Isaya 42 - Luganuzi Luswanu Kuli Wanhu Wose 2002

U mwitumami wo Muwaha Mulungu

¹ Muwaha Mulungu yakutya, “Lanjenyi ta u mwitumami wangu mono nghumusikamya, yo yuyo mono namuhagula, kanyhi mono nghwendezwa nayo. Nakondya kumumemya muhe wangu, nayo kowaletela makungugo gose wiling'ano.

² Nayo si kozoza hamba kwinula lizi lyakwe, hamba kulalika cinji co cose mu zinzila.

³ Hamba si kolibena yaye, lidete-lulenga, hamba si kocizimya yaye cikoloboyi cono cikufwifwiza. Langa mwene kowaletela ling'ani wanhu wose.

⁴ Nayo hamba si kotukuwika mutima hamba kukatala yaye, langa mwene koleta ling'ani kono'nze. Ne zi'si zose zolindila mejizo gakwe.”

⁵ Mulungu yawumba wulanga, yakawa kuwutandaza, yakawa kuyisikamya yinze na vyose vyono vili mumo. Nayo yo kawapelaga wehele wanhu wose. Ninga aluno Muwaha Mulungu yakumulonjela mwitumami wakwe yakutya,

⁶ “Ane yo nene Muwaha Mulungu mono nakucema, nghakupela no wusume ho wusume kuyiwona ling'ani yikunozwa kono'nze. Nane nonozeza muli gwegwe cilagane cangu ne wanhu wangu wose. Na muli gwegwe, mo nowuletela wuzelu wubulile muli makungugo.

⁷ Nagwe kowanuguza meso i wabofu, kanyhi kowawopolela wose wono wekaye mu wutitu mu jela.”

⁸ “Ane nili wene du, yo nene Muwaha Mulungu u Mulungu wako. Hasina kanyhi hamba mulungu yunji wo wose mono kosuma kuhanga nane mu lukumyo lwangu, hamba si noyikombolela lukulu milungu yihanje lilumbo na nene.

⁹ Ne zinghani zono nazilonga katali, alu mbeka zakondya kwijela. Ninga aluno nomulonjelenyi ze nghani mhya, hamba ziwe zikali si nanza kwijela.”

Lwimbo lo lukumyo

¹⁰ Mwimbilenyi Muwaha Mulungu lwimbo lupya, mwimbe zo lukumyo lwakwe nye nyo yinze yose! Nanye mono mukujendela mwi'lenga, mukumyenyi Muwaha Mulungu! Nanye nyo zi'si zo kutali mwimbilenyi Muwaha Mulungu.

¹¹ Vilecenyi nyika hamonga ne vikaya vyayo, vyose vimukumye Mulungu. I wanhu wono wekaye ku Kedali, walecenyi wose wamukumye Mwene. Nawo wono wekaye mwi'kaya lya Sela, wembe ne nyemo mu wulawa mu matunda!

¹² Nawo wono wekaye mu zi'si zo kutali wamupele Muwaha Mulungu lilumbo no lukumyo.

¹³ Muwaha Mulungu kabitaga mu milewo yenha citung'ati. Mwene yewikanizize lukulu, kanyhi muhidimbazi ku milewo, katowaga ndulele yo wulugu, kalajilaga wusume kuli walugu wakwe.

Mulungu yakwihuwiza nha vyono kowapela wutazi wanhu wakwe

¹⁴ Mulungu yakutya, “Ane nali nyamaye du vilo vinji. Hamba kuwapitula wanhu wangu. Ninga luno cipango co witume cakondya kufika. Holeka aluno nolila nho mucekulu mono yali mu nghunga yo lusawo.

¹⁵ Nane nogongomeza matunda ne vigongo, noganyaza mahanze hamonga ne mabici. Nonyaza makolongo ga mu malolo, gawe nyika nonyaza hamonga ne malamba ge malenga.”

¹⁶ “Nane nowatonga wanhu wangu wono wali cibofu, wakole mu nzila yono wakali nayikola hamba mwizuwa linji. Nowunoza wutitu wawo, wuwe wuzelu, ne hanhu hono hali sasala-sasala hawe hatelemeye. Nawo wuwu wo wihuwizo wangu, nowebatiliza ho walece kukatala.

¹⁷ Na wose wono wetumbiye vihwani viseswe, na wose wono wakuvitya vihwani vyenjedulwe yo milungu yawo, wawo wose wonyetywa no kukozwa cevu.”

Wulemwe we Waisilayeli ku wutanje

¹⁸ Muwaha Mulungu yakutya, “Ale hulicizenyi ta anye nyo wanhu we ciziwi! Mulanjile behi' nye nyo wabofu ho muwone!

¹⁹ Mwene howa hoyuli yunji mono yali cibofu yawucizize wubofu wo mwitumami wangu, hamba mono yali ciziwi yamucizize mwitumami wangu mono namutuma?

²⁰ Alu nanye Isilayeli, nha mwakondya kuziwona nghani nyinji muno, ninga wulenyi, zina cambuzici kuli'nye? Kanyhi mwina ne makutu go kuhulicila, ninga hamba si mukuzitanga yaye.”

²¹ U Muwaha Mulungu, yo Mulungu mono kezaga no wuhile wo kuponya, holeka yendile kuwukumya wulajilize wakwe hamonga ne mafundo gakwe kanyhi yendile ne wanhu wakwe wagakamise.

²² Ninga alu wanhu wakwe nha wakondya kutekwa, wadindiywe mu zijela, waweza wafungwa. Hambi nha wakondya kuhizwa no kutekwa, na hasina hamba yunji mono kokuza yawaponye.

²³ Alu, wulenyi! Nani wa muli nyenye mono yakuzihulika zono nghulonga? Ninga wulenyi! Mozihulika no kuzibata?

²⁴ Mwene nani mono yawalavya Isilayeli ho watekwe? Yo mweneco Muwaha Mulungu mono sese camusutizya, Hambi nha cekalaga mu mikalile yono si yamwendezaga mwene, hamba kwibata mejizo gakwe gono yacijiza.

²⁵ Holeka nayo yacijidila wukali we likuwo lyakwe, no wusungu we milewo. Ne likuwo lyakwe, likawakolelwa Isilayeli nha moto mukali ninga 'se hamba kumanya zono zacijelelaga yaye, hamba kumanya co cose muli zizo.