Isaya 40 - Luganuzi Luswanu Kuli Wanhu Wose 2002

Zinghani zo witumbilo

¹ Mulungu wetu yakutya, “Muwasindamice 'nye wanhu wangu! Muwasindamice!

² Muwasikamye wanhu wa Yelusalemi. Muwalonjele nha vyono wakondya kugaya mu nghango yono yiwakwiliye, no wubi wawo nhondo wanenelwa. Hambi nha nakondya kuwalipiciza mu nghango yo wubi wawo.”

³ Ne lizi likulonga kwe vilungo likutya, “Ale, muwikanize nzila yo Muwaha Mulungu mu nyika! Mumutelemezezaje Mulungu wetu nzila ya mu nyika!

⁴ Mufucilize malolo gose mugatenjelemule ne matunda gose. Na mu vigongo molowa mutelemeye, na mono mogali masasala-sasala, namo motelemezwa.

⁵ Ne nhojo yo Muwaha Mulungu yologubulwa, ne wanhu wose woloyiwona. Muwaha Mulungu mweneco yo yehuwiza zizi.”

⁶ Ne lizi likulonga kwa vilungo likutya, “Wuyanzaje nghani.” Nane nghawuza nghatya, “Alo nghanici yene yono niyanze?” Nayo Muwaha Mulungu yakanyitya, “Wanze nha vyono wanhu wose wehwanile mahanze, hamba si wekalaga vilo vinji, wehwanile maluwa ga mu mawimbi.

⁷ I mahanze ganyalaga, nago maluwa gawombaga, lono Muwaha Mulungu yakuleta libeho liwa kugaputa. Na mbeka, wanhu siwekalaga wehwanile mahanze du.

⁸ Na heya, mahanze ganyalaga, nago maluwa gawombaga, ninga nghani yo Mulungu wetu yikalaga cibitilila.”

⁹ Gwe Yelusalemi, alu wubite mwi'tunda litali mucanyha, wukalwanze luganuzi luswanu! Wuzoze hawaha 'gwe Sayuni wanze zo luganuzi luswanu! Wulonje, wulece kogopa. Wugalonjele makaya ga Yuda nha vyono Mulungu wawo yakuza!

¹⁰ Muwaha Mulungu we mihanga kolokuza yateme ne vilungo, kolowaleteleza hamonga ne wanhu wono yawaponya.

¹¹ Kololidima litewa lyakwe nho mudimi. Kolozikongholela hamonga zinyana ze zingholo, yazidinghule mu mawoko gakwe. Kolozitonga mhola mhola zono zikosa.

U Mulungu we ciwene wa Isilayeli

¹² Alo nani mono kosuma kulipima lilenga ko wufumbate mwi'ganza, hamba kuwupima wulanga kwe vidole vyakwe? Hamba munhu kosuma kuwudinghulila muhangha we yinze mu cikombe, hamba kugapima matunda ne vigongo mu vipimo?

¹³ Hamba lunji munhu kosuma kumulonjeleza Muwaha Mulungu cono yetume? Hamba nani mono kusuma kumwijiza, hamba kumulanjiza?

¹⁴ Alo mwene, Mulungu yalondola lihala kwa nani, ho yamanye wizuce, no kwiyijiza nha vyono zinghani zinojeye zitumwe?

¹⁵ Makungugo gose, yo nghani ya bwete du hali Muwaha Mulungu, hambi nha genha mabanhi du ge malenga, ne vizingwa vyo kutali, kaviwonaga vipelumhile muno nhe manghundi.

¹⁶ Ne vilimu vyose vya mu mbago ya Lebanoni, hamba si vikondizye so makumbiko, kuli Mulungu wetu sunga ne mabici gayo, nha macefu ku wasiza moto.

¹⁷ Ne makungugo nha si cinji yaye hali mwene.

¹⁸ Alu mwene, kosuma kumwihwananiza Mulungu nha nani? Hamba si kosuma yaye kumulolosa nha vyono yenha hamba kumwihwananiza yaye.

¹⁹ Hambi mwene nha si yehwanile ne vihwani vyono wanhu wavisesaga, vyono i watyani nawo, wavihiliwaga zahabu, hanyuma wawa kuvinozeza litende lya fweza.

²⁰ Nayo munhu mono yakuwona nha vyono si kosuma wuguzi we fweza, hamba zahabu, mwene kahagulaga mubici we nghulunje wono si wufukunywaga yaye. Nayo kamulondolaga musesi munghula ho yamunozeze cihwani ciseswe cono si cosuma kung'anuka yaye no kugwa hasi.

²¹ Hongo lu agwe wukali namanya yaye? Hamba baho katali si walonjelwa ng'o? Hamba wukali si nahulika na vyono yinze yamula yamula ng'o?

²² Yinze yiyi, yawumbwa na mono yekaye mwi'goda lyakwe lyo wutemi, kucanyha ye yinze kuko ku wulanga. Ne wanhu wono wekaye mono'nze, wejelaga nha vinhu vidodo du, wehwanile mumehe. Mwene yakawukunzulula wulanga kotya mutote, yakawugolola nhe lihema, ho yekale mumo.

²³ Mwene kawawembulaga watemi kanyhi kawa kuwapuvya.

²⁴ Wakuwa wehwanile no mubici mudodo wono wukuhadikwa no kucindicila mulungu-yeye. Nayo Muwaha Mulungu kawa kuleta libeho, nawo wuwa kunyala no kupemheluswa ne libeho nhe mawaje.

²⁵ Alu mwene, kosuma ku mwihwananiza Mulungu mono yelile nha nani? Hamba ho yuli yunji mono yehwanile mwene?

²⁶ Ale ta, wugalamile wulanje ku wulanga! Mono yaziwumba zinyelezi zizo zono wukuziwona, nani lo? Mono yaziwumba, yo yuyo kanyhi mono yakuwa kuzitonga, nhe wasilikale wo wulugu. Kanyhi mwene yazimanyile ne liwalo lyazo zose, kazicemaga nyelezi ne'tagwa lyayo! Mwene yali vilungo muno, holeka hasina nyelezi hamba monga yono yajiliye!

²⁷ Alu mwene anye nyo wanhu wa Isilayeli nhawulenyi 'lu mukung'ung'ulikayiwe nha kotya Muwaha Mulungu si yawumanyile wugaye wenyu, hamba kuyilanga ling'ani yenyu?

²⁸ Alu mwene anye si mumanyile? Hamba mukali nahulika? Hambi Muwaha Mulungu, nha yo Mulungu we cibitilila, kanyhi yo yayiwumba yinze yose. Mwene si kakatalaga, hamba kudobanya yaye. Hasina munhu mono kosuma kugamanya mahala gakwe.

²⁹ Mwene kawapelaga vilungo wono watimbile no kuwonjeleza vilungo wono wasoceye.

³⁰ Sunga ne wazelelo wokatala no kuzilika.

³¹ “Ninga wono wamwitumbiye Muwaha Mulungu yawapele wutazi, wawo wolopegwa vilungo vipya. Wologuluka kucanyha kotya 'ndi, kanyhi wolomangha hamba kukatala yaye wolowa kujenda hamba si wolozilika ng'o.”