Isaya 39 - Luganuzi Luswanu Kuli Wanhu Wose 2002

Wanhu wono watumwa ku wulawa ku Babiloni

¹ Na mu vilo vivyo, Melodaki Baladani, u mutemi wa Babiloni, u mwana wa Baladani. Nayo yakahulika vyono mutemi Hezekiya mutamwa. Hodu nayo yakamwandicila baluwa Hezekiya, yakamutegulila hamonga ne cipegwa.

² Nayo Hezekiya yakawabocela viswanu wa walya wono watumwa yakawa kuwalajila nyumba yakwe ye viwutwa, fweza, na zahabu, hamonga na vye mhunjile swanu, ne vitwalo vyakwe vyose vyo wulugu. Hakawa hasina cinji co cose ca mu zikaya zakwe ze viwutwa vyakwe, hamonga ne hanhu hose mu wutemi wakwe vyono si yawalajila wawo wanhu wono watumwa.

³ Hanyuma muwizi Isaya yakamubitila mutemi Hezekiya yakamuwuza yakatya, “Alu wanhu wawa walawa hayi, na kanyhi wakulonjela cici?” Nayo Hezekiya yakapitula yakatya, “Wanhu wawa, walawa yisi ya kutali muno muno, yisi ya Babiloni.”

⁴ Nayo Isaya yakatya, “Alu wawona cici mwi'kulu?” Hezekiya yakatya, “Waviwona vinhu vyose, sunga na vyose vyono vili mu nyumba ye viwutwa.”

⁵ Hodu nayo Isaya yakamulonjela Hezekiya yakatya, “Alu Muwaha Mulungu we mihanga yakukutya nhavi,

⁶ ‘Lizuwa lyokuza, lono vinhu vyose vyono vili mwi'kulu, hamonga ne viwutwa vyose vyono walezi wako waviwika, vyose vyolosolwa no kukunyhilwa ku Babiloni. Hasina hamba cinhu cimonga cono cilasigala.

⁷ Hamonga na wanji wa muli wanago wako, nawo wolosolwa wategulwe kutali, wakapaswe, wawe wetumami wa mwi'kulu lyo mutemi wa Babiloni.’ ”

⁸ Nayo mutemi Hezekiya yakamanya nha vyono, mu vilo vyakwe, wowa mulamu du. Holeka yakapitula yakatya, “Nghani yo Muwaha Mulungu yono wuyilonjile, swanu.”