Isaya 51 - Luganuzi Luswanu Kuli Wanhu Wose 2002

Zinghani zo kuyisindamika Yelusalemi

¹ Muwaha Mulungu yakutya nhavi, “Ale, muhulicizaje anye wose mono mukuhila muponywe, anye wose mono mukunyiziza ho mutuje wutazi. Alu mwihwesaje ze litalawe lyono mwatijila, mono mwaseswa mu wulawa mumo, ne likombo lye mabwe mono mwahimbulwa.

² Kanyhi mwihwese na zo mulezi wenyu Abulahamu, na za Sala mono yamulelenyi. Kanyhi mumanye na vyono lono namucemela Abulahamu, lulo yali yasina hamba mwana monga, ninga ane nghamulugutiza, nghamupela ne wana. Nghawanoza wanagwe wawe wenji muno muno.

³ “Nane noyiwonela lusungu Yelusalemi, hamonga na wose wono wekaye mumo mu matongo. Ne yisi yawo hamba yiwe yawa nha nyika, ninga ane noyinoza yiwe busitani, yiwe nhe busitani yono nayihadika ku Adeni. Nayo nyemo hamonga no wusangalale vyowa mumo, hamonga ne zinyimbo zo kunumbiza, ne malumbo ga kuli'ne.

⁴ “Alu muhulicizaje ta 'nye nyo wanhu wangu, muhulicize kuli zono nghulonga. Ane nghuwejiza i mejizo gangu we makungugo, ne malajilizo gangu gowaletela wuzelu.

⁵ Nane nowaziza musunho niwaponye hambi cipango cangu co wusume nha casejelela. Nane notema nili wene mu makungugo. Sunga ne ma'si go kutali, gose ganindiye nene sunga nilaza kuza. Hambi nha ganindiye ko witumbilo wuwaha nize niwaponye.

⁶ Ale, mugalamile kucanyha muwulanje wulanga, muyilanje kanyhi ne yinze! Mumanye vyono wuwo wulanga wokwajilila nha lyosi yinze nayo, yolosakala nha mwenda muhuma, ne wanhu wayo wolofwa nha mahazi. Ninga wukombozi wono nghuwuleta, awo langa wokwikala cibitilila. No wiling'ano wangu si wolowembulwa yaye.

⁷ “Ale, muhulicizaje ta anye wose mono muzimanyile ze ling'ani, anye wose mono mugebate mejizo gangu mu zinhumbula zenyu. Mulece kuwa no woga lono wanhu wakumulijenyi no kumutovulenyi,

⁸ hambi nha wosakala wose nho mwenda wono wulijigwe ne makuni! Ninga wukombozi wono nghuwuleta, awo langa wokwikala cibitilila. No wiling'ano wangu wokwikala cibitilila.”

⁹ Ale wusinhuce go Muwaha Mulungu wucitaze! Witumamile vilungo vyako nha vyono wavitumamila katali, wuciponye. Hambi nha yo gwegwe mono walitemanga vipiligwa-piligwa lizoka lya mwi'lenga lyono likucemwa Lahabu.

¹⁰ Kanyhi nha yogwegwe mono walinyaza lilenga wukayinoza nzila muciligati ye malenga ho walowoce i wanhu wono wawakomboza.

¹¹ Ne wanhu wose wono wawakomboza, wolofika ku Yelusalemi wena nyemo akuno wakwimba ne mazi mawaha ko wusangalale. Nawo wosangalala cibitilila, kanyhi wolowa wasina wukalale no wusungu cibitilila.

¹² Muwaha Mulungu yakutya nhavi, “Ane, yo nene du, mono nghuwa kumusikamyenyi. Alu nhawule mukumogopa munhu we nghuli mono si kekalaga vilo vinji, yehwanile mahanze?

¹³ Alu mwamusemwa Muwaha Mulungu mono yamuwumbenyi, mono yawutandaza wulanga, no kusimya misinji ye yinze? Alu nhawule mukuhila mwikale mu woga, ku soko yo wukali wa wawo wono wakumwiwonelenyi, no wukali wawo wono wewikanize wamongomezenyi? Ninga mumanye vyono wukali wawo si womupamizenyi anye yaye.

¹⁴ Na wawo wono wali mu jela, nawo wololecelwa mbela mbela, kanyhi wolokwikala vilo vinji, hamonga no kulya ndigwa yo yose yono wakuyisaka.

¹⁵ “Ane yo nene Muwaha Mulungu, u Mulungu wako, mono nhibulaga lilenga, niganoza mawingo galyo gawa kubula. Ne litagwa lyangu, nene Muwaha Mulungu we mihanga!

¹⁶ Yo nene mono nawutandaza wulanga, nghasimya ne misinji ye yinze, nghayilonjela Yelusalemi nghatya, ‘Anye muli wanhu wangu! Nakondya kumwijizenyi mejizo gangu, kanyhi nghumucitilenyi no muwoko wangu.’ ”

I ndumilizo yo wugazwe wa Yelusalemi

¹⁷ Gwe Yelusalemi, ta wusinhuce ye! Wukulumhuce winuce! Alu wagala cikombe co wulipicizwe cono Muwaha Mulungu yakung'weseze mwi'kuwo lyakwe wung'we. Nagwe 'lu wakondya kung'wa wagala, nalu weza wakupebesuka so wugale.

¹⁸ Nalu hasina munhu wo wose mono kokutonga nzila, hamba mu wanhu wako, hasina mono kokwibata muwoko wako yakutonje nzila.

¹⁹ Alu magayo mejete gakondya kukuziza gwegwe. Yisi yako yakondya kuhodangwa no wulugu, ne wanhu wako nawo wagwilwa ne lizala. Na hasina hamba monga mono yakukuwonela lusungu.

²⁰ Ne wanhu wako wagwiye mu vipeto vyose vye zinzila ku soko yo wusocele, wehwana nhe sawada yono yigwiliye mu mutego wo mupelembi. Wamemile wutacilwe we likuwo lyo Mulungu.

²¹ Nye nyo wanhu wa Yelusalemi mono muli mu wugaye, anye mono mukupebesuka nha mugalile wujimbi,

²² Muwaha Mulungu u Mulungu wenyu mono yakumudimenyi yakutya nhavi, “Alu, neza kuciwusa cikombe cono namupelelenyi mwi'kuwo lyangu. Alu hodu si mojendelela kanyhi kung'wa yaye, wujimbi wono wukumunozenyi muwa kupebesuka.

²³ Alu, nowang'wesa wawo wono wali kumwiwonelenyi wawo wono wakamunozenyi mugone hasi mu zinzila, wakawa kumukanyanjizenyi hasi nha muli manghundi.”