Isaya 53 - Luganuzi Luswanu Kuli Wanhu Wose 2002

¹ Nawo wanhu wolopitula watye “Alo nani 'mbi mono yazihuwila zono cazilonga? Hamba nani mono yawuwona muwoko wo Muwaha Mulungu muli zizi?

² Hambi nha wali wo wuhile wo Muwaha Mulungu, u mwitumami wakwe yawiluce nhe cilimwa cono cihimbize milela mu yisi nghavu. Yasina futa hamba wuswanu ho cimulanje, hakawa hasina cinji ciswanu muli mwene, hamba cono cocikwega nase ho cimulanje.

³ Camuzwajiza kanyhi cikamulema nayo yakangalila magazo no wusungu. Ninga hasina munhu wo wose mono yali yamulanjile si camucelelela, cikamuwona si cinji yaye.

⁴ “Ninga mwene yakangalila magazo gono gali ganojeye gawe getu sese, wusungu wono wali wucinojeye ciwutuje. Nase cehwesa vyono magazo gakwe, wali wulipicizwe wono Mulungu yawuleta.

⁵ Ninga yahomwa so wubi wetu yakatowangwa so mahodango getu gono cetuma, Nase cikuponywa so wulipicizwe wakwe wono yawutuga. Na so wutamiswe wakwe, ase mo ciponyezwe.

⁶ Ase wose cinha zingholo zono zajiliye, munhu yakubita na nzila yakwe mweneco. Ninga Muwaha Mulungu yakamulipiciza so sese, u wulipicizwe wono wali wucinojeye sese co weneco.

⁷ “Yatendelwa vibi muno, ninga yakangalila ko winenenyhezi, yakanyamala twii. Yakawa nhe nyana ye ngholo yono yikutegulwa kuwulagwa, kanyhi kotya nha ngholo yono yikunyonyolwa wukunzeje wayo, hamba si yalonga cinji ng'o.

⁸ Yakebatwa, yakaling'anizwa, yakategulwa yawulagwe, na hali hasina mono yawucelelela wusungu wakwe, mwene yawulagwa so wubi we wanhu wetu.

⁹ Yakawikwa mu citenjelo hamonga ne wanhu wabi, yakazikwa hamonga ne wagoli, hamba yawe mwene yali si yetumile wubi, hamba kulonga zo wulambi yaye.”

¹⁰ Muwaha Mulungu yakutya nhavi, “Nene no mweneco nali nyendile yagazwe, ne lifwa lyakwe, lyali lyo likumbiko lyono likuleta wunenelwe wo wubi. Nayo kowawona wanagwe, kanyhi kokwikala vilo vinji. Na muli mwene, wuhile wangu mo wofisilizizwa.

¹¹ Nayo yalaza kuwa yapuluta mu magazo, hanyuma kolowa na nyemo, baho ho komanyila vyono kumbe magazo gakwe si gali ga bwete yaye. U mwitumami wangu mwihuwilwa mono nyendezwe nayo, yuyo yo kowudinghula wuling'anizwe wa wenji, nane nowanenela ku soko yakwe.

¹² Holeka nane nomupela lilumbo yiwaha, hamonga ne wanhu we lilumbo liwaha, kanyhi hamonga ne wanhu wono wali vilungo. Hambi mwene nha yelavya wumi wakwe mweneco sunga ko ku wufwe. Yakawalilizwa hamonga ne wanhu wabi. Yakawudinghula wubi wa wenji, yakawalombela ho wanenelwe.”