Malaki 2 - Luganuzi Luswanu Kuli Wanhu Wose 2002

¹ U Muwaha Mulungu we mihanga yakuwalonjela wakohani yakutya, “Lilajilizo lyenyu lyo lino. Munojeye munyogope nene muli zose zono mukwituma.”

² Ninga hono mulece kuzihuliciza zono nghulonga, nane nomuletelenyi wulijitwe. Novilijita sunga na vyose vyono mukuvibocela so vitumamilwa vyenyu. Heya, nakondya kuvilijita, ku soko vyono si mukwibata lilajilizo lyangu musimbiliye.

³ Nane nowalipiciza wana wenyu, niwubuluje wusu wenyu ne matope ge mitugo zenyu zono mukulavya. Nanye mosolwa mutagwe ku cugulu hamonga ne matope gago.

⁴ Nanye baho ho molomanyila vyono, yo nene mono namupelenyi lilajilizo lili, ne cilagane cangu mu nzila ye wakohani wo lulelo lwa Lawi, naco hamba si colobenecela lukulu yaye.

⁵ “Na mu cilagane cangu cico, nawehuwiza wumi no mulamu, na zizi zo nawapela wene, ho wawe ne cogopo kuli'ne. Na mu vilo vivyo wakahulika no kunyogopa nene.

⁶ Wakejiza zono zali zili ling'ani, hamba si zimbi yaye. Wakawa wali hamonga nane, kanyhi hamba si wetuma ze ling'ani weneco du, langa kanyhi wakawataza sunga ne wanhu wanji walece kwituma zo wubi.

⁷ Yinojeye wakohani wejize mafundo ge mbeka go Mulungu. Wanhu ho wabite kuli wene, wakelanjize wuhile wangu, hambi wene nha wetumami wo Muwaha Mulungu we mihanga.

⁸ “Ninga alu, anye nyo wakohani, mwakondya kuwuka mu zinzila ze ling'ani, no wijize wenyu, wukuwatonga wenji ku wituma zimbi. Mwabena icilagane cangu cono calagana nanye.

⁹ Holeka nane, nowanoza i wanhu wa Isilayeli, wamusekanjenyi muno, vyono si mukuwutyatya wuhile wangu. Na lono mukuwejiza wanhu wangu, hamba si mukuwanozeza wose muling'ano.”

Wu wula wihuwilwa we wanhu kuli Mulungu

¹⁰ Ma ase wose, si cina sogo yetu du yumonga? Si yo Mulungu yuyo du, mono yaciwumba wose? Alu nhawule cikwiyibenela wihuwizo wetu sese wose, hamba nhawule cikucibedegala cilagane cono Mulungu yacinoza ne walezi wetu?

¹¹ I wanhu wa Yuda, wakondya kuwubena wihuwizo wawo hali Mulungu, no kwituma zo wubi mu Yelusalemi, na mu yisi yose. Wayihodanga Nyumba yo Mulungu yono Muwaha Mulungu yayendile. Wanhu watola iwacekulu wono wakuhemba imilungu mijenzi.

¹² Muwaha Mulungu yawawuse mu mhuga ya Isilayeli, wawo wono wakwituma zizi, hamba yalece kuwaleka kanyhi, wahanje mu wulavya vilavywa, vyono likungugo likumulavizya Muwaha Mulungu we mihanga.

¹³ Ayi yo nghani yinji kanyhi yono mukwituma, mukucigubika cikumbicilo co Muwaha Mulungu kwe mahozi ge cililo cenyu, vyono mwene siyakuvibocela vilavywa vyono mukumulavizya.

¹⁴ Mukuwuza mukutya, nhawule siyakuvibocela, Heya siyakuvibocela, hambi nha yamanyile vyono agwe wabena wihuwizo wako kuli mugolece, mono wamutola lono wali wukali muzelelo. Mwene yali yo muyago, ninga agwe wabena wihuwizo wako kuli mwene, hamba nha yiwe wehuwiza ha mwande yo Mulungu, nha vyono kowa mwihuwilwa kuli mwene.

¹⁵ Hamba Mulungu siyamunozenyi 'nye muwe muwili monga no muhe monga? Mukwihwesa wuhile wakwe cali cicici muli zizi? Wuhile wakwe wali, ho mutuje wana wono wolowa wanhu we mbeka wo Mulungu. Holeka mwinozeleze, halece kuwa na yunji muli nyenye mono yakubena wihuwizo wakwe kuli mugolece wakwe.

¹⁶ Muwaha Mulungu we Waisilayeli yakutya nhavi, “Ane si niyendile nghani yiyi yo wilece. Ane siniyendeye lukulu nghani yiyi, lono muyenyu yunji yakwituma nghani 'mbi yono yinha yiyo kuli mugolece wakwe. Holeka wiyihenje go mweneco, wulecele lukulu kubena cilagane co kuwa mwihuwilwa kuli mugolece wako.”

Lizuwa lyo wuling'anizwe lili behi

¹⁷ Mwamukataza u Muwaha Mulungu ne zinghani zenyu zono mukulonga. Ninga kanyhi mukuwuza mukutya, “Camukataza nhawule?” Mwamukataza no wulonje wenyu wono mukutya, “Muwaha Mulungu kehwesaga i wetuma vibi wose waswanu, kanyhi yakuwenda.” Hamba lono mukutya, “Yali hayi Mulungu mono koling'aniza?”