Lutu 2 - Luganuzi Luswanu Kuli Wanhu Wose 2002

Lutu yakwituma mu mugunda wa Bowazi

¹ Nawomi yali yena nduguye mono yacemwaga Bowazi, munhu mugoli kanyhi munhu muwaha, mono yali we mhuga yo mulume wakwe Elimeleki.

² Ale, mwi'zuwa linji, Lutu yakamulonjela Nawomi yakatya, “Lece 'ne mbite ku migunda nghehalalize wuhemba wono wakuwusigaza lono wakududula. Manyile nha vyono notuga mono komvumila nitume hamonga nayo.” Nayo Nawomi yakamupitula yakamutya, “Ale, wubite mwanangu.”

³ Lutu yakawa kubita ku migunda, yakawa yakutyatya mu nyuma ye waduduzi, no kuhalaliza wuhemba wono wasigazaga. Yikejela vyono kumbe yali yali mu mugunda wono wali wa Bowazi mono yali we mhuga ya Elimeleki.

⁴ Hanyuma yayo Bowazi mweneco yakaza ku mugunda ku wulawa ku Betelehemu yakawalamusa i waduduzi. Yakatya, “Muwaha Mulungu yeze muli nyenye.” Nawo wakamutya, “Muwaha Mulungu nagwe yakulugute.”

⁵ Bowazi yakamuwuza mulanjilizi we waduduzi yakatya, “Alu yuyu muhinza mwana nani?”

⁶ Mulanjilizi yakapitula yakatya, “Ayuno muhinza, mujenzi, mono yazize ku wulawa Mowabu hamonga na Nawomi.

⁷ Kanyitya nimulece yawatyatye mu nyuma i waduduzi, yahalaliza wuhemba. Kaswa yakwituma ku wulawa hakali mitondo, alu yacehile du hadodo mu cibanda.”

⁸ Baho Bowazi yakamulonjela Lutu yakatya, “Hulicize mwanangu, wulece kanyhi kwihalaliza wuhemba mu migunda yinji, langa mu mugunda wuwu du. Witumaje baha, hamonga ne wetumami wangu wawa we cicekulu,

⁹ na lono wukuza mono mugunda weze kwamula kulanga, wuwone kono we cicekulu wakududula. Nagwe weze wuli hamonga du ne wahinza wawa. Nane nakondya kuwalajiliza wawo we cilume walece kukugaza. Na hono wuwone nyhilu, wubite ku viya wukang'we malenga gono wanejile.”

¹⁰ Lutu yakenamya wusu wakwe ho hasi, yakamutya Bowazi, “Alo nhawule wukwigaza ku soko yangu? Hamba nhawule wendile kuwanozeza viswanu wajenzi?”

¹¹ Nayo Bowazi yakamutya Lutu, “Ane nakondya kuzihulika zose ziswanu zono wetuma kuli mukwewo Nawomi, ku wulawa lono mulume wako yafwila. Kanyhi manyile na vyono, wawaleka u sogo no nyina yako ne yisi yako, na vyono waza kwikala muli wanhu wono wali si wuwamanyile yaye.

¹² Holeka Muwaha Mulungu, u Mulungu we Waisilayeli, yakumotye so zizo zono wetuma. Kanyhi wutuje cihumbilizwa cono cimemeleceye, ku wulawa kuli yuyo Muwaha Mulungu we Waisilayeli, yuyo mono wumuzize ho yakukamise.”

¹³ Nayo Lutu yakamupitula Bowazi yakamutya, “Gwe muwaha, kuhonjela muno, kuli zono wunhedeye, no mwitumami wako. Hambi nha wanoza nane nihulice viswanu, vyono kulonga nane, kwa wupolo, hamba nha yiwe ane si nihwanile na yunji wa muli wetumami wako.”

¹⁴ Na mu cipango co kulya zindigwa, Bowazi yakamutya Lutu, “Wuze nagwe wusole nhonje wulilize mu divayi.” Hodu Lutu yakawa kwikala hasi hamonga ne waduduzi, nayo Bowazi yakawa kumupela mbonho zo wuhemba. Nayo Lutu yakalya sunga yakeguta, no kusigaza ndigwa zinji.

¹⁵ Nayo yali yeza kwinuka ho yabite yakahalalize wuhemba. Bowazi yakawalajiliza wetumami wakwe yakawatya, “Mumulekaje Lutu yahalale sunga na mu madulu, mulece kumwimila.

¹⁶ Hamonga na zizo, mucepule wunji ku wulawa mu madulu muwulece, nayo yetondoleze.”

¹⁷ “Nayo Lutu yakawa kujendelela no wihalalizi wakwe wo wuhemba mu mugunda, sunga likaswa. Nayo yali yeza kuwutwanga wono yahalaye, yakatuga kilo yikumi limonga.”

¹⁸ Yakawutegula wuhemba ku kaya yakamulajila mukwewe vyono yahalaye. Nayo Nawomi yakawa kumupela Lutu wukoko wono mwene Nawomi kasigaza mu ndigwa ye misi.

¹⁹ Hanyuma, Nawomi yakamuwuza Lutu yakatya, “Alo zuwali kwihi kono wuwuhalaye wuhemba wose wuwu? Hamba wali mugunda wa nani, mono wali kwihalaliza? Mulungu yamumotye munhu yuyo mono yendezwe nagwe. Nayo, Lutu yakawa kumulonjela Nawomi, nha vyono yali kuhalala mu mugunda wa munhu mono yakucemwa Bowazi.”

²⁰ Nayo Nawomi yakatya, “Muwaha Mulungu yamumotye Bowazi!” Muwaha Mulungu mono kawukamisaga wihuwizo wakwe kuli womi na kuli wono wafwiye. Yakajendelela kanyhi kutya, “Munhu yuyo ndugu yetu, kanyhi yo munhu muyagwe na wono wena ling'ani yo wuhale.”

²¹ Nayo Lutu u Mumowabu yakatya, “Na yono swanu kuciza zose, kanonjela katya, neze kuhalala wuhemba mumo du mu mugunda wakwe, hamonga ne waduduzi wakwe, sunga lono walamalila ndudula.”

²² Nawomi yakamutya Lutu. “Heya mwanangu, yowa viswanu kuli'gwe wuwe kwituma hamonga ne wetumami we cicekulu wono wakwituma mu mugunda wa Bowazi. Hambi nha manyile vyono, hono wubite wukahalale mu mugunda wa munhu yunji, munya mugunda wuwo, koswa yakukugaza bwete.”

²³ Nayo Lutu yakajendelela kwituma hamonga nawo no kuhalala wuhemba, sunga ndudula yose yo wuhemba yikawa yamalika. Nayo Lutu yakajendelela du kwikala no mukwewe.