Isaya 65 - Luganuzi Luswanu Kuli Wanhu Wose 2002

U wulipicize wo Mulungu kuli Wabedegazi

¹ Muwaha Mulungu yakutya, nhavi, “Ane nali niwikanize niwapitule wulombe wawo wanhu wangu, ninga nawo hamba si wakulomba yaye. Nali niwikanize wanondole wambone, ninga nawo hamba kujela bwete kunondola. Sunga ne likungugo nalyo lyono si lyasaka kunomba yaye, hamba niwe 'ne nali niwikanize nhondo zose niwapitule nitye, ‘Ane yone nili baha, nane nomutazenyi.’

² Nane nha niwikanize du nhondo zose ho niwabocele wanhu wangu wono wasina cihuliko, kanyhi wendile kwituma zimbi nha vyono wendile weneco, no kubita kono wendile.

³ Kanyhi wasina hamba cevu yaye lono wakunghoza likuwo. Hambi nha wendile kulavya makumbiko ge wanhu wono si wamumanyile Mulungu mu zibusitani zisiwanulwe, hamonga no kufusa wuvumba mu vikumbicilo vye wanhu wono si wamumanyile Mulungu.

⁴ Na mu mapango ge cilo, wawa kubita mu vitenjelo na mu mapango, wawa kuwuza mahweso kuli myuhe ya wono wafwa. Wawa kulya nyama ya ngubi, no kung'wa muhuzi we nyama hanza-hanze ne mboga, yono mutelece mu wulawa mu nyama, yono ndavye mu makumbiko ge wanhu wono si wamumanyile Mulungu.

⁵ Hanyuma, wawa kuwalonjela wanhu wanji wakutya, ‘Mulece kucisejelela behi, hambi 'se nha si cinojeye cipamizwe na nyenye, hambi 'se nha celile!’ Holeka nane, si nosuma kwikalana ne wanhu we liwala lilyo. Ne likuwo lyangu kuli wene, nha lyacile kotya moto wono si wuzimaga.

⁶ “Nane nakondya kuwawikaniziza wulipicizwe wawo, no wuling'anizwe wawo, wakondya kwandikwa. Nane hamba si nozisemwa yaye zono wetumile, ninga langa nowalipiciza du,

⁷ ku soko yo wubi wawo, hamonga no wubi we walezi wawo. Lanje vyono wakufusa wuvumba mu vikumbicilo vye wanhu wono si wamumanyile Mulungu, vyono vizenje mu vigongo visiwanulwe, no kunhovulanga. Holeka nane, nowalipiciza du nha vyono genha metumo gawo gono gapuluta.”

⁸ Muwaha Mulungu yakutya nhavi, “Hambi nha hasina munhu mono kazihodangaga zi zabibu ziswanu, langa waziminyaga no kuzinoza divayi. Ale yo nhavivyo, nane hamba si nowongomezeza lukulu wanhu wangu wose ng'o, langa nowasigaza wose wono wakunyitumamila.

⁹ Nowamotya i Waisilayeli we nghungugo ya Yuda, ne wana wawo, woloyihala yisi yangu ye matunda. I wanhu wangu wahagulwa, wono wakunyitumamila, wawo wo wolokwikala mumo.

¹⁰ Nawo wolowa kuhemba nene, ne zingholo zawo hamonga ne zing'ombe zawo, wolozilongoza wazitegule ku wudimo ku yisi ya Shaloni yo wuhihi ku lubavu lwa kumwezi, na mu nyika ya mwi'lolo lye magayo, ku lubavu lwa kucilima.

¹¹ “Ninga holowa no wisimajile kuli'nye mono mukundeka, no kuyibedegala Sayuni, i litunda lyangu lisiwanulwe, muwa kumuhemba Gadi na Meni, i milungu yono yisina cambuzi co cose, yono yiwiciywe wongomele.

¹² Nanye vyo mokongomela nhavivyo mu nzila yo kuwulagwa, vyono lono nali kumucemenyi, hamba si mwasaka kunyidika yaye, hamba kuhuliciza lono nghulonga. Hambi nha mweyihagulila nyo weneco muwe musina cihuliko kuli'ne no kwituma zimbi.

¹³ Ninga nane nghumulonjelenyi nha vyono, wose wono wena cihuliko kuli'ne no kuhemba nene, wawo wolotuga ndigwa nyinji hamonga na co kung'wa. Ninga anye molowa muli nzala kanyhi mukaluce. Wene wolowa wasangalaye, ninga anye molokozwa cevu.

¹⁴ Wene wolokwimba so nyemo, ninga anye mololila so wukalale wa mu nhumbula.

¹⁵ I wanhu wangu wahagulwa, wololitumamila litagwa lyenyu nhe lijito. Nane no Muwaha Mulungu, nomuwulajenyi wose. Ninga nolowacemela litagwa lipya wawo wono wohulika'ne.

¹⁶ No munhu wo wose wa mu'si, mono kosaka wumoteswe, kololomba yapegwe wumoteswe no Mulungu Mwihuwilwa. No munhu wo wose, mono kokwilahiza, kolokwilahiziza mwi'tagwa lyo Mulungu Mwihuwilwa. Ne magazo ga mu vilo vye katali, gose golomalika no kugasemwa.”

I viwumbwa vipya

¹⁷ Muwaha Mulungu yakutya nhavi, “Nghuwumba yinze mhya, no wulanga wupya. Ne zinghani zinongozi, si zokumbucilwa kanyhi hamba kwihweswa yaye.

¹⁸ Holeka 'lu musangalale no kuwona nyemo cibitilila muli yono nghuwumba. Langa ta! Yelusalemi mhya yono nghuwumba, yolowa yimemile nyemo, ne wanhu wayo wolowa wasangalaye muno.

¹⁹ Sunga na nene no mweneco nolowa memile nyemo ku soko ya Yelusalemi, hamonga ne wanhu wayo. Hambi nha molowa musina cililo mumo, hamba wulondola wutazi.

²⁰ Ne wana wagalika, si wolowa kufwa yaye lono wakali wadodo. Ne wanhu wose wolowa kwikala vilo vinji mono'nze. Na wono wokwikala sunga waficile myaka yigana limonga, wowa kuwalwa nha wazelelo du. Na munhu hono yafwe yakali si naficila myaka yiyo, cowa co citanjilo nha vyono ane yo nene mono nimulipicize.

²¹ Ne wanhu wolokwizenjela weneco zikaya no kwikala mumo. Munhu wo wose si kolokwinjila mu zikaya zizo. Kanyhi wolohadika zabibu no kuyisangalalila divayi yayo. Ne divayi yiyo, hamba wanhu wanji si woloying'wa yaye.

²² Wanhu wangu wolowa kwikala vilo vinji mono'nze nhe mabici. Kanyhi wolosangalalila vinhu vyono wolowa kuvituga mu milimo yawo.

²³ Ne milimo yawo yose yolowa na wumoteswe, ne wana wawo, si wolokongomezwa yaye. Nane nolowamotya hamonga ne wana wawo, mu vilo vyose vyono vikuza.

²⁴ Nane nowa kuwapitula u wulombe wawo kuli'ne na lono wene wakali si nadumya wulombe wawo.

²⁵ Na mu vilo vivyo, maminzi ne zingholo, zolowa kudimila hamonga, nago masimba, golowa kulya mahanze nhe zing'ombe, nago mazoka, golowa gasina citamisi cinji kanyhi. Na mu Sayuni, litunda lyangu lisiwanulwe, molowa musina kanyhi citamisi cinji co cose, hamba zimbi zo zose.”