Lutu 3 - Luganuzi Luswanu Kuli Wanhu Wose 2002

Lutu yakutolwa

¹ Hanyuma Nawomi yakamutya Lutu, “Mwanangu, ane nghuwona vyono yowa viswanu, hono nghulondolele mulume yakutole, ho wutuje nyumba yako go mweneco.

² Wukumbucile vyono munhu ayu Bowazi, mono mwetumanaga hamonga ne wetumami wakwe we cicekulu mu mugunda, ase ndugu yetu. Alu hulicize, cinyamihe cici, mwene kowa kwela wuhemba.

³ Holeka wihovugaje no kwibaka mafuta ge mhunjile swanu, wuvwale ne vivwalo vyako viswanu. Hanyuma wubite kuko ku cuga kono yakwelela wuhemba. Ninga mwene yalece manya vyono nagwe wuli baho, sunga kolo yamala kulya no kung'wa.

⁴ Wumulanjililaje hono yakubita kugona, na kolo yakondya kugona nhongo, nagwe wubite wukesosomece mu mwenda wakwe wo kwifunika ku lubavu lwa ku migulu yakwe, wuwe kugona baho. Nayo mwene kokulonjela cono wunoze.”

⁵ Lutu yakamupitula Nawomi yakatya, “Ale viswanu yaya, ane nokwituma zose nha vyono wunonjeye.”

⁶ Hobaho, Lutu yakawa kubita ku cuga no kwituma zose zono mukwewe yamulonjela.

⁷ Bowazi yaza kondya kulya no kung'wa yakawa na nyemo mu nhumbula yakwe. Yakawa kubita he 'lundo lyo wuhemba no kugona nhongo. Nayo Lutu yakawa kubita mholamhola, yakawa kuwugubula mwenda yakawa kwisosomeka no kugona ha magulu ga Bowazi.

⁸ Na mucilo mugati, Bowazi yakenuka nhinicizo, no kupituka, yakezina muno kumuwona munhu wa cicekulu yagonile baho.

⁹ Yakamuwuza yakatya, “Alu gwegwe nani?” Nayo Lutu yakapitula yakatya, “Gwe muwaha wangu, nene Lutu no mwitumami wako. Hambi nha yo gwegwe mono wuli ndugu ye behi, kanyhi mono wudahile kundima. Holeka nghukunena wuhalaje.”

¹⁰ Nayo Bowazi yakamutya, “Ale Muwaha Mulungu yakumotye mwanangu. Hambi nha wukulajila cogopo ciwaha ca mu mhuga yenyu, muli zono wukwituma aluno, kuciza zono wetuma kuli mukwewo Nawomi. Hamba nhavivyo, yali yinojeye wubite wukamulondole mulume muzelelo, hamba yawe mugoli hamba muciwa. Ninga agwe vyo si wunozize nhavivyo.

¹¹ Holeka Lutu, wulece kwihwelela. Nane nokunozeza zose zono wukuhila, hambi wanhu wose wa mwi'kaya, nha wakumanyile vyono wuli mucekulu muswanu.

¹² Mbeka ane nili ndugu ye behi, na kanyhi ndahile kukudima. Ninga koyali munhu yunji, we ndugu ye behi, kuciza ane.

¹³ Holeka wugone baha sunga wele, nane kolo wela, ho nowona hono munhu yuyo kosuma kukudima hamba ng'o. Na hono yiwe vyo yinha, ale yowa nghani swanu, na hono yilece kusumika, ale hodu. Nane nghwilahiza hali Muwaha Mulungu mumi, nha vyono nene nokudima.”

¹⁴ Hodu Lutu yakawa kugona baho ha magulu ga Bowazi. Ninga yakelawa kwinuka lono kukali kutitu titu, ho yalece kuwonwa na yunji, vyono Bowazi si yasaka munhu wo wose yamanye vyono Lutu yali yali baho.

¹⁵ Bowazi yakamutya Lutu, “Ale wulete mwenda wako wono wuvwalile wuwibate mu mawoko.” Nayo Lutu yakawa kuwibata, Bowazi yakawa kulunda kilo makumi mejete go wuhemba mu mwenda, yakawa kumutwika Lutu mu mutwe. Yakawa kubita nawo ku kaya kwawo.

¹⁶ Yali yeza kufika ku kaya, umukwewe Nawomi yakamuwuza yakutya, “Alo mwanangu, wuhemba kuwusola hayi?” Nayo Lutu yakawa kumuloloseza mukwewe zose zono Bowazi yamunozeze.

¹⁷ Kanyhi, “Kanyitya, ‘Si yowa viswanu mbuye kuli'gwe akuno sina cinji, holeka kawa kumhela no wuhemba wuwu wose kilo makumi mejete nghuletele.’ ”

¹⁸ Nayo Nawomi yakamutya, “Alu mwanangu Lutu, weze no wukangalile, sunga wuziwone zizi zose vyono zowa. Manyile vyono Bowazi sikoceha zuwali, sunga yayimale nghani yiyi.”