Jobu 2 - Luganuzi Luswanu Kuli Wanhu Wose 2002

Jobu yakujelwa kanyhi na Setani

¹ Kukawa mwi'zuwa linji kanyhi, lono viwumbwa vya ku wulanga vyazaga ho vilajile hali Muwaha Mulungu, na Setani nayo yakaza hamonga navyo.

² Muwaha Mulungu yakamuwuza Setani yakatya, “Gwe Setani, alu wali wuli hayi?” Nayo Setani yakamupitula yakatya, “Ane nili mu wupilime-pilime du, ako na ako mono'nze.”

³ Muwaha Mulungu yakamuwuza Setani yakamutya, “Ninga wumuwene u mwitumami wangu Jobu? Hambi nha hasina munhu yunji mononze yiyi, mwihuwilwa, kanyhi munhu muswanu, mono yehwanile yuyu Jobu. Hambi Jobu nha kahembaga nene, kanyhi kelanjililaga muno, ho yalece kwituma nghani yo yose 'mbi. Ninga agwe wukasaka nghukombole wubite wukamutamise mbula soko. Ninga lu wulanje! Jobu yakali vyo mwihuwilwa du kuli'ne nha vyono kawezaga vilo vyose.”

⁴ Setani nayo yakamupitula Muwaha Mulungu yakamutya, “Heya, munhu kolavya vyose vyono yena navyo, vihomele wumi wakwe.

⁵ Ninga aluno, hono wumupele magazo mu muwili wakwe, manyile vyono kokukana calinze.”

⁶ Nayo Muwaha Mulungu yakamutya Setani, “Ale viswanu, Jobu yali mu miwoko yako, ninga langa du, wulece kumuwulaga.”

⁷ Hobaho Setani yakawa kuwuka hali Muwaha Mulungu, yakawa kumupela Jobu mapu mawaha muwili wose, wulawilila mu magulu sunga ko kwi ndosi.

⁸ Nayo Jobu yakawa kubita kwikala mu cugulu, yakasola cizaye, yakawa yakwisuwila mu mapu gakwe.

⁹ Ninga mugolece wakwe yakamutya, “Alu mwene agwe Jobu, hongo wukali wuli mwihuwilwa du nha vyono kuwezaga vilo vyose? Alu si yali yiwe ciba wali wumutovule Mulungu, hodu du wuwe kufwa?”

¹⁰ Ninga Jobu yakamupitula mugolece wakwe, yakamutya, “Gwe mugolece wangu, mbeka wukulonga nghani za caka du! Alu kumbe, hono Mulungu yakuciletela nghani swanu, ayo langa ciyibocelaje na nyemo. Ninga kolo yakuciletela wugaye, hongo yicinojeye cimung'ung'ulicile?” Na muli zizo zose ze magayo zono zamwijelela Jobu, ninga mwene hamba si yalonga nghani yo yose 'mbi kuli Mulungu yaye.

I wendece wa Jobu, wakumuziza

¹¹ Nayo Jobu yali yena wendece wakwe wadatu, Elifazi munya kwi'kaya lya Temani, na Bilidadi mulawa ku yisi ya Shuwa, hamonga na Zofali, nayo munyawusi we yisi ya Nama. I wanhu wawa wali weza kuzihulika, nha vyono Jobu yali mu magazo mawaha, hodu wakawa kulagana wabite wose hamonga wakamusindamice.

¹² Nawo lono wabitaga, na lono wali wakali wali cidaha, wakamuwona Jobu kwa kutali, ninga hamba si wasuma kumumanya vyono yo mweneco Jobu. Ninga wali weza kumumanya vyono yo mweneco Jobu, hobaho wakawa kwanza kulila wazozize muno, akuno wakuyidemulanga ne myenda yawo ko wusungu wuwaha muno, akuno wakwesa ne manghundi mucanyha, no kwikupila ganji mu mitwe yawo.

¹³ Hanyuma wakawa kubita hono hoyuli Jobu, wakawa kwikala baho hasi hamonga nayo, vilo mupunghati, cilo na misi, hamba kulongana nayo nghani yo yose, hambi nha wali wakondya kuwona vyono mbeka yali mu wusungu wuwaha muno.