Isaya 58 - Luganuzi Luswanu Kuli Wanhu Wose 2002

U wuleka kulya we mbeka

¹ Muwaha Mulungu yakutya nhavi, “Alu wuzoze kwe lizi yiwaha munghango vyono kosuma! Wuwalonjele wanhu wangu Isilayeli zo wubi wawo!

² Hambi wene nha wahembaga'ne nhondo zose, wakwiyitya vyono wena wuhile muno wo kumanya zinzila zangu, no kwibata wulajilize wangu. Wakulonga wakutya vyono wakusaka muno wapegwe malajilizo ge ling'ani, na kanyhi vyono wendile muno ho wahembe nene.”

³ Ninga kanyhi akuno wanhu wakuwuza wakutya, “Alu nhawulenyi cilece kulya zindigwa, kumbe nayo Muwaha Mulungu nha si yakuwona yaye, hamba nhawule cikale cisina ndigwa lono mwene si yakucitonganiza?” Nayo Muwaha Mulungu yakuwapitula yakutya, “Ninga i mbeka yoyi, vyono anye mwi'pango lyono mukuleka kulya, mwiyendezaga du nyo weneco, no kuwewonela wetumami wenyu.

⁴ Hambi u wuleka kulya wenyu, nha wukuwa munozenyi muwa muli wagazi, muwa kwiwanganila no kwitowa. Alu mukwihwesa nha vyono wuleka kulya we liwala lili, wonoza ane nimuhulicenyi wulombe wenyu hongo?

⁵ Hambi lono mukuleka kulya, nha mukwikapisa nyo weneco, hanyuma muwa kuyigundamya mitwe yenyu yipamiza ho hasi, yihwana nhe madulwe. Na hanyuma muwa kutandika myenda ye magunila hasi, muwa kwikupila ne mavu, hanyuma muwa kugona mucanyha yago. Alo wuwo wo wuleka kulya hongo? Nanye mukwihwesa nha vyono nane nokwendezwa ne zinghani zizo hongo?

⁶ “Ninga u wuleka kulya wono nyendile'ne wowu: Muwusize lukulu manyolo go wiwonela wanji, hamonga no wu wula ling'ani wenyu. Muwalecele wawe welecele wono wakwiwonelwa.

⁷ Muwagawile zindigwa wono wali nzala, muwalete ku zikaya zenyu i waciwa wono wasina wikalo. Muwagawile vivwalo wono wasina co kuvwala. Na kanyhi mweze wahidimbazi kuwataza wandugu zenyu.

⁸ “Na holeka baho no wuswanu wangu wong'alala muli'nye nhe lizuwa lyono likusosomoka hakali mitondo, ne zinghomele zenyu nazo zoponywa mbela mbela. Nane nowa nili hamonga nanye nhondo zose ho nimuponyenyi. Ne nhojo yangu yomucitilenyi mbavu zose.

⁹ Na lono mukulomba, nane nomupitulenyi wulombe wenyu. Na hono munyheme, nane nokwidika. “Na hono mbeka mulecele lukulu kuwewonela wanji, hamonga no wukonyeza wanhu na cidole ko kuwabedegala, no kulecela lukulu makani gose mabi,

¹⁰ na hono muwe kuwagawila zindigwa wono wali nzala, hamonga no kuwapela vyono viwakwiliye wono wanjiye, ale, wutitu tuku wono wumemile muli 'nye, wopituka wuwe wuzelu wa mu misi mugati.

¹¹ Nane nomutonjenyi nhondo zose no kumumotyenyi ne vinhu viswanu. Nomunozenyi muwe ne vilungo hamonga ne miwili miswanu yono yisina wunyoga-nyoga. Nanye mowa mwihwanile busitani yono mwajile malenga menji, yono si yonyalila kanyhi lukulu.

¹² Ne wanhu wenyu nhondo, ho wozenga kanyhi i matongo gono gali galekwa vilo vinji, wolozenga mucanyha ye misinji milongozi. Nanye baho nhondo, ho molomanyika nha vyono yo nyenye mono muganozeleze wupya majinji, no kuzinozeleza zinzila ze likaya, ho zisume kukoleka kanyhi.”

I cambuzi co wibata Sabato

¹³ Muwaha Mulungu yakutya nhavi, “Hono muyinoze Sabato yiwe yelile, na kanyhi hono mulece kuyitumamila so wiyendeza ne zenyu nyo weneco, na hono mulyeze lizuwa lyangu lyono lyelile no kulipela cogopo, mulece kujenda mihinzo hamba kwituma milimo yenyu, hamba kulonganjika nghani zono si zinojeye mwi'zuwa lilyo,

¹⁴ ale, nanye ho moyisangalalila viswanu i nyemo yo kunyitumamila nene. Nane nomunozenyi muwe ne lilumbo yiwaha mono'nze yose. Nanye moyisangalalila muno muno yisi yono namupela mulezi wenyu Yakobo. Vyo nghutya, ane no Muwaha Mulungu.”