Isaya 38 - Luganuzi Luswanu Kuli Wanhu Wose 2002

Mhungo yo mutemi Hezekiya hamonga no wunoje wakwe

¹ Na mu vilo vivyo mutemi Hezekiya yakatamwa yakawa yali behi no kufwa. Nayo muwizi Isaya u mwana wa Amozi, yakabita kumulanga. Yali yeza kumwagana, yakamutya, “Muwaha Mulungu yakukutya vyono alu, wiwikanizaje ne nyumba yako, hambi nha si kokwikala mumi yaye, langa kofwa du.”

² Hodu baho nayo Hezekiya yakawa kupitucila kwi 'jinji, yakawa kumulomba Mulungu yakutya,

³ “Gwe go Muwaha Mulungu, nghukulomba wukumbucile nha vyono ane nakwitumamila ko wihuwilwa ne cogopo, na vyono nhondo zose kanyhi, nitumaga zo wuhile wako.” Hanyuma yakalila muno ko wusungu.

⁴ Nayo Muwaha Mulungu nhondo yakawa kumutuma kanyhi Isaya

⁵ yabite kanyhi kuli Hezekiya, yakamulonjele yatye, “Ane no Muwaha Mulungu, no Mulungu wo mulezi wako Dawudi, niwuhulika wulombe wako, nigawona ne mahozi gako. Holeka nane lu, nokuleka wikale mumi, sunga myaka yikumi na mihano.

⁶ Nane nokuponya gwegwe, hamonga ne likaya lili lya Yelusalemi, mu miwoko yo mutemi wa Ashuli. Nane nojendelela du kulidima likaya.”

⁷ Nayo Isaya yakamupitula yakatya, “Muwaha Mulungu kokupela citanjilo cono cokulajila vyono mwene kokamisa wihuwizo wakwe.

⁸ Muwaha Mulungu, kowugomola ne nyuma nghazo yikumi u muzizi wa mu madalaja gono yazenga mutemi Ahazi.” Nawo muzizi wukawa kuwuya ne nyuma, nghanzo yikumi.

⁹ Nayo Hezekiya yali yeza kupona mu wutamwa wakwe, hodu yakawa kulwandika lwimbo alu lwe lilumbo.

¹⁰ Hamba niwe nili mu wuswanu wo wikale wangu. Ninga vyo nobita du ku yisi ye wafu.

¹¹ Kanyhi nghehwesa nha vyono si nolomuwona Muwaha Mulungu, mu yinze yiyi ye womi. Hamba kumuwona munhu wo wose kanyhi.

¹² U wikalo wangu nha wali wakondya kuduma. Nhe lihema lyono likumwagulwa. Nho mwenda wono wukuwuswa mu citanda. Nane nghehwesa vyono Mulungu yeza kuwudumya wumi wangu.

¹³ Nghawa nghulila cilo cose so wusungu Nghawa kwiwona nha simba yikugabenanjiza mafupa gangu.

¹⁴ Ne lizi lyangu likasocela, likawa yidodo muno. Nane nghawa kulila nha nghunda. Ne meso gangu gakakatala so wugalamila kucanyha. Gwe go Muwaha Mulungu, wumhonye mu wugaye wuwu.

¹⁵ Hambi 'ne ho nolongaci, hambi Muwaha Mulungu nha yo yetumile zizi. Ne nhumbula yangu yiwene wusungu muno muno hamba ne zinhongo zose zanyala.

¹⁶ Gwe go Muwaha Mulungu, ane nowumipila muli'gwe nane nokwikala muli gwegwe du. Holeka wumhonye, wundece mumipe.

¹⁷ No wusungu wangu wopituka wuwe mulamu. Hambi nha wamhonya mu zimbali zose. Wakondya kunenela no wubi wangu wose.

¹⁸ Hambi ku yisi ye wafu, nha hasina yunji mono kosuma kukulumba. Ne wafu hamba si wowitumbila wihuwilwa wako.

¹⁹ Langa i womi wo wakulumbaga. Nha vyono nane luno nghukulumba. Nawo walezi, wawalonjelaga wana wawo zo wihuwilwa wako.

²⁰ Gwe go Muwaha Mulungu, wakondya kumhonya. Holeka nase luno, cotowa masumbi, no kwimba ze lilumbo lyako. Kanyhi cowa kukulumbila mu Nyumba yako mu vilo vyose vyo wikale wetu.

²¹ Na Isaya yakamulonjela mutemi Hezekiya yakubule cibanda co mukuyu, yabandice mu lipu lyakwe, nalyo lyopona.

²² Nayo mutemi Hezekiya yakamuwuza Isaya, yakamutya, “Alu citanjiloci cono condajila vyono nosuma kanyhi kwinjila mu Nyumba yo Mulungu?”