Isaya 57 - Luganuzi Luswanu Kuli Wanhu Wose 2002

U wuhemba vihwani we Waisilayeli wukuhoswa

¹ I wanhu waswanu wakufwa, hasina yunji mono yakwizuka hamba kuzicelelela zizo. Ninga kolo wafwa, howa hasina kanyhi wusungu wono wowatamisa.

² Na wose wono wekaye mu mikalile miswanu, wawo wacehaga no mulamu kolo wakondya kufwa.

³ Ninga anye nyo wabi, muze ho muling'anizwe! Hambi nha muli wabi kuciza no muhawi, hamba no musenyha hamba no mucekulu malaya.

⁴ Alu mwene 'nye, muli wa nani nyenye lo, mono mukunoza nha nzwaji? Hamba 'lu muli nani mono mweza mwina lwedu no kukwamvya zinimi zenyu?

⁵ Anye mono mukwisagahiza zo wusulumizi wenyu, no kugona hasi ye mibici yenyu ye minghola i misiwanulwe, muwa kwituma zo wusenyha. Anye mono mulavyaga i wana wenyu gawa makumbiko mu mapalika ge matalawe, na mu malolo, behi ne vikolongo vye malenga.

⁶ Kanyhi muwa kusola ne mabwe gono gatelemeye ga mwikolongo, muwa kugahemba nha milungu. Hanyuma muwa kusola ne divayi, muwa kugalavizya cilavywa, hamonga ne vilavywa vyo wusaje. Ninga mulece kwihwesa nha vyono nane nghwendezwa ne metumo genyu gago, aa ng'o.

⁷ Sunga na hanji, mukubita mucanyha ye matunda matali, muwa kulavya makumbiko genyu kuko, muwa kunoza na zo wusenyha wenyu mumo mu matunda.

⁸ Sunga muwa kusimya milungu yenyu ye cikomaza ku gati ye milango yenyu ya kunze. Hambi nha mwakondya kundeka 'ne. Mukuyivula myenda yenyu muwa kugona mu vitanda vyenu vigazi muno, hamonga 'ne wahinza wenyu wono muwapelile pesa ho wagonane nanye, muwa kwiyigusha wusulumizi wenyu.

⁹ Mukwitajila wugutika hamonga ne mafuta ge mhunjile, muwa kubita kumuhemba mulungu Moleki. Kanyhi mukutuma wanhu wabite sunga mu ma'si go kutali, sunga ko ku yisi ye wafu, ho wakamulondolelenyi milungu yono mowa kuyihemba.

¹⁰ Mukwikataza bwete nyo weneco so wulondola milungu yinji, hamba si mukupela yaye. Hambi nha mukali kwihwesa nha vyono milungu yiyo ye cikomaza yomupelenyi vilungo ho mulece kutimba.

¹¹ Ninga Muwaha Mulungu yakutya, “Alu mwene yiyi yo milunguci waco yono yikumogofyenyi, sunga muwe kunonjela ane zo wulambi, no kusemwa 'ne? Hamba vyono nali nyamaye vilo vinji si nghulonga cinji, holeka nanye mweza hamba si mukumhela cogopo yaye?

¹² Anye mukwihwesa nha vyono, zono mukwituma zo swanu, ninga nozigubula calinze ze metumo genyu, ne vihwani vyenyu hamba si vyosuma kumutazenyi yaye.

¹³ Na kolo mukusaka wutazi, ale, cowona hono vivyo vihwani vyenyu vyomutazenyi! Hambi cihumbi ce libeho nha covipemhelusiza kutali vihwani vyose! Ninga i wanhu wono wanyitumbiye, wawo du wo wolokwikala mu yisi, kanyhi wo wolowa kuhemba nene mu Nyumba yangu.”

U wihuwizo wo Mulungu wo kuleta wutazi, no kuponya

¹⁴ Muwaha Mulungu yakutya nhavi, “Muwalekaje wanhu wangu wambuyile. Muviwusaje vikobazo vyose mu nzila yawo yono wokola! Muyinozeleze nzila yawo, muyiwikanize.

¹⁵ “Hambi ane, nha yonene u Mulungu mono yelile, mono nikalaga cibitilila. Nikalaga i hanhu hono henuce na hono helile. Ninga hamba nhavivyo, nikalaga hamonga ne wanhu wenenenyhezi, kanyhi wono wakondizye kunena. Ho niwasikamye vilungo vyawo vya mu nhumbula, hamonga no witumbilo.

¹⁶ Yo nene mono nawapela wanhu wangu wumi, holeka si nosuma kujendelela kuwahosa hamba kuwakolelwa likuwo cibitilila.

¹⁷ Nali niwakoleywe likuwo, ku soko yo wubi wawo hamonga ne masulumizi gawo, holeka nane nghawalipiciza no kuwaleka. Nawo ho wakacila kuwa wasina cihuliko hamba nhavi, wakajendelela du kwituma nha vyono wasakaga weneco.

¹⁸ “Nane nakondya kuziwona zono wetuma, ninga ane nowaponya du. Kanyhi nowatonga, niwapele no wutazi, hamonga na zizo, nowasindamika wono wakulila.

¹⁹ Hambi nha nakondya kuwulavya mulamu kuli wose wono wali behi na wono wekaye kutali. Holeka nowaponya wanhu wangu.

²⁰ Ninga i wanhu wabi, wehwanile ne lilenga lyono lisagahaye, lyono mawingo galyo si gatulaga yaye, ne malenga galyo galapusaga madabaga hamonga ne makucilu.

²¹ Mulungu yakutya nhavi, ‘Muli wanhu wabi, musina wuswanu wo mutulano yaye.’ ”