Isaya 47 - Luganuzi Luswanu Kuli Wanhu Wose 2002

Wuling'anizwe wa Babiloni

¹ Muwaha Mulungu yakutya nhavi, “Gwe Babiloni, alu wuwuce mwi'goda lyako lyo wutemi, wutime wikale hasi mu muhangha. Halulongozi wali winha muhinza muswanu likaya lyono silisumwaga. Ninga aluno hamba si kocemwa kanyhi mupolo hamba wo wulenzi! Aluno, wawa muwanda!

² Alu wusole zinzala! Wusaje wusaje! Wuwuse citambala cako co kugubika wusu wako, wuyiwopole ne myenda yako miswanu! Wukunyaje mwenda wako kusika, ho wulowoce vikolongo!

³ Nawo wanhu nhondo wokuwona vyono wuli cipwi, wokuwona vyono wenenenyheza, kanyhi wukuwona cevu. Nane nolomulipicizenyi, na hasina munhu mono kolonyimila.”

⁴ Mulungu mono yelile wa Isilayeli kakondya kucikomboza, ne litagwa lyakwe, mweneco, yo Mulungu we mihanga.

⁵ Muwaha Mulungu yakuyilonjela Babiloni yakutya nhavi, “Wunyamale twii, mu wutitu, hambi nha hasina munhu wo wose mono kokucema kanyhi nha wuli mugolece we likulu, we makungugo!

⁶ Nali niwakoleywe likuwo wanhu wangu nghawa kuwatendela nha kotya si wanhu wangu Nghawawika mu miwoko yako. Nagwe hamba si wawawonela lusungu yaye, sunga ne wakombi wose wukawatendela vibi muno.

⁷ Hambi nha wehwesaga nha vyono kojendelela kuwa mugolece we likulu vilo vyose, hamba kuzihwesa zizi zose mu nhumbula yako, nha vyono zose zina ndumo.

⁸ “Ale, wuhulicize ta zono nghukulonjela agwe go mwenda kwiyendeza go mweneco, mono kwihwesaga vyono wuli mu mulamu, na kanyhi wupolile. Kanyhi wukuwa kwilumba ti, wukutya agwe yo gwegwe du, hasina yunji mono yehwanile gwegwe. Na kanyhi kwihwesaga nha vyono si kolowa wuli mucekulu mufwile. Hamba kufwilwa ne wanago yaye.

⁹ Ninga wumanye nha vyono, zizi zose zolokwijela kamonga du mwi'zuwa limonga. Na ku soko ye cibede cako na so witumamila wuganga wako, kolofwilwa no mulume wako, hamonga ne wanago.

¹⁰ “Hambi nha wawitumbila wubalya wako vyono wehwesaga nha hasina yunji mono yakukuwona. Ninga kumbe mahala gako hamonga no wizuce wako, vikakutonga vibi, nagwe baho, wukawa kwidunhumula no kwiyitya, ‘Ane yo nene du, na hasina yunji kanyhi mono yehwanile nene.’

¹¹ Holeka ku soko yiyo, magazo gokuziza, no wuganga wako hamba si wosuma kugemila yaye. No wongomele wokuziza nhinicizo nawo wowa wongomele wono wukali hamba nawulota yaye!

¹² Alu wuwice wuganga wako hamonga ne zimhiji zako zono wetumamilaga wulawa wudodo wako, na lunji zokupela wutazi wudodo, na lunji kosuma kuwogofya walugu wako.

¹³ Nalu nha weza wusina kanyhi vilungo ku soko yo wulanjizwe wono wukupegwa. Alu, wuwalekaje wawo waganga wako waze wakuponye, i waganga we zinyelezi, hamonga na wono wazandikaga zinghani za mu wulanga, nawo wakulonjele mu mwezi na mwezi, zinghani zono zokwijelela gwegwe.

¹⁴ “Ninga wumanye vyono wawo wose wokwihwana mawaje no moto wowakongojeza wose! Nawo hamba si wolosuma kwiponya wali wene yaye hambi malambi go moto nha golowasumiza, holowa hasina kanyhi moto wo kota, ho watuje civuce.

¹⁵ Na zizo zo swanu zono wolokutendela wawo waganga wono kwikalaga wuwetumbiye mu mikalile yako yose. Ninga wumanye nha vyono wawo wose, wolokuleka wuli wene, wawe kubita munhu kwakwe, munhu kwakwe, na holowa hasina hamba monga mono kolosigala ho yakuponye.”