Isaya 6 - Luganuzi Luswanu Kuli Wanhu Wose 2002

Mulungu yakumucema Isaya yawe Muwizi

¹ Mu mwaka, lono yafwila mutemi Uziya, ane nghamuwona Muwaha Mulungu, yali yekaye mwi'goda lyakwe lyo Wuwaha lya mucanyha, yali yali mwi'lumbo no lukumyo. Ne vivwalo vyakwe vyo wutemi, vyali, vitandaye hose mu Nyumba yo Mulungu.

² Kanyhi hali howali Wamalayika wono wali wemile wamupilime. Ne Wamalayika wawo, wose wali wena mabawa mutandatu-mutandatu. Mabawa mejete wegubikaga wusu, ne mejete wegubikaga i miwili yawo, na ganji mejete go wagulucilaga.

³ Ne Wamalayika wawo wakawa wakwimba wakwiboceza, wakutya, “Welile, welile, welile! Go Muwaha Mulungu we mihanga. Ne yinze yose nha yimemile nhojo yako.”

⁴ No wimbe we mazi gawo, wukawusinjisa no musinji we Nyumba yo Mulungu. Ne Nyumba yo Mulungu yikamema lyosi.

⁵ Nane hobaho nghawa kutya, “Woyi hee! Nha najilila! Hambi nghani zose zono nongaga mu mulomo wangu, nha ziwezaga 'mbi du, nane cikalane hamonga ne wanhu wono wekalaga wakulonga makani mabi du. Ninga nane luno ho nakondya kumuwona Mutemi, u Muwaha Mulungu we mihanga!”

⁶ Hobaho yumonga wa muli wamalayika wa walya, yakaguluka, yakawa kunyiziza, akuno yebate no mwibato mu muwoko wakwe, likala lyono lyakaga moto, lyono yalisola mu cikumbicilo.

⁷ Yakamhamiza mu mulomo wangu ne likala lilyo, yakatya, “Alu vyono likala lili lyakupamiza mu mulomo wako, hodu wakondya kuwusizwa masutya gako, kanyhi wanenelwa no wubi wako.”

⁸ Hanyuma ya zizo, nghahulika Muwaha Mulungu yakutya, “Alu, nomutuma nani? Hamba nani mono kobita ku soko yetu?” Nane nghamupitula nghatya, “Nili baha! Wunhumaje nene.”

⁹ Nayo yakanyitya, “Ale wubite, wukawalonjele wanhu wutye, ‘Hamba muhulicize muno, ninga si mokwizuka yaye. Na hamba mulanje muno, ninga si mosuma kuzimanya zono zikwijela yaye.’ ”

¹⁰ Hanyuma kanyhi yakanyitya, “Wuyinozaje mitima ye wanhu wawa yiwe mizito, ne makutu gawo gawe ciziwi, ne meso gawo gawe cibofu, ho walece kuwona, hamba kuhulika, hamba kwizuka kose. Hambi hono wawone, wahulice, no kwizuka, nha wombuyila niwaponye.”

¹¹ Nane nghawuza nghatya, “Gwe Muwaha Mulungu, alu zizi zokwijela nili?” Nayo yakapitula yakanyitya, “Zizino zokuza kolo makaya gose gekala matongo gasina wanhu, sunga kolo zikaya zekala bwete, ne yisi yalekwa wuciwa wuwaha.

¹² Nane nowahamya wanhu wose niwategule kutali muno, niyilece yisi yose nyhiwa yisina wanhu.

¹³ Hamba yiwe mu wanhu yikumi, yikumi, yasigale munhu monga monga, mu yisi, yuyo nayo kokongomezwa du. Kokwihwana lisici lyo mubici wo munghola lyono lyakondya kutemangwa.” (Lisici likuwa nha wo mwamulizo mupya we wanhu wo Mulungu.)