Isaya 49 - Luganuzi Luswanu Kuli Wanhu Wose 2002

Isilayeli wo Wuzelu kuli Makungugo

¹ Nanye nyo makungugo go kutali, anye nyo wanhu mono mwikaye kutali, muhulicize ta zono nghulonga, nghutya, Muwaha Mulungu yahagula ane, yakalitambula litagwa lyangu na lono nali nghali nalelwa, yakambika niwe mwitumami wakwe.

² Yakazinoza zinghani zangu ziwe kuhoma nho mumaje. Kanyhi yakanyhitila no muwoko wakwe. Yakanoza 'ne niwe nha songa nghali muno yono yiwikanizwe ku wugume.

³ Hanyuma yakanonjela yakutya, “Isilayeli, agwe wuli mwitumami wangu hambi nha ku soko ya gwegwe, wanhu wose wonghumya.”

⁴ Nane nghamupitula nghatya, “Nepiganza bwete, nghetuma sunga nghakatala so cinhu cono cisina cambuzi.” Ninga hamba nhavivyo, nomwitumbila Muwaha Mulungu, nayo yo koyitetela ling'ani yangu, kanyhi yo kohumbiliza mu nghango ye metumo gangu.

⁵ Muwaha Mulungu yahagula 'ne na lono nali nghali hamba nalelwa, yakanoza niwe mwitumami wakwe, ho niwagomole kwakwe wanhu wakwe, niwakonghole i wanhu wa Isilayeli wono weyagaye. Hambi Muwaha Mulungu nha yo yakumhela lilumbo, kanyhi mwene vyo vilungo vyangu.

⁶ Muwaha Mulungu yakanonjela yakutya, “Nina mulimo muwaha wono nghuwiciye agwe go mwitumami wangu. Ninga si mulimo wo kuwagomola du mu lukumyo i wanhu wa Isilayeli, wono wasigaye, langa nokunoza kanyhi wuwe wuzelu kuli makungugo, i yinze yose ho yisume kuponywa.”

⁷ Mulungu mono yelile wa Isilayeli, u Mukombozi wawo yakumulonjela mono yakubedegalwa ne wanhu, na mono yakusulwa ne makungugo, na kuli mwitumami we watemi, yakutya nhavi, “Watemi kolo wakukuwona, wokwinucila walajile cogopo cawo kuli'gwe, ne wana we watemi, nawo woziwona zizo, nawo wokwinama hasi, wakupele lilumbo.” Na zizi zose zolokwijela, vyono Muwaha Mulungu kakondya kumuhagula mwitumami wakwe, U Mulungu mono yelile wa Isilayeli, mwene kakamisaga wihuwizo wakwe.

Wugomolwe wa Yelusalemi

⁸ Muwaha Mulungu yakuwalonjela wanhu wakwe yakutya, “Kolo lizuwa lyo kumuponyenyi lyakondya kuza, ane nomuponyenyi, nomupitulenyi cililo cenyu co kusaka wutazi. Nolomudimenyi no kumucitilenyi, hamba muwe mwali mwakondya kuwika cilagane ne wanhu wose co kusaka wutazi. Kanyhi nolomudimenyi no kumucitilenyi, so cilagane cono nacinoza ne wanhu wose muli nyenye. Nane nomuwicenyi mwikale kanyhi mu yisi yenyu yono yali lyeza yitongo.

⁹ Nane lulo nolowalonjela wono wali mu jela nitye, ‘Ale, muwuce mubite, mwakondya kuwopolelwa!’ Nawo wono wali mu wutitu, nolowalonjela nitye, ‘Ale, nanye muwuce mulawile ku wuzelu!’ Hambi nha wolowa wenha zingholo zono zikudima mu matunda,

¹⁰ nawo si wolodabuka yaye, hamba kutuga nyhilu ya malenga. Nalyo lizuwa hamonga ne livuce lya mu nyika, si vyolowatamisa yaye, hambi nha wolowa wali mu wutonji wa mono yawendile. Mwene kowatonga ku mivwilo ye malenga.

¹¹ “Nane nonoza nzila mbaha yikolele mu matunda, no kuyinozeleza nzila yono woyikolela wanhu wangu.

¹² Nawo wanhu wangu, wolokuza ku wulawilila kutali, ku wulawilila ku lubavu lwa kusumuka na kumwezi, na ku wulawilila ku Aswani ku lubavu lwa kutakama.”

