Isaya 43 - Luganuzi Luswanu Kuli Wanhu Wose 2002

Mulungu yakwihuwiza vyono kowaponya wanhu wakwe

¹ Nye nyo Isilayeli, u Muwaha Mulungu mono yawawumba, yakutya nhavi, “Mulece kogopa, hambi nha nakondya kumukombozenyi. Kanyhi nimucemenyi ‘Wuli wangu.’

² Na kolo mukukola mu malenga matali, ane nowa nili hamonga nanye. Ne magayo genyu, hamba si gomugubizenyi yaye. Na kolo mukukola mu moto, hamba si mopya yaye, ne majelo mawaha muno, hamba si gomusumizenyi yaye.

³ Hambi 'ne nha yo nene Muwaha Mulungu, u Mulungu wenyu, u Mulungu mono yelile wa Isilayeli mono yakumuponyenyi. Nane noyilavya Misili, yiwe 'kombo so nyenye, nayo Kushi na Seba, nazo nozilavya nhavivyo, ku soko yenyu, anye ho muwe welecele.

⁴ Ne makungugo gose, nogaleka, ho mhonye wumi wenyu, hambi anye nyo Isilayeli, nha muli wo wuguzi wukamu kuli'ne, nane nghamwendenyi no kumupelenyi lilumbo.

⁵ Holeka mulece kogopa, hambi ane nha nili hamonga nanye! ‘Nane nowakonghola no kuwagomola wo lulelo lwenyu ku wulawa kutali ku lubavu lwa kucilima, sunga ko ku lubavu lwa kumwezi.

⁶ Noyilonjela mhelo ye sumuka yiwalece wawuce kuko, nayo mhelo ye takama yilece kuwemila yaye. Muwalekaje wanhu wangu wawuye hamonga ku wulawa mu ma'si go kutali, na mu yinze yose.

⁷ Hambi nha wanhu wangu nene ane nawawumba ho wamhele lukumyo.’ ”

Waisilayeli wo wuhomelezi wo Muwaha Mulungu

⁸ U Mulungu yakutya, “Waletenyi ku wuling'anizwe wanhu wangu. Hambi nha wena meso, ninga hamba si wakuwona yaye, wena ne makutu, ninga hamba si wakuhulika yaye!

⁹ Waletenyi makungugo gose ku wuling'anizwe. Hambi milungu yawo ya hayi yono yosuma kuzilonga ze vilo vyono vikuza? Hamba milungu ya hayi ya muli yene yono yosuma kuzilonga zono zikwijela aluno? Ale, muyilekaje ta milungu yiyo, yiwahomelele hono mbeka wali ling'ani yihomelele i mbeka ye zinghani zawo, ne wanhu kolo wakuzihulika, watye ‘Heya za mbeka.’ ”

¹⁰ Nye nyo wanhu wa Isilayeli, anye yo nyenye wuhomelezi wangu. Ane namuhagulenyi ho muwe wetumami wangu, ho mumanye 'ne no kunyihuwila kanyhi ho mumanye nha vyono yo nene du Mulungu nili wene. Na kanyhi mumanye nha vyono hasina mulungu yunji ku wulawa katali, hamba mono kolowa, langa yo nene du.

¹¹ “Ane yo nene du Muwaha Mulungu, yo nene du mono nosuma kumuponyenyi.

¹² Ane yo nene mono namulonjelenyi zono zolomwijelelenyi, hanyuma nghaza nimuponyenyi. Na hasina hamba mulungu yunji mujenzi mono yetuma zizi, nanye yo nyenye mono muli wahomelezi wangu.

¹³ Ane nili Mulungu, na nojendelela vilo vyose kuwa yo nene du Mulungu. Na hasina munhu wo wose mono kokwiponya mu vilungo vyangu. Kanyhi hasina munhu wo wose mono kosuma kuzikawaniza zono nitumaga.”

Wisukule we Waisilayeli ku Babiloni

¹⁴ Mulungu mono yelile wa Isilayeli, u Muwaha Mulungu mono yakuwa kumuponyenyi yakutya nhavi, “Ane notuma lipuga lye wasilikale ku Babiloni ho wamuponyenyi. Nogabenanjiza malango ge likaya, ne lizozo lye nyemo lye wanhu walyo, lyopituka liwe cililo.

¹⁵ Hambi ane, nha yo nene Muwaha Mulungu, u Mulungu wenyu mono yelile. Yo nene mono nakuwumba 'gwe Isilayeli, kanyhi yo nene no mutemi wenyu.”

¹⁶ Katali Muwaha Mulungu yanoza nzila mwi'lenga, yakanoza wukolo mu malenga mawaha.

¹⁷ Yakalyongomeza lipuga liwaha muno lye wasilikale we vilungo. Lipuga lyono lyali lina matuka go wulugu hamonga ne zifwalasi. Wakagwa, hamba si wolokwinucila lukulu kanyhi, wakajililila lukulu nho wuzelu we tala yono yakondya kuzimywa.

¹⁸ Ninga Muwaha Mulungu yakutya, “Mulece kuzikumbucila zinghani zinongozi zono zakondya kupuluta, hamba kwihwesa zinghani ze katali.

¹⁹ Langa, muzilanjililaje zinghani zimhya zono nozituma. Nazo nha zakondya kwijela, nanye mosuma kuziwona lulu! Ane nosesa nzila yikolele mwi nyika, nimupelenyi ne makolongo ge malenga gahulume mumo.

²⁰ Nane kolo nakondya kutula makolongo gakuhuluma mu nyika, no kuwapela malenga i wanhu wangu wahagulwa, ale baho, sunga ne malimu gose ga mu mbago nago ho gomhela cogopo, nazo zinyhewe ne zinyacihema zonghumya nene.

²¹ Hambi wawa nha wo wanhu wono nenozeza nene no mweneco, nawo wowa kwimba zo lukumyo lwangu!”

U wubi we Waisilayeli

²² U Muwaha Mulungu yakutya nhavi, “Ninga anye nyo nghungugo ya mwali Isilayeli mwakondya kunghatala, kanyhi hamba si mwendaga no kuhemba nene.

²³ Hamba si mwasakaga no kundavizya vilavywa vinyanywe vye zingholo, hamba si mwali mwendile kumhela cogopo mu nzila ye makumbiko genyu. Ane nha si namukatazajenyi so wusaka kuli'nye vilavywa, hamba kumukatazajenyi so wufusa wuvumba.

²⁴ Nanye hamba si mwangulila wuvumba yaye, hamba kunyigutya ne mhama ye mitugo zenyu. Langa anye mwamhela mutegulo muzito muno wo wubi wenyu, mukasakaza ne zimbi zono mwetuma.

²⁵ Ninga hamba nhavivyo, ane yo nene Mulungu mono nghuwunenela wubi wenyu. Nane nghuzinoza zizi vyono nili Mulungu. Hamba si nowukumbucila kanyhi no wubi wenyu.”

²⁶ “Alu, cibitane ku mahakama, muwutegule kuko wusonjezi wenyu! Mulolose nghani zenyu, mulajile nha vyono muli ling'ani!

²⁷ U mulezi wenyu mulongozi hamonga ne walongola wenyu, wose nha wetuma wubi kuli'ne.

²⁸ Sunga ne watemi wenyu, nawo wakahavufya i hanhu hangu hono helile. Holeka ku soko yiyo, nane nghaleta wongomezwe kuli Isilayeli. Nghawaleka wanhu wangu Isilayeli watovulwe.”