Lutu 4 - Luganuzi Luswanu Kuli Wanhu Wose 2002

Bowazi yakumutola Lutu

¹ Bowazi yakawa kubita kwi'kaya, yakawa kwikala ha mulango we hanhu hono wetang'anililaga mu mikung'ano. Hanyuma u nduguye we behi muno wa Elimeleki, mono Bowazi yakawa yamutambula, nayo yakawa yakukola baho, nayo Bowazi yakawa kumucema, yakutya, “Gwe muyangu wuze ahano, mwendece wangu wikale hasi ta hadodo.” Yakawa kubita no kwikala.

² Hobaho Bowazi yakasola wanhu yikumi wawaha wa mu 'kaya no kuwatya waze wehangulize wose baho. Nawo lono wali wekala,

³ mwene Bowazi yakawa kumulonjela nduguye yakatya, “Alu, Nawomi yawuya ku wulawa Mowabu, yakusaka kuguza mugunda wono wali we ndugu yetu Elimeleki,

⁴ nane nghwihwesa vyono, yikunojeye wuzimanye zizi. Holeka aluno hono wukuwusaka, wuwugulaje ha mwande ye wanhu awa wono wali bahano. Ninga hono wuwe si wukuwusaka, ale, wulonje, ku soko ling'ani yo kuwugula yikunojeye gwegwe wuwe mulongozi wo kuwugula, na hanyuma ho lwangu.” Nayo munhu yu yulya yakatya, “Nowugula nene.”

⁵ Bowazi yakamutya, “Ale viswanu! Ninga hono kuwugula mugunda wuwo ku wulawa kwa Nawomi, wumanye vyono wukumuguliliza na Lutu u mu Mowabu mufwile, no mugunda wikale mu mhuga yo munhu mono yafwiye.”

⁶ Nayo munhu yuyo yakapitula yakatya, “Hono yili nhavivyo, nokulecela ling'ani yangu yo kuwugula mugunda, ku soko yikwijela vyono iwanangu, si wowuhala mugunda wuwo. Holeka ciba wuwugule go mweneco.”

⁷ Mu vilo vye katali vye Waisilayeli, lono munhu yaguzaga, hamba kukawaniza sawo, awu wali wo moto kuli yuyo mono yaguzaga, yasolaga lilatu lyakwe, no kumupela mono yakugula, na mu nzila yiyi muli Isilayeli yalajilaga nha vyono nghani yimalika.

⁸ No munhu yuyo yaza kuwa yalonga na Bowazi, yakamutya, “Wugulaje gwegwe.” Hobaho yakasola lilatu lyakwe, no kumupela Bowazi.

⁹ Baho Bowazi yakawalonjela i wawaha na wose wono wali wali baho yakatya, “Anye wose muli wahomelezi zuwali, vyono ane nghondya kuvigula ku wulawa kuli Nawomi vinhu vyose vyono vyali vya Elimeleki hamonga na vye wanagwe Ciliyoni na Maloni.”

¹⁰ Kanyhi na mu wityatye wo moto wetu, Lutu u mu Mowabu, u mulekwa na Maloni, kowa mugolece wangu. Na mu nzila yiyi, sawo yokwikala mu mawoko ge mhuga yo munhu mono yafwiye, no wityatye wo lulelo lwe mhuga yakwe, lojendelela muli wanhu wakwe, na mwi' kaya lyakwe. Nanye yo nyenye wahomelezi muli zizi izuwali.

¹¹ Nawo wawaha, hamonga ne wanhu wose wakatya, “Heya, ase cili wahomelezi. Nayo Muwaha Mulungu yamunoze mucekulu wako yawe nha Laheli na Leya, wono walela wana wenji kuli Yakobo, nagwe wuwe mugoli mu lulelo lwa Efulata, no kuwa munhu muwaha mu Betelehemu.

¹² Ne wana wono Muwaha Mulungu kokupela agwe kuli muhinza yuyu, woyinoza mhuga yako yiwe nha mhuga ya Pelezi, mwana wa Yuda na Tamali.”

Bowazi no lulelo lwakwe

¹³ Hodu, Bowazi yakamusola Lutu no kumutegula ku kaya yakwe yakawa mugolece wakwe. Muwaha Mulungu yakamumotya, nayo yakadinghula nda, yakalela mwana wa cilume.

¹⁴ Nayo Lutu yakamutya Nawomi, “Yalumbwe Muwaha Mulungu mono yakupelile mwizukulu zuwali mono kokudima agwe. No muzelelo yuyu, yeze yamanyice muli Isilayeli.

¹⁵ No mukwewo yakwendile muno, kanyhi yakondya kukwitumila zinyinji kuciza wana we cilume mupunghati. Nalu yakupela mwizukulu mono koleta mikalile mipya no kukudima mu wukombi wako.”

¹⁶ Nawomi yakamusola u mwana no kumupagata, yakawa yo mukoci wakwe.

¹⁷ Nawo i wacekulu wekalani wayagwe, wakamucemela umwana litagwa lya Obedi. Nawo wakawa kuwalonjela wanhu wose nha vyono lu, u mwana we cilume kalelwa kuli Nawomi. Obedi yakawa yo sogo wa Yese mono yali sogo wa Dawudi.

¹⁸ Ayi yo mhuga yo lulelo lono lulawiliye kuli Pelezi sunga kuli Dawudi; wawo wo wana wa Pelezi.

¹⁹ Pelezi yakamulela Hezeloni, Hezeloni yakamulela Lamu,

²⁰ Lamu yakamulela Aminadabu; Aminadabu yakamulela Nasoni,

²¹ Nasoni yakamulela Salimona, Salimona yakamulela Bowazi; Bowazi yakamulela Obedi;

²² Obedi yakamulela Yese; Yese yakamulela Dawudi.