Isaya 62 - Luganuzi Luswanu Kuli Wanhu Wose 2002

¹ Nane nolonga du ho niyisikamye Yelusalemi. Hamba si nonyamala yaye, sunga kolo yakondya kuponywa, no wukombozwe wayo weza kumulika nha tala mu mapango ge cilo.

² Gwe Yelusalemi, i makungugo gowuwona wiling'ano wako, Ne watemi wayo, nawo wowuwona lukumyo lwako. Nagwe kocemwa litagwa yipya, i litagwa lyono kowa wapegwa no Muwaha Mulungu mweneco.

³ Nagwe kolowa wuli mukumbo wo wulenzi wo Muwaha Mulungu.

⁴ Na baho, hamba si kocemelwa lukulu kanyhi “Mulekwa.” Hamba ne yisi yako wayitye “Mucekulu Mulekwa.” Langa litagwa lyako lipya lyolowa “U Mulungu Kendezwa Nayo.” Nayo yisi yako yolocemwa “U mutolwe Musangalavu.” Hambi u Muwaha Mulungu nha kendezwa nagwe. Nayo Muwaha Mulungu kowa nha yo mulume we yisi yako.

⁵ Kokwihwana nho muzelelo mono yakumusola muhinza mono si yamanyile walume, yawe bibi halusi wakwe. Holeka nagwe, yuyo mono yakuwumba, yuyo yo mono kokutola agwe. Kanyhi nha vyono bwana halusi kendezwaga na bibi halusi wakwe, Ale nhavivyo no Mulungu wako nayo vyo kokwendezwa nagwe.

⁶ Gwe Yelusalemi, nane nghuwiciye walindilizi mu majinji gako. Nawo hamba si wowa kunyamala misi ne cilo. Langa wowa kumukumbuciza Muwaha Mulungu zo wihuwizo wakwe. Hamba si womuleceleza yasemwe yaye.

⁷ Kanyhi hamba si womuleka yaceheze yaye, sunga kolo yakondya kuyigomolela Yelusalemi lilumbo lyayo. No kulinoza liwe yikaya lyo lukumyo mono yinze yose.

⁸ Muwaha Mulungu kakondya kwihuwiza ko wilahize, nayo kowufisiliza wihuwizo wakwe kwe vilungo vyakwe. “Ne walugu wako hamba si wowulila lukulu no wuhemba wako. Ne wajenzi nawo, hamba si woying'wela lukulu ne divayi yako.

⁹ Langa gwegwe go mweneco du, mono wuhadice no kududula wuhemba, yo gwegwe mono kowulya no kumukumya Muwaha Mulungu. Kanyhi gwegwe mono wali kuzilanjilila zabibu hamonga no kuzidudula, Yo gwegwe du mono koying'wa yiyo divayi mu luwa za mu Nyumba yangu.”

¹⁰ Holeka 'lu anye wanhu wa mu Yelusalemi, ale mulawile kunze ye likaya, mukayinozeleze nzila yono woyikola, i wanhu wono wakuwuya kono kaya! Muyinozeleze nzila mbaha, mugawuse mabwe gose! Muwicile ne citanjilo, makungugo gose ho gamanye,

¹¹ Nha vyono Muwaha Mulungu yakuwalonjela wanhu wose wa mono'nze yakutya, “Ale, muwalonjele i wanhu wa mu Yelusalemi nha vyono Muwaha Mulungu yakuza kumuponyenyi, Yakuwaleteleza hamonga ne wanhu wono yakondya kuwaponya.”

¹² Nanye lulo molocemwa “Wanhu wo Mulungu mono Yelile. I wanhu wono Muwaha Mulungu yawakomboze.” Nayo Yelusalemi yolocemwa, “Likaya lyono Mulungu yalyendile. Likaya lyono Mulungu si yalileka yaye.”