Isaya 9 - Luganuzi Luswanu Kuli Wanhu Wose 2002

¹ Nawo hamba si wolotuga nzila yo yose yono yolowataza ho weponye mu magazo gago. Mwamulizo yisi ya Zabuloni, hamonga ne yisi ya Nafutali, Mulungu yazikoza cevu. Ninga hanyuma, kolo ziletela lilumbo zisi zizo, ku wulawilila kwi'lenga lya Meditelaneya ku lubavu lwa kucilima, sunga ko ku yisi yono yili ku nhumbi ye likolongo lya Yoludani, sunga ko ku Galilaya kono wekalaga i wanhu wono si Wayahudi.

Mutemi mono kolotema hanyuma

² I wanhu wono wajendelaga mu wutitu wawona wuzelu wuwaha, wali wekaye mu yisi ye citi ciwaha ninga lu, wuzelu wuwabulilila.

³ Gwe go Muwaha Mulungu, kuwonjeleza nyemo yawo, kuwapela wusangalale wuwaha. Wakusangalalila muli zono wuwatendeye, nha vyono wanhu wasangalalaga, lono wali mu nhwanga ye ndudula yo wuhemba wawo, hamba lono wakugawana sawo yono wayitecile.

⁴ Hambi nha wawubenanga lubano lo mutegulo wawo, hamonga ne nghome yono yawatowaga mu mawega gawo. Hambi nha walisuma likungugo lyono lyawewonelaga no kuwatendela kwe vilungo wanhu wako, nha vyono walisuma katali lipuga lye wasilikale we Wamidiyani wo wulugu.

⁵ Hambi i malatu ge wasilikale vitung'ati mu milewo hamonga ne myenda yawo yono milowece mu sakami, nha yotakamizwa yose mu moto.

⁶ Hambi nha calelelwa mwana! Capegwa mwana wa cilume! Nayo yo kowa yo mutemi wetu. Ne litagwa lyakwe kocemwa, “Mwijizi wo Wizine, Mulungu mono yali Vilungo.” “U sogo yetu we Cibitilila, Mutemi wo Mulamu.”

⁷ No wuwaha wo wutemi wakwe, wojendelela kuwiluka no wutemi wakwe, wowa kwikala wa mulamu nhondo zose. Mwene kolohala u wutemi wose wo mutemi Dawudi, ho no kutema mu wutemi wakwe, kuwusikamya no kuwukamisa mu wiling'ano ne ling'ani ku wulawa lulu, sunga ne cibitilila. Nayo Muwaha Mulungu we mihanga, kohidimbala sunga yazitume zose zizi.

Muwaha Mulungu, koyilipiciza Isilayeli

⁸ Muwaha Mulungu yakondya kulonga nha vyono kowuling'aniza wutemi wa Isilayeli, mu lulelo lwa Yakobo.

⁹ Ne wanhu wose wa Isilayeli, wono wekaye mu Samaliya, womanya vyono Muwaha Mulungu yo yetumile zizi. Naluno wakwilumba no kwidunhumula, akuno wakutya,

¹⁰ “I matofali gose ge mazengo, gakondya kugwa hasi, ninga nase cogazenga kanyhi majinji ge mabwe! I micici ye mibici ye mikuyu nha yatemangwa, ninga nase cozenga ne mibici ye mihagata.”

¹¹ Holeka Muwaha Mulungu kowakulujiza walugu wawo wawahome.

¹² Nawo Waashuli kono lubavu lwa kucilima, ne Wafilisiti kumwezi, wose wahame milomo yawo, wawamele Waisilayeli. Ninga hamba nhavivyo likuwo lyo Muwaha Mulungu, si linadumuka yaye, nayo vyo yakali yagoloye du muwoko wakwe ho yalipicize.

¹³ Nawo wanhu wa Isilayeli, wakali du sinanena, hamba yiwe Muwaha Mulungu we mihanga yakondya kuwalipiciza, ninga hamba si wakumuwuyila ng'o.

¹⁴ Ninga mwi'zuwa linji, u Muwaha Mulungu kolowalipiciza i walongola we Waisilayeli hamonga ne wanhu wakwe. Kolowadumula mutwe no mucila.

¹⁵ I wakombi ne wanhu watambule, wawo wo mutwe. Nawo mucila, wo wawizi, wono wafundaga zo wulambi!

¹⁶ Nawo wono wakuwatonga i wanhu wawa, wakuwajiliza nzila, nawo wono wakulongozwa nawo nhavivyo wakwajiliza.

¹⁷ Holeka nayo Muwaha Mulungu, hamba si kowaleka wazelelo wapone yaye. Kanyhi hamba si kowawonela lusungu i wacekulu wafwile, hamonga ne wana wono wasina walezi wawo. Hambi i wanhu wose nha weza wahodanji kanyhi wabi. Sunga na zose zono walongaga, vyo 'mbi du. Hamba nhavivyo likuwo lyo Muwaha Mulungu si lyoduma yaye, ninga muwoko wakwe wowa wugoloywe du ho yalipicize.

¹⁸ No wubi we wanhu, wunyanyaga nha moto, wono wutakamizaga masanzu ne mamivya. Wutakamizaga nha mbago yono yikolelezwe moto, nawo wukwaka, ne malambi gayo gapunaga kucanyha gepalinjile nhe 'sumbili lya lyosi.

¹⁹ Alu, na vyono Muwaha Mulungu we mihanga yakoligwe likuwo, holeka no wulipicize wakwe wukutakamiza nha moto mu yisi yose, no kuwongomeza wanhu. No munhu wo wose kokwimanyilila mweneco.

²⁰ Ne wanhu wose wa mu yisi yose munhu wo wose, kosuma kukwepula no kulya cinhu co cose cono yakuwona, soko du hono ciwe cikuwa kuligwa. Ninga hamba nhavivyo, si wakwiguta yaye. Sunga nhondo wowa kulya sunga ne wana wawo.

²¹ Nawo i wanhu wa Manase na wa Efulayimu, wokwihoma weneco wose. Ninga kanyhi hanyuma, wokwilunza wayihome Yuda. Ninga hamba nhavivyo, likuwo lyo Muwaha Mulungu si lyoduma, yakali yawugoloye muwoko wakwe du ho yalipicize.