Isaya 64 - Luganuzi Luswanu Kuli Wanhu Wose 2002

¹ Alo socici lo si wukuwudemula wulanga, wutime hasi? Ne matunda gali gakuwone, nago gacicime so woga.

² Gali gacicime nhe malenga gono matelece mu moto mukali. Holeka wuze wilajile vilungo vyako kuli walugu wako, wuganoze makungugo gacicime ha mwande yako!

³ Hambi mu madaha ganji lono waziza, wuketuma zimbaha zono si cali cizilanjiliye, i matunda gakawona gakacicima so woga.

⁴ Kanyhi hasina hamba munhu monga mono yamuwona, hamba kuhulika zo Mulungu yunji wo wose mono yehwanile gwegwe, mono ketumaga metumo gono genha gaga, kuli wose wono wamwitumbiye.

⁵ Kanyhi kuwabocelaga wose wono wasangalilaga mu wituma ziswanu, wono wakumanya vyono, agwe wukuwahila wetume zo wuhile wako. Nagwe wali weza kucikolelwa likuwo, nase cikajendelela kwituma wubi. Na ku soko ye likuwo lyako liwaha, nase cikajendelela du kwituma zimbi ku wulawa katali.

⁶ Nase wose cili wanyo wubi, sunga ne metumo getu gono gakwijela nha maswanu, gose gatipiye du. Na ku soko yo wubi wetu, ceza cihwanile nhe mahamha gono ganyalile gakuputwa no kupemheluswa ne mbeho.

⁷ Heza hasina hamba yumonga mono yakukulomba, hamba mono yakulondola wutazi kuli'gwe. Hambi nha wihundice hali'se, kanyhi wakondya kucileka ku soko yo wubi wetu.

⁸ Ninga 'gwe go Muwaha Mulungu, agwe yo gwegwe du sogo yetu. Ase cihwanile lilongo, nagwe wihwanile u muwumbi we zinyungu. Agwe yo gwegwe mono waciwumba,

⁹ holeka dedede wulece kucikolelwa likuwo lyako, hamba kuwukumbucila wubi wetu cibitilila. Hambi'se nha cili wanhu wako, holeka cikukunena wuciwonele lusungu.

¹⁰ Alu lanje, makaya gako i masiwanulwe, vyono gehwana nyika, nayo Yelusalemi yaweza yitongo lyono lilecigwe du.

¹¹ Nayo Nyumba yako yo wuhembelo yono yasiwanulwa, i hanhu hono hali haswanu muno, hono i walezi wetu wakukumizyaga gwegwe, alu hakondya kunyanywa no moto. Ne hanhu hose hono cali cihendile muno, alu geza matongo du.

¹² Alu na muli zizi zose, agwe ho kojendelela kwiyimila du? Alu mwene, ho sikocitaza ng'o, ho kocileka cijendelele kutamiswa mu nghango yono hamba si cosuma kuyikangalila?