I Cililo 5 - Luganuzi Luswanu Kuli Wanhu Wose 2002

Kulomba lusungu

¹ Gwe go Muwaha Mulungu, wukumbucile zono zacagana, wucilanje, wuciwone ne cevu cetu.

² Hambi zisawo zetu zose, nha zeza zili mu miwoko ye wajenzi. Kanyhi wawo wajenzi, wo wekaye na mu zikaya zetu.

³ Ne wasogo zetu wose, nha wakondya kuwulagwa ne walugu wetu. Ne wanyina zetu wekala wafwile.

⁴ Alu lanje, ne malenga gose go kung'wa, cikugula, sunga ne zingwagu zose cikugula.

⁵ Wacimasha duu, kotya cili madogowe hamba ngamiya, sunga nhondo cakatala. Ninga hamba nhavivyo, si wakucileka ciceheze yaye.

⁶ Na lono ciwe cikusaka ndigwa zono zicikwiliye, sunga cibite du cikelombeleze ku Misili, hamba ku Siliya.

⁷ Walezi wetu, heya wasutya, ninga aluno wakondya kufwa, ninga ase luno, ceza kugaya ku soko yo wubi wawo.

⁸ Nalu citemigwe ne wanhu wawanda, na hasina mono kociponya mu miwoko yawo.

⁹ Ne wawulaji wakukoloma mu nyika. Nase cikuwa kuwusuza wumi wetu, lono cikubita kulondola ndigwa.

¹⁰ Ne nzala nayo yacinoza zinghuli zetu zawawuka ne zimhungo, sunga ne miwili yetu nayo, yeza yili moto kotya mafigwa.

¹¹ Ne wagolece zetu nawo, wakwibatwa ne walume, no kugona nawo kwe vilungo mwi'tunda lya Sayuni, na mu vitumbi vyose vya Yuda. Ne wana wetu we cicekulu, nawo wakudindimizwa ho wagone ne walume kwe vilungo.

¹² I walongola wetu nawo, wakwibatwa, wakunyongwa. I wakombi wetu, si wakupegwa cogopo yaye.

¹³ Nawo i wazelelo wetu, wakudindimizwa wakuzule wuhemba mu matuli nha wawanda. Nawo i wana wetu wadodo we cilume, wapebesukaga-pebesukaga so wudinghula mitegulo mizito ye zingwagu.

¹⁴ I wakombi nawo, wapela ku wubita kwikala mu milango ye likaya. I wazelelo nawo, wapela ku wubita ku ng'oma.

¹⁵ I nyemo ya mu zinhumbula zetu, yaduma. Ne midawalo yetu yapituka cawa cililo.

¹⁶ Hasina cinji cono cisigaye, muli vyose vyono celumbilaga. Heya cetuma wubi, nalu congomezwa.

¹⁷ Holeka zinhumbula zetu zizilice. Na ku soko ya zizo, ne meso getu si gakuwona viswanu.

¹⁸ Hambi litunda lye Sayuni nha lyalekwa lyekala lili wene, ne macewe gakupilima-pilima mu matongo galyo.

¹⁹ Ninga agwe go Muwaha Mulungu, yo gwegwe du wuli mutemi cibitilila, nagwe kotema sunga ko ku ndumo ye yinze.

²⁰ Alu nha wacileka sunga vilo vyeza vinji muno? Alo hamba si kocikumbucila kanyhi ng'o?

²¹ Cikukulomba wucigomole kuli'gwe, 'gwe go Muwaha Mulungu, cikunena wucigomole! Wucigomolele kanyhi lukumyo lwetu lwe katali.

²² Hamba hodu wacilemela lukulu cibitilila? Alu kocikolelwa likuwo lyako sunga nili lo?