¹³ Ale mwimbe anye nyo wulanga! Nagwe go yinze wimbe no wusangalale! Matunda nago gembe na nyemo mbaha! Hambi Muwaha Mulungu nha kowasindamika wanhu wakwe, kowawonela lusungu wanhu wakwe wono wali mu magayo.

¹⁴ Ninga i wanhu wa Yelusalemi wakatya, “U Muwaha Mulungu yakondya kucileka! Yakondya kucisemwa!”

¹⁵ Ninga nayo Muwaha Mulungu yakupitula yakutya, “Alu mwene mbeka nyina yo munhu kosuma kumusemwa u mwanagwe mono yamulela, hamba si komwenda yaye? Ninga hamba yiwe nyina yo mwana yasume kumusemwa mwanagwe, ane langa si nomusemwelenyi lukulu yaye.

¹⁶ Gwe Yelusalemi, ane hamba si nokusemwela lukulu! Hambi nha nakondya kukwandika litagwa lyako mu maganza ge miwoko yangu.

¹⁷ “Hambi wawo wono wokuzenga kanyhi, nha wakuza musunho, nawo wono wakakunoza wuwe yitongo, wowuka muli gwegwe.

¹⁸ Ale, winule meso gako wulanje ako na ako wuwone cono cikuza! I wanhu wako weza kwihanguliza hamonga wakuwuya kono kwawo! Na mbeka, nha vyono ane nili Mulungu mumi, nagwe kolowa sangalalila wanhu wako, hambi nha kolowa nha bibi halusi mono yavwalile wihambo.

¹⁹ “Hambi yisi yako nha yali yakondya kulekwa lyawa yitongo, ninga aluno yolowa yisi finyu yono si yolowakwila wose wono wolokuza wekale mumo. Na wose wono wakunoza wuwe yitongo, wolowuswa wawe kutali nagwe.

²⁰ Ne wanhu wako wono walelelwa ku wuhamywe, lizuwa linji wolokutya, ‘Alu yisi yiyi, nha yeza finyu muno, nase lu ho cikusaka wikalo wugazi muno!’

²¹ Ale, nagwe baho, kolokwanza kulonga wuli wene wukutya, ‘Alu mwene nani mono yandelela wana wawa? Hambi nha nali nakondya kufwilwa ne wana wose nghawa sina hamba mwana monga. Nali nili ku wuhamywe, nghawa nawingwa, alu nani mono yawawilusa wana wawa? Nha nali nalekwa nekala nili wene, alu wana wawa ho walawa hayi wene?’ ”

²² Ninga Muwaha Mulungu we mihanga yakulonga ne wanhu wakwe yakutya, “Ane nololajila citanjilo kuli makungugo, nawo wolowagomola wanago kono kaya.

²³ Ne watemi nawo wolowa nha wasogo, nawo i wagolece we likulu wose, wolowa nhe wanyina zako, hambi nha wolokwinamila ha mwande yako no kukupela lilumbo, kanyhi wolokwinenenyheza hali'gwe wakulajila cogopo cawo hali'gwe. Nagwe baho ho kolomanyila vyono ane yo nene Muwaha Mulungu. Kanyhi hasina munhu wo wose mono yanyitumbiye mono kolokozwa cevu.”

²⁴ Wule! Wukwihwesa kosuma kumuboka musilikale mateka gakwe? Hamba kosuma kuwaboka wafungwa mu miwoko yo munhu mono yali vilungo?

²⁵ Muwaha Mulungu yakupitula yakutya, “Na zizo zo zokwijela, Hambi i wafungwa wo musilikale nha wosolwa wose, sunga ne mateka go munhu mono yali vilungo, nago gosolwa gose. Hambi nha nokwisumaniza no munhu mono yakwisumaniza nagwe, ho niwaponye wanago.

²⁶ Nane nowanoza wono wakukwiwonela wewulaje weneco wose. Nawo wogala no wiwulaji hamonga ne makuwo, Baho ne wanhu wose ho womanya vyono, ane yo nene Muwaha Mulungu, u Muponyi wako, ane yo nene u Mukombozi wako we vilungo wa Yakobo. Mono nghukuponya no kukuleka wuli mwelecele. Kanyhi ho womanya nha vyono yo nene Mulungu nili Muponyi wako, no Mukombozi wako na we vilungo wa Yakobo.”