Isaya 41 - Luganuzi Luswanu Kuli Wanhu Wose 2002

Mulungu wo witumbilo kuli Isilayeli

¹ Mulungu yakutya nhavi, “Anye nyo zi'si zo kutali, munyamale du twii, muhulicize nene! Anye mwiwikanizaje du, mulete zinghani zenyu ku wuling'anizi, hambi nha motuga cilejeho co kuzilolosa. Cihangulizaje hamonga, ciduwane, cimumanye mono yali ling'ani.

² Mwene nani lo mono yaleta wusume ku wulawa kucilima no kumupela vilungo vyo wusume hanhu ho hose hono yakubita? Hamba nani mono kamupelaga vilungo vyo kuwasumila watemi, hamonga ne makungugo? No mumaje wakwe, wukuwatemanga wagwa ho hasi, wawa nha manghundi. Ne zisonga zakwe zikuweyagaza nhe mawaje, gono gakupemheluswa ne mbeho.

³ Yakuwawinga no kukola yapolile. Kanyhi yakuwa yamanyhile muno kuciza, yakuwatyatya sunga mo mu nzila yono yali yakali si nayikola kwe magulu gakwe!

⁴ Mwene nani lo mono yazinoza zizi zijele? Hamba nani mono yawuwika mwamulizo we zinghomo? Yo nene, ane no Muwaha Mulungu, yo nene mono nali nili baho ku wulawa ha mwamulizo, kanyhi yo nene du no Muwaha Mulungu, mono nowa baho ha ndumilizo ya zose.

⁵ “Ne wanhu wose we zi'si zo kutali, nha wakondya kuziwona zono netuma. Alu nawo wenjilwa no woga, wakucicima so woga. Holeka nawo luno, wekonghola no kuza.

⁶ Nawo i wanghula wo kusesa, alu wakwiyitaza no kwisinyhimika weneco wose.

⁷ I waselemala nawo, wakuwalonjela i watyana zahabu wakutya, ‘Ale mwetuma mulimo muswanu!’ Nayo mono yakucikulunjiza cihwani, yakumusindamika mono yakucilunza-lunza hamonga ne misumali, yakutya, ‘Ka! Mwene wacilunza viswanu si.’ ” Na hanyuma, wawa kuvipanga vihwani hanhu hamonga no kuvitowela ne misumali.

⁸ “Ninga anye nyo Isilayeli, anye muli wanhu mono nene namuhagulenyi, anye nyo wana wo mwendece wangu Abulahamu.

⁹ Nane nghamusolenyi ku wulawa ku mhelo ze yinze. Nghamucemenyi ku wulawa ku zimhilimo zayo. Nghamulonjelenyi nghatya, Anye muli wetumami wangu. Yo nene mono nimuhagulenyi, hamba si nomutajenyi yaye.

¹⁰ Holeka mulece kogopa, ane nha nili hamonga nanye! Ane yo nene Mulungu wenyu, holeka mulece kogofywa na cinji co cose! Ane nomupenyi vilungo, kanyhi nomutazenyi. Nomudimenyi, kanyhi nomuponyenyi.”

¹¹ “Na wose wono wakumukolelwenyi likuwo, wolosumwa no kukolwa cevu. Na wose wono wakulewana nanye, wolofwa.

¹² Wajililile lukulu mono yinze, hamba kwijela kanyhi.

¹³ Ane yo nene Muwaha Mulungu, u Mulungu wenyu, mono nghumusikamyenyi nghutya, Mulece kogopa, ane nomutazenyi.”

¹⁴ Kanyhi Muwaha Mulungu yakutya, “Anye nyo Isilayeli, hamba muwe muli wacefu, kanyhi muli wasocele nhe nyongololo, ninga mulece kuwa no woga, hambi ane nha nomutazenyi. Ane mono nelile, u Mulungu wa Isilayeli, yo nene du mono nomuponyenyi.

¹⁵ Ane nomunozenyi anye muwe nhe lituli hamonga no mutwango wayo mupya, nanye mogakobonga matunda no kugatenjelemula, navyo vigongo vyotijinhika viwe manghundi.

