Isaya 59 - Luganuzi Luswanu Kuli Wanhu Wose 2002

U muwizi yakuwuhosa wubi we wanhu

¹ Ninga mulece kwihwesa nha vyono Muwaha Mulungu musocele, mono si kosuma kumuponyenyi, hamba lunji yali ciziwi mono si kosuma kumuhulicenyi lono mukumucemeleza mukusaka wutazi!

² Heya, ku soko yo wubi wenyu, holeka nayo siyakumuhulicenyi yaye. Hambi nha wubi wenyu wono wukumutemanulenyi no Mulungu lono mukujela kumuhemba.

³ Hambi anye nha muli wasutyi ku soko yo wulambi wenyu, no wugazi wenyu, hamonga no wuwulaji wenyu.

⁴ Mwendile muno kubita mu mahakama, ninga kuno ho musina ling'ani yo yose ku lubavu lwenyu. Hambi anye nha mwitumbilaga wulambi wenyu du, ho musume calo cenyu. Mwikalaga mwina mahweso go wutamisa wayenyu du.

⁵ No wihehemeze wenyu wono muwunozaga mugati yayo, wina wuwulaji, nhe magangha ge lizoka lyono lina sumu. Hono wulitule ligangha, mugati yalyo lyolawila lizoka!

⁶ Ninga wihehemeze wenyu wuwo si wuswanu yaye, kanyhi wusina cambuzi hamba cidodo bwete, wihwanile mwenda we nhandabuli!

⁷ Kanyhi anye mwikalaga mukwihwesa zimbi du nhondo zose, no kuhidimbala kuzituma. Hamba si mogopaga yaye ku wuwulaga i wanhu wono wasina masutya. Na hanhu ho hose hono mukubita, mulekaga matongo du no wuhodanjice wuwaha,

⁸ na kolo mwafika baho, hawezaga hasina kanyhi munhu mono kowa yena mulamu. Hambi nha mwitumaga zose zono si zili ling'ani yaye. Kanyhi mwinozezaga nzila yo wungwele, na hasina munhu wo wose mono kosuma kuyikola nzila yiyo, yawe mutelevu.

I wanhu wakuwunena wubi wawo

⁹ Nawo wanhu wakupitula wakutya, “Alu nhondo camanya, kumbe yo soko yono yikuleka Mulungu nayo si yakuciponya nase kuli wanhu wono wakuciwonela. Nase citumbiye wuzelu ho cisume kujenda viswanu, ninga luno nha kutitu tuku du,

¹⁰ nase luno ceza kutunduwajila nha we cibofu. Hamba mu misi mugati, ase vyo cikwikobala du nha kotya cilo, kotya nha cili mu citi ce yisi ye wafu.

¹¹ Cimemile woga no wuhangawe. Cina wuhile no Mulungu yaciponye mu wiwonelwe wuwu hamonga ne mabi gaga, ninga hasina hambe'pitulo bwete.

¹² “Gwe go Muwaha Mulungu, masutya getu gono cikusutizye nha menji muno. No wubi wetu wukucihomelela. Nase cigamanyile masutya getu gose.

¹³ Cakubeza, cikakulema, si casaka hamba no kukutyatya bwete. Kanyhi cikuvumila nha vyono mbeka cawewonela wanji, kanyhi cikakuleka. Mbeka mahweso getu mabi, ne zinghani zetu zose za wulambi.

¹⁴ No wuling'anizi wuswanu cawukumhila kutali, ne ling'ani yose hamba si yili muli'se yaye. Hambi i mbeka nha yigwiye mu nzila, na zo mugoloka hamba si zosuma kwinjila yaye.

¹⁵ Heya i mbeka yili hasina, na mono kalekaga zo wubi, kewonaga nha yabenile wulajilize.” Ninga Muwaha Mulungu yakondya kuziwona zizi zose, nayo hamba si yakwendezwa yaye lono yakuwona vyono hasina wiling'ano.

Muwaha Mulungu yakwiwikaniza yawaponye wanhu wakwe

¹⁶ Nayo yakwizina kuwona vyono hasina munhu hamba monga mono yakuwataziza wono wakwiwonelwa. Holeka nayo luno kokwitumamila vilungo vyakwe yawaponye, yawe no wusume.

¹⁷ Mwene kolowuvwala wiling'ano nhe koti lyo wulugu lye cisilikale, kanyhi kokwitumamila vilungo vyakwe viwe nha yo kofiya. Kolokwipiligaza muno muno ho yaviwice vinhu vyose mu wiling'ano no kugalipiciza i mabi gose gono gawatamisaga wanhu.

¹⁸ Kolowalipiciza i walugu wakwe mu nghango ya vyono wetuma, hamonga na wose wono wekaye mu zi'si zo kutali.

¹⁹ Ne wanhu wose wono wekaye ku lubavu lwa kucilima wose wolomupela cogopo, hamonga ne vilungo vyakwe viwaha. Hambi nha kolokuza nhe likolongo lyono likuhuluma nhe libeho lye vilungo.

²⁰ Muwaha Mulungu yakuwatya nhavi wanhu wakwe, “Ane nolokuza ku Yelusalemi nimudimenyi, no kumuponyenyi nyenye wose mono mukunena zo wubi wenyu.

²¹ Hambi nha nakondya kunoza cilagane nanye. Nane nakondya kumujidilenyi muhe wangu, nghamwijizenyi ne mejizo gangu ho gawe muli'nye cibitilila. Holeka ku wulawilila lulu, munojeye muhulice'ne, kanyhi muwejize ne wana wenyu hamonga ne zindelo zenyu, vyono wose wanojeye weze ne cihuliko kuli'ne ku wulawa lulu sunga cibitilila.”