Isaya 50 - Luganuzi Luswanu Kuli Wanhu Wose 2002

¹ Muwaha Mulungu yakutya, “Alu mukwihwesa nha vyono nali nawawinga wanhu wangu, nha vyono munhu kamupelaga mucekulu wakwe talaka? Alu ceti ce talaka ho cili hayi lo? Hamba mukwihwesa nha vyono nali nawaguza ku wuhamywe lo, nho munhu mono kaguzaga wanagwe ku wuwanda? Ng'o ye! Anye mwabita ku wuhamywe ku soko yo wubi wenyu, mwabita kuko, ku soko ye masutya genyu.”

² Alu so cici wanhu wangu si wanhuciza lono nawabitila ho niwaponye? Na so cici lo, na lono nawacemaga, hamba si wanyidika yaye? Hamba wakuwona ane nili musocele si nosuma kuwaponya lo? Alo wene si wamanyile nha vyono ndahile kulilajiliza lilenga linyale lwa kamonga, no kuganyaza makolongo, yiwe nyika, ne zisomba za mumo zifwe so wula malenga.

³ “Kanyhi na vyono nosuma kuganoza mavunde gawe matitu, hawe nha ho cili cililo co kuwalilila wono wafwiye.”

I cihuliko co Mwitumami wo Muwaha Mulungu

⁴ Nayo Muwaha Mulungu nha yanyijiza zono nolonga, ho sume kuwasikamya wono wakataye muno. Nhondo zose hakali mitondo, kanozaga niwe muhidimbazi kuzihulika zono yakunyijiza.

⁵ Muwaha Mulungu yamhelile wizuce, nane nghali namubeza, hamba kumuleka yaye.

⁶ Nawapitucila mugongo wangu wanhu wono wanhowaga, na lono wanhovulaga, ane si nawemila yaye, sunga na lono wanghulaga zindevu zangu no kunhowa mu wusu wangu.

⁷ Ninga hamba nhavivyo, matovulo gawo si ganhamisa yaye, hambi u Muwaha Mulungu we mihanga nha yamhela wutazi. Nane nghekamiliza, nghagakangalila. Hambi nha nali manyile vyono si nokozwa cevu,

⁸ hambi Mulungu nha yali behi nane. Na vyono kanyhi kombala ane sina wubi. Hambi nani kanyhi mono kokwijelela yesumanize nane? Ale, yaze cibitane ku mahakama yakasitace!

⁹ Hambi Muwaha Mulungu we mihanga nha yo kasumilaga 'ne. Alo nani kanyhi mono konyitya nili musutyi? Wono wakusitaka wose nha wotiza, wosakala wose nho mwenda wono wulijigwe ne makuni.

¹⁰ Nanye wose mono mumuhulice Muwaha Mulungu, no kuzihulika zinghani zo mwitumami wakwe, mumanye nha vyono mokola mu nzila yo wutitu tuku. Ninga anye mumwitumbile du Muwaha Mulungu mumwegamile Mulungu wenyu.

¹¹ Nanye wose mono mwikalaga mukwihwesa zo wuhile wubi wo wuhodanga lilumbo lye wayenyu, nyenye yo mokwiyongomeza no wuhile wenyu wubi nyo weneco. Nayo Muwaha Mulungu yo kozinoza zizo ziwe nhavivyo. Nanye molotuga magayo mawaha muno muno.