wuwumipe wakwe.”