I Cililo 2 - Luganuzi Luswanu Kuli Wanhu Wose 2002

Muwaha Mulungu yakuyilipiciza Yelusalemi

¹ Nayo Muwaha Mulungu, yayifunika Sayuni no wutitu mwi'kuwo lyakwe. No lukumyo lwayo lwa ku wulanga, yaluhodanjila lukulu, Na mwi'zuwa lye likuwo lyakwe, yayileka sunga ne Nyumba yakwe.

² Muwaha Mulungu yavyongomeza vitumbi vyose vya Yuda, hamba kuviwonela lusungu yaye. Yakumulanga ne magomawakali gose gono gayicitilaga yisi. Yawaletela cevu ciwaha i watemi, hamonga no wutemi wawo.

³ Na mwi'kuwo lyakwe, yavidumulanga vilungo vya Isilayeli. Yalema kucipela wutazi, lono walugu waciziza. Yacitakamiza nha vyono moto wutakamizaga vyose.

⁴ Yacilunga ne zisonga zakwe nha mulugu, yawawulaga wose, wono wali wendeze ha meso getu. Nase amuno mono Yelusalemi, cikaliwona likuwo lyakwe vyono likwaka.

⁵ Muwaha Mulungu, yawahodanga Waisilayeli nha mulugu. Yagaleka magomawakali gayo ne hanhu hayo vihodangwe. Yawaletela wanhu wa Yuda wusungu wono si wolomalika.

⁶ Kayikumulanga Nyumba yo Mulungu, yono cenjilaga cikumuhemba. Yaciwusiza ne vilo vyetu vye zi sikukuu na vye zi Sabato. I watemi hamonga ne wakohani, wose wawuwona wukali we likuwo lyakwe.

⁷ U Muwaha Mulungu yakondya kucilema cikumbicilo cakwe, no kuyileka Nyumba yakwe yono yelile. Kakondya kuwaleka walugu wagakumulanje majinji gayo gose. Wakuzoza na nyemo yo wusume, i hanhu hono katali, cenjilaga cikuhemba na nyemo.

⁸ Muwaha Mulungu yali yasimbiliye, vyono majinji ga Sayuni ganojeye gakumulangwe du. Yakamula kuwalanga, ho yawaletele wuhodanjice wono wuwakwiliye. Majinji hamonga ne minala yayo, vyose vigwiye, nalu gawa matongo.

⁹ Nayo milango yayo, mifucizwe mu malowanjila, ne makomeyo gayo gose gabenanjice. U mutemi hamonga ne wanhu wakwe, wose wali ku wuhamywe. Alu nhondo, hamba Wulajilize weza si wukwijizwa yaye, ne wawizi nawo hamba si wakutuga wugubulilwe ku wulawa kuli Muwaha Mulungu.

¹⁰ Nawo i wanhu wakombi wa mu Yelusalemi, wekaye wanyamaye twii, akuno weyitiye manghundi mu mitwe yawo, wavwalile magunila. Nawo i wahinza, wenamizye mitwe yawo hasi.

¹¹ Woyi, he! Nhondo ne meso gangu, gapaya so cililo, ne nhumbula yangu nayo, yili mu wusungu wuwaha. No wusungu wanhamisa muno, ku soko yo wuhodanjice we wanhu wangu. Naluno i wana wadodo hamonga ne wagalika, wakuzilika du mu zinzila ze likaya.

¹² Wakulilila wanyina zawo, so nzala ne nyhilu ye malenga. Alu wakugwanga du mu zinzila, wenha wanhu wono wena nghomele. Hanyuma hodu, wawa kufwila mu mawoko ge wanyina zawo mhola mhola.

¹³ Woyi he gwe Yelusalemi! Go mwendece wangu Yelusalemi! Alu waco ho nolonga cici kanyhi? Ho nosuma wule kukusindamika? Hambi nha hasina munhu hamba monga, mono yatamiswa nha vivi. Hambi magayo gako nha gasina mupaka nhe lilenga. Hasina hamba witumbilo kanyhi.

¹⁴ Sunga ne wawizi wako nawo, weza wasina cinji cono wokulonjela, langa zo wulambi-lambi du. No wuganule wawo wukukongaga du, hamba si wukuwa kukulajila zo wubi wako. Na mu nzila yiyo, wakukunoza agwe, ho wiwone nha vyono wusina soko yo kunena.

¹⁵ Ne wanhu wono wakupuluta wakolile mwi'kaya, wakukulanga ko wubedegale, wawa kusinjisa ne mitwe yawo akuno wakugaseka matongo ga Yelusalemi, wakutya, “Mwene 'nye, mbeka lili lyo likaya liswanu, lyono lyali likumuce mu yinze yose?”

¹⁶ Ne walugu wako wose, alu wakukwizwajiza no kukunugulila ko lusulo, akuno wakuyibobotola ne milomo yawo, no kukubedula wakutya, “Hee! Cilihodanga si! Ali lyo lizuwa lyono cali cililanjiliye muno!”

¹⁷ Alu Muwaha Mulungu, nhondo ketuma zono yali yazitemizye kuzituma. Kacihodanga yasina lusungu nha vyono yacilonjela. Kawapela walugu wetu wusume, kawapela wusangalale so wutamiswe wetu.

¹⁸ Gwe Yelusalemi, wugalece majinji gako gamulilile Muwaha Mulungu! Galekaje mahozi gako gasulule misi ne cilo. Wisakaze ne cililo, hamonga no wusungu!

¹⁹ Na mu cilo cose, weze kwinuka kali kenji wukumulilila Muwaha Mulungu, wumujidile mutima wako nha malenga u Muwaha Mulungu, wumulombe yawawonele lusungu wanago. I wanago wono wakufwa ne nzala mu zinzila zose!

²⁰ Gwe go Muwaha Mulungu, wuwalanje wawo ta, wono wukuwatamisa, wo wa nani wene? Alu wulanje vyono sunga ne wacekulu nhondo, weza kulya ne miwili ye wana wawo wono wawendile! Sunga ne wakohani hamonga ne wawizi, nawo nhondo weza kuwulajilwa mu Nyumba yako mugati!

²¹ Alu i wadodo ne wakombi, wose nha wagwiye wafwiye mu zinzila. I wazelelo hamonga ne wacekulu, wose wakondya kuwulagwa ne mimaje ye walugu. Kuwawulajila mwi'zuwa lye likuwo lyako, wusina hamba lusungu.

²² Wukawalalika walugu wangu ku sikukuu, ho woga wangu wijele mbavu zose. Hasina hamba mono kolopona mwi'zuwa lilyo lye likuwo lyako. Hambi nha wawawulaga wanangu wono nawawilusa no kuwenda.