Jobu 3 - Luganuzi Luswanu Kuli Wanhu Wose 2002

Jobu yakumulilila Mulungu

¹ Nhondo Jobu yakawa kwanza kulonga, yakalilijita lizuwa lyono yalelelwa.

² Jobu yakalonga yakatya,

³ Gwe go Mulungu, wulilijite lizuwa lyono nalelelwa, hamonga ne cilo ci cilya cono nadinghulilwa 'nda!

⁴ Wulinoze lizuwa lilyo ciwe citi 'gwe go Mulungu. Hamba wulecele lukulu kulikumbucila kanyhi lizuwa lilyo, hamba wuzelu wulece kulimulicila kanyhi.

⁵ Wulinoze lizuwa lilyo wuwe wutitu, liwe wutitu tuku. Wuligubice ne mavunde, lizuwa lilece kulimulika.

⁶ Wuciwuse cilo cico mu vilo vyo mwaka ho cilece kuwalilwa lukulu kanyhi

⁷ I cilo cico cikale cili wene, ciwe cilo cono cisina nyemo.

⁸ Walonjele wono walilijitaga lizuwa, walilijite lizuwa lilyo, wawo wono wamanyile kulitonga ne lilimu lyono licemwaga Lewiyatani.

⁹ Wuzimile zinyelezi za mwi'jingu lyo wusiku, zilece kulajila wuzelu wayo, cilo cico cilece kuwuwona wele we hakali mitondo.

¹⁰ Wucilijite cilo cico, cono caleka ane nghalelwa no kumbika mu wusungu ne magayo.

¹¹ Ciba le nali fwile mu'nda ya yaya, hamba kuwuzilila kamonga du.

¹² Alu, socici nayo yaya yakamhagata? Hamba nhawule lu yakanyosa?

¹³ Ninga hono baho nali nifwe, alu baha mhali nyhehile.

¹⁴ Mhali ngonile du, kotya watemi, hamonga ne walongola wono wagazenga makaya ge katali go wutemi.

¹⁵ Kanyhi mhali ngonile kotya i wana we watemi, wono wali wamemizye zikaya zawo zahabu na fweza.

¹⁶ Hamba mhali ngonile nhongo nho mwana mono yaleligwe mwezi si wakwe. Nha mono yalelwa i vimba, hamba kuwuwona wuzelu.

¹⁷ Namo mu vitenjelo, i wanhu wabi, hamba si wajendelelaga kwituma nghani zawo zimbi, na wono wakataye so milimo yawo wakuwa kuceha.

¹⁸ Sunga ne wafungwa wose, nawo watugaga mulamu, hamba si wahulikaga kanyhi mazi go wukali.

¹⁹ Ne wanhu wose wali baho, we lilumbo, hamonga na wose wono si wamanyice, ne wawanda, nhondo wakuwa welecele.

²⁰ Alu socici wukuwaleka wanhu wawe kwikala wali mu wugaye Hamba socici wukuwapela wuzelu i wanhu wono wali mu wusungu?

²¹ Wene walindilaga lifwa, nalyo lifwa hamba kuwaziza yaye. Wakusulumila kufwa, si nha ciwutwa cihundice.

²² Nawo wekalaga wasina nyemo, sunga kolo wafwa no kuzikwa.

²³ Mulungu yawahundiciye zawo za ku mwande, yawapilime mbavu zose.

²⁴ Alu wugule wangu, wo wukuhomela wulye we zindigwa, nane hamba si nosuma kuleka kukoloma yaye.

²⁵ Ne nghani yono niyogopaga hamonga na yono yinyogofyaga, vyose vikunyiziza.

²⁶ Alu neza sina mulamu, hamba wucehe bwete, no wugaye wangu si wukuduma yaye.