Isaya 60 - Luganuzi Luswanu Kuli Wanhu Wose 2002

U lukumyo lwa hanyuma lwa Yelusalemi

¹ Gwe Yelusalemi, wusinhuce wumulice nhe lizuwa, hambi nhojo yo Muwaha Mulungu nha yakubulilila!

² I makungugo ganji gogubikwa no wutitu, ninga agwe, u wuzelu wo Muwaha Mulungu wokubulilila, ne nhojo yakwe yowa muli'gwe.

³ Ne makungugo gose gokwejelwa ku wuzelu wako Nawo watemi wokwegwa ne lizuwa lyako lipya.

⁴ Alu ta, wupituce wulanje ku zimbavu zako zose wuciwone cono cikuza, hambi i wanhu wako wose nha weza kwikongholela kono kaya! Nawo i wanago we cilume, wowuya ku wulawa ku zi'si zo kutali, nawo i wanago we cicekulu wolowa wadinghuywe nhe wana wadodo.

⁵ Nagwe koloziwona zizi, ko wusangalale wuwaha Ne nhumbula yako yolomema nyemo hamonga no wucicime. Ne sawo yose ye makungugo gose, kololetelwa gwegwe. Sunga ne wugoli wawo wose wolokuziza gwegwe ku wulawa ku nhumbi ye lilenga.

⁶ Sunga ne matewa mawaha ge zingamiya nago golokuziza gwegwe ku wulawa ku Midiyani na ku Efa. Zolokuza ku wulawa Sheba, zikuletele zahabu hamonga no wuvumba. Ne wanhu wawo, wose wologanula ze nghani swanu yono Muwaha Mulungu yetumile!

⁷ Kanyhi wolokuletela ne zingholo zose za ku Kedali hamonga na za ku Nebayoti, wuzitumamile so makumbiko, zilavywe mu cikumbicilo, zimwendeze Muwaha Mulungu. Nayo Muwaha Mulungu koloyinoza Nyumba yakwe yo wuhembelo yiwe no lukumyo luwaha kuciza vyono yali.

⁸ Alo ngalawaci zizi nyinji, zono zikuza ziyagaye mwi'lenga nhe mavunde, kotya nziwa zono zikuwuya mu manhuli gazo?

⁹ Zo ngalawa zono zikulawilila mu ma'si go kutali zikuwagomola i wanhu wo Mulungu kono kwawo. Wakuza wena hamonga ne fweza na zahabu ho walipele lilumbo litagwa lyo Muwaha Mulungu. U Mulungu mono yelile wa Isilayeli, mono yaganoza makungugo gose, gawapele cogopo i wanhu wakwe.

¹⁰ Muwaha Mulungu yakuyilonjela Yelusalemi yakutya nhavi, “I wajenzi wo wolokuzenjela majinji gako, nawo i watemi wawo, wolokwitumamila gwegwe. Hamba yiwe ane nakulipiciziza mwi'kuwo lyangu, ninga aluno nokulajila zo wendo wangu no lusungu lwangu kuli'gwe.

¹¹ Ne milango yako yolowa kwikala yili mwazi, i watemi we makungugo ho wasume kukuletela zisawo zawo.

¹² Ne makungugo gono si gokwitumamila gwegwe, ane nogongomezeza lukulu.”

¹³ “Ne mibici yose ye minanasi, na ye minghulwa, hamonga ne mibici yinji yinji, hamonga sunga ne mibici miswanu muno yono yikulawa mu mbago ya Lebanoni, yololetwa yose, ho yihanozeleze viswanu ha Yelusalemi. Yiyinoze Nyumba yangu yo wuhembelo yiwe swanu, no kulinoza likaya lyangu liwe no lukumyo luwaha.

¹⁴ Ne wana we cilume we wanhu wose wono wekalaga wakumwiwonelenyi, wolomuzizenyi nyenye, wamwinamilenyi ha mwande yenyu, wakulajila ze cogopo cawo kuli'nye. Sunga na wa walya wose wono wekalaga wakumubedegalenyi, wolokuza wafugame ha mwande yenyu. Nawo wolomucemenyi watye, ‘Likaya lyo Muwaha Mulungu,’ ‘Sayuni, likaya lyo Mulungu mono yelile wa Isilayeli.’ ”

¹⁵ “Na ku wulawa lulu, hamba si kololecelwa lukulu kanyhi; hamba kusulwa yaye ng'o, hamba si kolowa kanyhi likaya yiciwa lyono lihodanjice yaye. Hambi ane nha nolokunoza wuwe ne lilumbo yiwaha kanyhi wuwe wunojezize wuwe hanhu hono hamemile nyemo cibitilila na cibitilila.

¹⁶ Nago makungugo gose, hamonga ne watemi wawo, wose wokucelelela muno muno wowa nho nyina yo munhu vyono kamukocaga mwanagwe. Nagwe baho ho komanyila nha vyono ane no Muwaha Mulungu nakuponya. Na vyono Mulungu we vilungo wa Isilayeli yo Mukombozi wako.”

¹⁷ “Nane nolomupelenyi zahabu yihomele shaba nayo fweza ne shaba, vihomele cuma ne mabici. Naco cuma cihomele mabwe. Ne watemi wenyu, nawo hamba si wolomwiwonelenyi yaye. Hambi ane nha nolowanoza wateme kwe ling'ani no mulamu.

¹⁸ Ne mazi go wuwulaji, hamba si golohulikwa kanyhi yaye. Hamba wongomezwe si woloyiziza yisi yenyu kanyhi yaye. Hambi ane nha nolomudimenyi kanyhi nolowa nili 'jinji lyo kumucitilenyi. Nanye molonghumya 'ne, vyono nakondya kumuponyenyi.

¹⁹ “Kanyhi ne lizuwa hamba si lyolomumulicilenyi mu misi, hamba mwezi ku cilo. Hambi ane no Muwaha Mulungu, nha yo nene mono nolowa wuzelu wenyu cibitilila. Wuzelu wo lukumyo lwangu wo wolomumulicilenyi.

²⁰ Ne vilo vyenyu vyo wusungu, vyoloduma, ane no Muwaha Mulungu yo nolowa wuzelu wenyu cibitilila, mono nikalaga cibitilila si nhe lizuwa no mwezi.

²¹ Ne wanhu wako wolowa kwituma zo mugoloka, nane nowapela yisi cibitilila. Hambi nha yo nene mono nawawumba no kuwanoza, ho ndajile wuwaha wangu kuli wanhu wose.

²² Holeka ku soko yiyo, sunga ne mhuga ndodo ya muli'nye kanyhi yono yisoceye, yolowa nghungugo mbaha muno kanyhi yili vilungo kolo vipango vyayo vyafika. Nane nozinoza zizi zijele mbela mbela, ane no Muwaha Mulungu!”