Isaya 66 - Luganuzi Luswanu Kuli Wanhu Wose 2002

U Muwaha Mulungu yakugaling'aniza Makungugo

¹ Muwaha Mulungu yakutya nhavi, “U wulanga lye 'goda lyangu, nayo yisi, wo wukanyago we magulu gangu. Alo ho monzenjela kaya yono yinha wule, yono ane nosuma kwikala, hamba hayi hene hono ane nosuma kwinjila nikale mumo?

² Nha yo nene mono nayiwumba yinze yose! Kanyhi mono nendezwaga ne wanhu wono wanenile, kanyhi wenenenyhezi, wono wanyogopile, wena ne cihuliko kuli'ne.

³ “Hambi i wanhu nha wetumaga nha vyono wendile weneco. Hambi wene nha wakuwona co cimonga du, hono mu makumbiko gawo wawulaje ng'ombe hamba munhu, hamba wawulaje ngholo, hamba kubena singo ye 'mbwa, hamba hono walavye cilavywa co wusaje, hamba sakami ye magubi, hamba na hono walavye wuvumba, hamba wavitogoze vihwani. Heya! Wene wendile zinzila zono ziwuhodangaga wuhembi.

⁴ Holeka nane lu, nowaletela magazo gono wakugogopa, vyono hasina hamba yunji, mono yamhitula lono nalongaga nawo, hamba mono yahuliciza zangu lono nghulonga. Langa wene wakahagula yo wula cihuliko kuli'ne no kwituma zimbi du.”

⁵ Alu muhulicize zono Muwaha Mulungu yakulonga, anye mono mumuhulicile kanyhi mumogopile, yakutya, nhavi, “Alu anye vyono muli wehuwilwa kuli'ne, holeka wanji wa muli nyenye wakumusulenyi, ninga hamba nhavivyo, si wosuma kumunozenyi cinji yaye. Wene wekaliye zo kumusekanjenyi du, wakutya, ‘Ale ta, Muwaha Mulungu yalajile zo wuwaha wakwe yamuponyenyi, nase cimuwonenyi musangalaye.’ Ninga wene wakolwa cevu!

⁶ Ne lizozo lilyo lyono mukulihulika mwi'kaya, hamonga ne lizi lya mu Nyumba yo Mulungu, lyo lizi lyo Muwaha Mulungu yakuwalipiciza i walugu wakwe!

⁷ “Ne likaya lyangu lyono lyelile, lihwanile mucekulu mono yakulela mwana nhinicizo, hamba kuwuwona wusungu we nghunga yaye.

⁸ Wulenyi, yunji wa muli nyenye yaziwene hamba kuzihulika zono zinha zizi? Wulenyi, hasina likungugo lyono lyalelwa mwi'zuwa limonga ng'o? Holeka ne Sayuni si yojendelela kuwa mu magayo vilo vinji, lono likungugo lipya likali nalelwa.

⁹ Mulece kwihwesa nha vyono ane nowaletela nghunga yo lusawo i wanhu wangu, kanyhi ho ndece kuwapela vilungo vyo kusawila.” Muwaha Mulungu vyo yakutya.

¹⁰ Musangalalane hamonga na Yelusalemi, musangalalane nayo. Nanye wose mono mulyendile likaya lili, musangalale hamonga nalyo luno, anye wose mono mwalilililaga!

¹¹ Nanye molomota muno wumoteswe walyo, nha vyono mwana mudodo kamotaga lono yakongha matombo go nyina.

¹² Nayo Muwaha Mulungu yakutya nhavi, “Ane nomupelenyi wumoteswe we cibitilila. Ne sawo ye makungugo yomuhulumilenyi nhe 'kolongo lyono si linyalaga yaye. Nanye mowa mwihwanile nho mwana mudodo, mono yakukocwa no nyina, kawa kukumbatilwa mu mawoko no kutendelwa ko wendo wuwaha.

¹³ Nane nolomusindamicenyi mu Yelusalemi nha vyono nyina yo munhu kamusindamikaga mwanagwe.

¹⁴ Nanye kolo mukuziwona zizi zeza kwijela, molowa na nyemo, nazo zolomupelenyi vilungo no wusangalale. Nanye lulo nhondo ho molomanyila nha vyono, ane no Muwaha Mulungu yo niwapelaga wutazi wose wono wali cihuliko kuli'ne, langa niwakolelwaga likuwo i walugu wangu.”

¹⁵ Langa ta! U Muwaha Mulungu kolokuza nha moto. Kolokuziza mu mabawa ge civulavumbi, yawaling'anize wose wono yawakoleywe likuwo.

¹⁶ Nayo kolowalipiciza ko moto no mumaje, i wanhu wose wa mono'nze, wono yakuwawona wasutyi, na wenji wolowulagwa.

¹⁷ U Muwaha Mulungu yakutya nhavi, “Alu ndumilizo yawo yeza yili behi, kuli wose wono wakwiyavufya weneco so wuhembi we wanhu wono si wamumanyile Mulungu, wono wabitaga mu zibusitani zisiwanulwe, wawo wono walizaga nyama ye magubi na ye magule, hamonga ne zindigwa zinji zinji ze liwifyo.

¹⁸ Ninga nane nigamanyile mahweso gawo, hamonga ne metumo gawo. Holeka nane nghuza niwakonghole i wanhu wose we makungugo gose. Nawo kolo wekonghola hamonga, baho ho wovimanyila vilungo vyangu vyono vinha.

¹⁹ Baho ho womanyila vyono yo nene du mono nghuwalipiciza. Ninga hamba nhavivyo, nolowasigaza wanji muli wene, niwatume kuli makungugo na ku zi'si zo kutali, kono wakali nazihulika zo lukumyo lwangu, hamba kuziwona zo wuwaha wangu ne vilungo vyangu. Ku zi'si za Sipeyini, Libiya, na Lidiya, wabite hamonga ne wanghula wo kuguma no wupinde. Wabite sunga ko ku Tubali na ku Gilisi. Wabite wakanze zo wuwaha wangu ku zinghungugo zizo.

²⁰ Nawo kolo wabita kuko, wowagomola kono kaya i wanyawusi wayenyu, ku wulawa mu makungugo, wawe nha cipegwa kuli'ne. Wowaleta sunga wawafise mwi'tunda lyangu lyono lyelile, mu Yelusalemi, wawapacize mu zifwalasi, na mu zinyumbu, na mu zingamiya, na wanji mu matuka go wulugu, na wanji mu magali go kukwegwa, nha vyono Waisilayeli waletaga mu viya vyono vyelile, i vilavywa vyo wusaje mu Nyumba yo Mulungu.

²¹ Nane nolowanoza wanji wawe Wakohani, na wanji wawe Walawi.” Vyo nghutya ane no Muwaha Mulungu.

²² “Nha vyono wulanga wupya ne yinze mhya vyokwikala cibitilila so vilungo vyangu, ale nhavivyo sunga ne zindelo zenyu hamonga ne litagwa, navyo vyokwikala cibitilila.

²³ Ne wanhu wose we makungugo gose, wowa kuza kuhemba nene ku Yelusalemi, mu zisikukuu zose ze ndawo yo mwezi, na ze Sabato, vyo yakutya u Muwaha Mulungu.

²⁴ “Nawo lono wakuwuka mumo, woloyiwona mivimba ye wanhu wono wambezaga, ne zinyongololo zono zowa kuyilya mivimba yawo, si zilafwila lukulu, no moto wono wolowa kuwanyanya, hamba si wolozimila lukulu. Nawo wolowa iwifyo hali wanhu wose.”