Isaya 48 - Luganuzi Luswanu Kuli Wanhu Wose 2002

Mulungu yo yuyo Muwaha Mulungu, wa mu vilo vyono vikuza

¹ Nye nyo wanhu wa Isilayeli, mono mwalawa mu lulelo lwa Yuda, ta muhulicize, Anye mwelahiza mwi'tagwa lyo Muwaha Mulungu, mukatya nha vyono momuhemba Mulungu wa Isilayeli, ninga hamba kwituma nha vyono mwalonga.

² Ninga hamba nhavivyo, mukali mukwilumba mukwiyitya nha vyono anye muli we likaya lyono lyelile, na kanyhi mumwitumbiye Mulungu wa Isilayeli, mono yakucemwa yo Muwaha Mulungu we mihanga.

³ Ninga nayo Muwaha Mulungu yakumutyenyi nhavi nyo Isilayeli, “Ane naziwila zinghani zizi wulawa katali, nha vyono zokuza, nane nghazinoza zijele ko musunho muno.

⁴ Ninga nali manyile vyono agwe kowa wusina cihuliko, hambi nha wuli mukavu wihwanile cuma, kanyhi ne lihanda lyo wusu wako lihwanile shaba.

⁵ Holeka nane nghakuwilila wulawa katali zono zilakwagana, nghazilonga zono zilejela, lono zikali si zinawa ho nghwimile wulece kwihwesa nha vyono vihwani vyako viseswe, hamonga ne vihwani vyako vyenjedulwe, vyo vizinozize zizo zijele.”

⁶ “Na zose zono nazilonga, alu zikwijela, holeka yikunojeye wihuwile nha vyono wuwile wangu wali wa mbeka. Alu lece ta nghulonjele zimhya zono zikuza, zinghani zono nali nghali hamba nazilonga ku wulawa katali.

⁷ Nazo nghuzinoza lulu du, hamba si za katali yaye, ninga agwe wali wukali nazihulika yaye, ho wulece kutya vyono wali wuzimanyile ku wulawa na katali.

⁸ Ninga nali manyile vyono kowa wuli mwihuwilwa, hambi nha wali wumanyice vilo vyose nha vyono wali wuli muhodanji. Na yiyi yo soko yono yikaleka si wasuma hamba hadodo kuzihulika zizi, na yo yaleka wulece kuhulika nghani hamba monga.”

⁹ “Nane ngheyimila likuwo lyangu ndece kukongomeza, Nawo wanhu walikumye litagwa lyangu.

¹⁰ Nane nghakujeleka mu moto we magazo, nha vyono fweza yikwemwaga mu moto. Ninga hamba nhavivyo nghakuwona si wukwiliye yaye.

¹¹ Na zose zono nitumile, nizitumila mu wuhile wangu, Hamba si nolecela lukulu litagwa lyangu litovulwe hamba kuleka yunji yahanje nane lukumyo, hambi lukumyo lulo, nha lwangu du nene nili wene.”

Kulo u mulongola muhagulwa wo Muwaha Mulungu

¹² Muwaha Mulungu yakutya nhavi, “Nye Isilayeli, nyo wanhu wono namucemenyi, alu ta muhulicize zangu zono nghumulonjelenyi! Ane yo nene Mulungu, mono nili wo mwamulizo, na wo mudumo, u Mulungu monga du.

¹³ Ne miwoko yangu yo yayiwika misinji ye yinze nghawutandaza no wulanga, nane kolo nghuzicema wulanga ne yinze, zikuwa kuza kamonga du ha mwande yangu.

¹⁴ “Holeka mwihangulize wose hamonga, muhulicize zono nghulonga, hambi nha hasina milungu yinji, yono yosuma kuwila nha vyono munhu mono nimuhaguye, kosuma kuyihoma Babiloni, ninga mwene kolokwituma du zono nghusaka yetume.

¹⁵ Hambi nha yo nene mono nalonga no kumucema, nane nomulongoza no kumupela wumoteswe.

¹⁶ Alu, musejelele behi nane, muhulice zono nghulonga, hambi 'ne nha nongaga calinze ku wulawa mwamulizo, ne zinghani zangu ziwezaga za mbeka vilo vyose.” Nalu u Muwaha Mulungu yanhuma no kumhela vilungo.

U wuhile wo Muwaha Mulungu kuli wanhu wakwe

¹⁷ Mulungu mono yelile wa Isilayeli, u Muwaha Mulungu mono yakumuponyenyi yakutya nhavi, “Ane yo nene Muwaha Mulungu, u Mulungu wenyu, u Mulungu mono yakuhila kumwijizenyi ziswanu, no kumutonjenyi nzila yono moyityatya.

¹⁸ Alu yali yiwe yili ciba le, hono mwali mugebate malajilizo gangu! Holeka mwali muwutuje no wumoteswe wuwaha, wono wihwanile nhe likolongo lyono si linyalaga! No wusume wali wumuzizenyi nhe mawingo ge lilenga.

¹⁹ Ne wanago wali wenjipe, wawe wenji nho musawawa, nane nali niwadime ho walece kongomezwa.”

²⁰ Ale muwuce mu Babiloni, mutize! Muziganule zinghani zizo na nyemo, muzimanyize hanhu hose muwe kutya, “U Muwaha Mulungu kakondya kuwaponya Isilayeli i wetumami wakwe!”

²¹ Na lono Muwaha Mulungu yawalongoza wanhu wakwe, no kuwakoza mu ciligati ye nyika mwi'zuwa likali, hamba si watamiswa yaye ne nyhilu ye malenga. Hambi mwene Mulungu nha yanoza malenga galawe mwi'talawe ku soko yawo. Yatula litalawe, malenga gakalawila mumo.

²² Muwaha Mulungu yakutya, “Hasina mulamu kuli wanhu wabi.”