Isaya 56 - Luganuzi Luswanu Kuli Wanhu Wose 2002

I wanhu wo Mulungu wolohanga na we makungugo gose

¹ Nayo Muwaha Mulungu yakuwalonjela i wanhu wakwe yakutya, “Ale, mwitumaje zo wiling'ano na ze ling'ani, holeka nane nomuponyenyi mbela.

² Nane nhondo zose nowamotya wanhu wose wono wayikamise Sabato, hamba kuyavufya yaye, kanyhi nowamotya muno wono si wakwituma zimbi.”

³ No munhu mujenzi mono yakondya kwilunza hamonga ne wanhu wo Mulungu, alece kutya, “Muwaha Mulungu si konghombola ho nimuhembe hamonga ne wanhu wakwe, aa ng'o.” Hamba munhu mupaswe, yalece kutya ku soko vyono si kosuma kutuga wana, holeka si kosuma kwilunza ne wanhu wo Mulungu, aa ng'o.

⁴ Ninga Muwaha Mulungu yakuwalonjela i wapaswe, yakuwatya munhu we liwala lilyo, vyono, “Hono wuzikamise Sabato zangu, no kumhela cogopo, hamonga no kwituma zono zinyendezaga, kanyhi no kucikamisa ko wihuwilwa cilagane cangu,

⁵ ale, litagwa lyako lyokumbucilwa mu Nyumba yangu hamonga ne wanhu wangu, kuciza na hono wali wuwe wina wana we cilume na we cicekulu. Holeka hamba si kosemwelwa lukulu yaye.”

⁶ Kanyhi Muwaha Mulungu yakuwalonjela awalya i wajenzi wono wakondya kwilunza ne wanhu wakwe, wono wamwendile no kumwitumamila, kanyhi wono webate ne Sabato, kanyhi wakamisize ko wihuwilwa i cilagane cakwe, yakutya,

⁷ “Anye nanye nomutegulenyi ku Sayuni kwi'tunda lyangu lyono lyelile. Nimusangalazizenyi mu Nyumba yangu yo wuhembelo, mbocele sunga ne makumbiko genyu gono mowa kundavizya mu cikumbicilo cangu. Ne Nyumba yangu, yocemwa Nyumba yo wuhembelo we wanhu wose we makungugo gose.”

⁸ Nayo Muwaha Mulungu we mihanga, mono yawagomola wanhu wakwe Isilayeli ku kaya ku wulawa ku wuhamywe, yakondya kwihuwiza nha vyono kowaleta na wanhu wanji ho vihangane nawo.

I walongola we Waisilayeli wakuhoswa

⁹ Muwaha Mulungu yawalonjela wanhu we makungugo ganji weze nhe malimu, wawamele wanhu wakwe.

¹⁰ Yakatya, “Alu walongola wose wono wanojeye wawasugule wanhu wangu weza wali cibofu! Kanyhi hamba si wakumanya cinji co cose. Wehwana nhe mabwa gono si gafwemaga, nalu wene wagonile nhongo du wali mu ndoto. Nazo nhongo ho zili muzinzi lecenyi!

¹¹ Kanyhi wehwana i mabwa malaku gono si gegutaga yaye. Na kanyhi walongola wawa, mbeka wasina hamba wizuce bwete. Hambi nha wene wose, munhu yakwituma nha vyono yakusaka mweneco du, no kulondola cambuzi cakwe du mweneco.

¹² Nawo mu wung'wela wawo wo wujimbi wakutya, ‘Nye, lecenyi ta wayangu, ciwung'we wujimbi zuwali nha vyono cosuma! Holeka mitondo kolo wela, lyowa lizuwa yiswanu si nhe zuwali.’ ”