¹⁶ Nanye mogesa mucanyha, nayo mbeho yogapemhelusa, nago gokwiyagazwa ne civulavumbi. Nanye baho nhondo, ho mosangalala, hambi ane nha yo nene mono nili Mulungu wenyu nanye nhondo, ho momhela lilumbo ane mono nelile, u Mulungu wa Isilayeli.

¹⁷ “Na kolo wanhu wangu wakulondola malenga, lono malaka gawo ganyala so nyhilu ye malenga, ane Muwaha Mulungu nowapitula wulombe wawo. Ane no Muwaha Mulungu wa Isilayeli sinowaleka yaye.

¹⁸ Nane nogatula makolongo gahulume mu vigongo mu hanhu hakavu, ne mivwilo ye malenga yihulume mu malolo. Noligalusa linyika hawe malamba ga malenga, ne yisi nghavu hawe ne mivwilo ye malenga.

¹⁹ Noyicindya mibici ye mihagata mu nyika hamonga ne mikungugu, ne mibici midodododo, hamonga ne mizeyituni. Ne mbago yotita mu yisi nghavu, yowa mbago ye mibici ye minanasi ne minghulwa, hamonga ne mibici yinji yinji.

²⁰ Nawo wanhu wose woziwona zizi, wamanye nha vyono nene Muwaha Mulungu yo nitumile zizi. Nawo ho wokwizuka nha vyono Mulungu mono yelile wa Isilayeli, yo yazinozize zizi zijele.”

Muwaha Mulungu yakuyibedegala milungu yo wulambi

²¹ U Muwaha Mulungu, u mutemi wa Isilayeli yakutya, “Nye nyo milungu ye makungugo, ale mulete zinghani zenyu Mulonje nghani zono mwina nazo!

²² Ta muze mucilonjele zono zokwijela mu vilo vyono vikuza, nase ho ciwe cimanyiye lukulu kolo zikwijela. Ale mulolose ha mwande yo wuling'anizi zono zapuluta, mucilonjele ne nhunizo yayo.

²³ Kanyhi mucilonjele na zono zolokwijela hanyuma, nase baho ho comanyila vyono kumbe nanye muli milungu! Kanyhi mosuma kucinozeza nha vyono nyenye mwendile, hamba swanu, hamba kuciletela matamwa, mucimemye woga hamonga ne cogopo ca kuli'nye!

²⁴ Ninga ase cimanyile nha vyono zose zono mukwituma, yo nghani ya bwete du na wose wono wakumuhembenyi, wakwikomaza wali wene du!

²⁵ “Ninga ane nakondya kumuhagula munhu yunji, mono yekaye ku lubavu lwa kusumuka. Nane nomutuma yayanzize milewo yakwe ku lubavu lwa kucilima. Nayo kowazumhila i watemi, yawasambanjile nha malongo, nho muwumba nyungu vyono kaluwaga lilongo lyakwe.

²⁶ Mwene, nani wa muli nyenye mono yali yakondya kuzimanya zizi nha vyono zolokuza, nase ho cimumanye? Ninga ase cimanyile nha vyono, hasina hamba monga wa muli nyenye, mono yazilonga zizi, hasina hamba yunji mono yamuhulicenyi mukuzilonga!

²⁷ Ane yo nene Muwaha Mulungu, mono nali mulongozi kuyilonjela Sayuni zinghani zizi. Kanyhi nghategula zinghani na ku Yelusalemi, nghawalonjela nghatya, ‘I wanhu wenyu wakuza, wakuwuya kono kaya!’

²⁸ Nane nali neza kuyilanga milungu yiyo, nghawona vyono yose, yisina cono yopitula, hakawa hasina hamba yono yapitula zono nayiwuzaga.

²⁹ Holeka milungu yiyi yose, yo nghani ya bwete du, siyosuma hamba kwituma cinji co cose kanyhi yisina hamba vilungo bwete.”