Isaya 61 - Luganuzi Luswanu Kuli Wanhu Wose 2002

Luganuzi luswanu lo Wukombozi

¹ Muwaha Mulungu, kamemya'ne no muhe wakwe. Kasiwanula ho niwaganulile luganuzi luswanu i waciwa, niwaponye wono wadejepe mu nhumbula niwanzize zo wulecelwe wawo awalya i wahamywa, no wulecelwe wa kuli wafungwa mu jela.

² Kanhuma ho niwalonjele vyono lipango lyafika, lyono u Muwaha Mulungu kowaponyezya wanhu wakwe, no kuwasumila kuli walugu wawo. Kanhuma ho niwasindamice wono wali mu wusungu.

³ Ho niwasangalaze no kuwapela nyemo wanhu wose wono wali mu Sayuni, wono wali wali mu wusungu no wukalale wawuce mu wukalale, wembe lwimbo lo lukumyo. Kanyhi wawe nhe mibici i mihadikwe no Muwaha Mulungu mweneco. Kanyhi wawe kwituma zo mugoloka. Nayo Muwaha Mulungu ho yakumizywe muli zono yetuma.

⁴ Kanyhi wologazenga ne makaya gono gali gakondya kuwa matongo.

⁵ Nye nyo wanhu wangu, i wajenzi wo wolomwitumamilenyi kanyhi wo wolowa wo wadimi we mitugo zenyu, no kumulimilenyi ne migunda yenyu, hamonga no kuyilanjilila ne migunda yenyu ye zabibu.

⁶ Nanye molowa mumanyice vyono muli wakohani wo Muwaha Mulungu i wetumami wo Mulungu wetu. Kanyhi moloyisangalalila sawo ye makungugo, akuno mukwilumba nha vyono yeza yenyu nyenye.

⁷ Ne cevu cenyu colowucila lukulu. Hambi lu nha molowa mwikaye mu yisi yenyu nyo weneco. Ne sawo yenyu yolokonjelezeka kali kejete. Ne nyemo yenyu yolowa ye cibitilila.

⁸ Muwaha Mulungu yakutya nhavi, “Ane nyendile ze ling'ani, kanyhi nizisulile zo wuhizi na zo wiwonezi. Nane nowahumbiliza wanhu wangu ko wihuwilwa. Kanyhi nonoza nawo cilagane ce cibitilila.

⁹ Kanyhi wolowa wamanyice muno muli makungugo. Na muli wose mono kowawona, komanya nha vyono wo wanhu wono nakondya kuwamotya.”

¹⁰ Yelusalemi yisangalaliye muli zono Muwaha Mulungu yazitumile. Yehwana nha bibi halusi mono yenozeleze yabite ku wutozwe. Mulungu kakondya kuyivwika Yelusalemi mwenda we mhonelo no wusume.

¹¹ Nha vyono zimbeyu zicindikaga ziwa kuwiluka, ale nhavivyo no Muwaha Mulungu nayo vyo kowaponya wanhu wakwe. Ne makungugo gose gomukumya mwene.