I Cililo 4 - Luganuzi Luswanu Kuli Wanhu Wose 2002

Yelusalemi lono yakondya kugwa

¹ Wung'alale we zahabu yetu hamba si wejela, ne mabwe gono gali mazenjele Nyumba yo Mulungu, gakeyagala caka mu zinzila.

² Ne wazelelo wa Sayuni, wali wo we cifo cikamu nha zahabu, ninga luno, wakutendelwa nha viya vye lilongo.

³ Sunga ne macewe nha gakuwa kosa mana gayo. Ninga wanhu wangu weza wakali, wenha nyacihema ya mu nyika.

⁴ Wakuwaleka wana wawo wagalika wakufwa ne nzala, hamonga ne nyhilu ye malenga. Wana nawo wakwilombeleza ndigwa, yono hasina hamba mono kosuma kuwapela.

⁵ Sunga ne wanhu wono walizaga ndigwa swanu, wose nha wafwila mu zinzila ku soko ye nzala. Na wono wekalaga wamotile, alu wakugaya so wulondola ndigwa.

⁶ Ne wanhu wangu watuga wulipicizwe wuwaha muno si nhe wanhu wa Sodoma, wono wepamila ne lifwa lye nhinicizo mu muwoko wo Mulungu.

⁷ Ne wawaha wetu wali waswanu kanyhi wazelu wenha seluji, wali vilungo, wahidimbazi ku milimo, kanyhi wena miwili miswanu yono yijinile.

⁸ Alu lanje, wagonile mu zinzila du, hamba kumanyika na munhu yaye, wakondya kufwa, no wusu wawo watukuwala, ne zinghuli zawo zanyala nha ngwagu, zinyaliliye ne mafupa gawo.

⁹ Na wono wafwila mu wulugu nha wali ciba, si nha wono wakafwa munyuma yayo, wono wafwizaga mhola mhola so nzala, wono wali wasina ndigwa yo kulya.

¹⁰ Ne magayo gono gawaziza wanhu wangu, galeta wogofye wuwaha muno. Hambi i wacekulu wono wali wawendile muno wana wawo, nha wakawateleka wana wawo, ho watuje ndigwa yo kulya.

¹¹ Muwaha Mulungu yakalifisiliza likuwo lyakwe liwaha, yakayipembela moto Sayuni, yikapya yikakongojela ho hasi.

¹² Hali hasina hamba munhu monga, hamba na muli walongola we makungugo majenzi, mono yali yehuwiye vyono wulugu wosuma kwinjila mu milango ya Yelusalemi.

¹³ Heya, zizi zejela, ku soko wawizi wawo wetuma wubi, ne wakohani nawo wakasutya, no kwambuza lifwa, kuli wanhu wono wasina masutya.

¹⁴ Ne walongola wawo, wakawa kuyumba-yumba du mu zinzila wenha wabofu. Na ku soko yiyo wakekwizanga sakami, mu nghango yono sunga yunji si yasuma kuwapamiza.

¹⁵ Sunga ne wanhu, wakawa kuwawinga wakutya, “Bitenyi ako! Hambi nha mweyavufya! Holeka muwuce, mulece hamba kucipamiza'se!” Hodu, nawo wakawa kutuluka, wakabita ako na ako mu makungugo ganji, ninga hakawa hasina hamba yunji kuko, mono yawabocela yaye.

¹⁶ Nayo Muwaha Mulungu, hamba si yawatununhicila yaye, Nhondo ho yakacila kuweyagaza. Hamba si yawakumbucila yaye i wakohani wetu, hamonga ne walongola.

¹⁷ Nase cikalanjilila, lunji cotuga wutazi, ninga calanjilila sunga cikakatala, hamba kuwutuga yaye. Cikajela kanyhi kulindila, lunji cotuga wutazi ku wulawa mwi'kungugo linji, ninga hamba si cawutuga yaye.

¹⁸ Nawo walugu wetu, vyo wali wacilanjiliye du, hamba si casuma no kujenda-jenda ako na ako mu zinzila. Ne vilo vyetu vikawa vyamalika, no mudumo wetu wafika.

¹⁹ Nawo wono wacilondaga mu nyuma, wali wali musunho muno kuciza numba ya mu mwanya. Wakacityatya mu matunda, wakacisola, wakacitegula ku nyika.

²⁰ Wakamusola u Wehele wo wumi wetu, u Mutemi, mono Muwaha Mulungu yamuhagula. U munhu mono cali cimwitumbiye, nha vyono yo kocitaza muli walugu wetu.

²¹ Ale, musece du, no kusangalala mu nghango yenyu, anye nyo wanhu wa Edomu na Uzi. Ninga mumanye nha vyono, nanye magazo gakumuzizenyi nhavivyo, nanye molopuwa, muwe jenda cipwi mukoligwe ne cevu.

²² Alu Sayuni yakondya kulipicizwa so wubi wayo. Holeka Muwaha Mulungu, hamba si kucileka cijendelele kuwa mu wuhamywe yaye. Langa agwe Edomu, u Muwaha Mulungu kokulipiciza du, kanyhi kowanzalika no wubi wako.