Isaya 37 - Luganuzi Luswanu Kuli Wanhu Wose 2002

Mutemi Hezekiya yakulomba wutazi kuli Isaya

¹ Nayo mutemi Hezekiya yali yeza kuzihulika zono wamulonjela, hodu yakawa kuvidemula vivwalo vyakwe ko wusungu wuwaha muno, yakavwala ligunila, yakawa kwinjila mu Nyumba yo Mulungu.

² Hobaho yakawa kuwatuma Eliyakimu u mwitumami muwaha wa mwi'kulu, na Shebina u mwandici u mwana wa Amozi. Ninga nawo lulo wali wavwalile magunila.

³ Nayo yakawalajiliza wabite wakamulonjele Isaya watye nhavi, “Izuwali lye zuwa lyo wugaye, hambi nha calipicizwa, no kukozwa cevu, caweza nho mucekulu mono yali mu nghunga yo lusawo, ninga yasoceye hamba si yakusuma no kulela.

⁴ Hambi u mutemi wa Ashuli, nha kamutuma mwitumami wakwe ho yaze yamutovule u Mulungu mumi. Holeka nghukulomba, u Muwaha Mulungu, u Mulungu wako yagahulice matovulo gaga, yawalipicize wawo wono wagalonjile. Na kanyhi nghukunena wuwalombele kuli Mulungu i wanhu wetu wono wasigaye.”

⁵ Nayo Isaya yali yeza kuzihulika zinghani zizo zo mutemi Hezekiya,

⁶ hodu nayo yakawa kumupitula mutemi, yakutya, “Gwe Hezekiya, Muwaha Mulungu yakutya, wulece kuwaleceleza Waashuli wakogofye, so wutya ati Mulungu si kokuponya yaye.

⁷ Hambi Muwaha Mulungu, nha komunoza mutemi wa Ashuli yahulice zikulongwa ne wanhu nha vyono u Muwaha Mulungu komusola yamugomole ku yisi yakwe ya Ashuli, yamulece yawulajilwe kuko.”

Waashuli wakumogofya kanyhi Hezekiya

⁸ Mwitumami we Ciashuli yakamanya nha vyono mutemi wa Ashuli yawuka ku Lakishi, nalu wakwihoma ne likaya lya Libina lye behi. Hodu nayo yakawa kumutyatya kuko ho vikalongane nayo.

⁹ Nazo zinghani zikawaficila Waashuli, nha vyono lipuga lye wasilikale we Cimisili, lyono likulongozwa na Tilihaka u mutemi wa Kushi, likuza kuwahoma. Nayo mutemi wa Ashuli yali yeza kuzihulika zizo, hodu yakawa kumutumila baluwa Hezekiya

¹⁰ mutemi wa Yuda yakumulonjela yakutya, “Ane manyile nha vyono, yuyo Mulungu wako mono witumbiye, kakulonjela nha vyono Yelusalemi si yosuma kutekwa no mutemi wa Ashuli. Ninga zizo zilece kukukonga.

¹¹ Nane manyile nha vyono wakondya kuzihulika zono mutemi wa Ashuli yakuwa kuyinozeza yisi yo yose yono yakusaka kuyongomeza. Alu nagwe wukwihwesa nha vyono kopona hongo?

¹² Ninga wumanye nha vyono walezi wangu wo wagongomeza makaya ga Gozani, na Halani, hamonga na Lezefu. Wakawawulaga ne wanhu wose wa Edeni, wono wekalaga ku Telesa, ne milungu yawo hamba si yawaponya yaye.

¹³ Ma, i watemi we makaya ga Hamati, na Alipadi, na Sefalavayimu, na Hena, hamonga na Iva, wali hayi?”

¹⁴ Nayo mutemi Hezekiya yakayibocela baluwa yiyo, mu wulawa mu miwoko ye wanhu wono watumwa wayilete, nayo yakayisoma. Yali yeza kukondya kuyisoma, yakenjila mu Nyumba yo Mulungu, yakayiwika baluwa yiyo hali Muwaha Mulungu,

¹⁵ yakawa kulomba yakutya,

¹⁶ “Gwe go Muwaha Mulungu we mihanga, go Mulungu wa Isilayeli, mono wikaye kucanyha ha ciligati ye Makelubi. Yo gwegwe du Mulungu wuli wene, mono wutemile mu matemi gose ge yinze.

¹⁷ Alu 'gwe go Muwaha Mulungu wucihulice, kanyhi wuzilangaje zono zeza kucijelela. Kanyhi wuzihulikaje zinghani zose zono Senakelibu yakukulonga agwe no kukutovula go Mulungu mumi.

¹⁸ Nase wose nha cimanyile, 'gwe go Muwaha Mulungu, nha vyono i watemi wa Ashuli wagongomeza makungugo menji, no kuzinoza zi'si zawo ziwe nyhiwa,

¹⁹ Wakayikongoga ne milungu yawo, yono na mbeka si yali milungu yaye, langa gali vihwani vye mabici masese na vye mabwe, yono minoze ne miwoko ye wanhu.

²⁰ Alu, 'gwe go Muwaha Mulungu, cikukulomba wuciponye mu miwoko ye Waashuli. Ne makungugo gose ga mono'nze ho gamanye vyono, agwe yo gwegwe du Mulungu wuli wene.”

I nghani ya Isaya kuli mutemi Hezekiya

²¹ Nayo Isaya yakamutumila mutemi Hezekiya wanhu, wamutegulile lipitulo lyo wulombe wakwe kuli Mulungu,

²² na vyono Muwaha Mulungu yamupituye, yakutya, “Agwe Senakelibu, likaya lya Yelusalemi likukusekanga muno, kanyhi likubedegaye muno.

²³ Alu mwene, wukwihwesa nani lo, mono wali kumutovulanga no kumwizwajiza? Agwe mbeka wawula cogopo kuli'ne, ane no Mulungu mono nelile wa Isilayeli.

²⁴ Agwe wukatuma wetumami wako, waze kono kwangu wanyidunhumulile ku soko ye matuka gako gose go wulugu, wukutya, vyono agwe wagasuma matunda matali ga Lebanoni. Kanyhi wukwikumya nha vyono wagatemanga mabici matali go muhagata, hamonga ne misonobali yayo miswanu. Kanyhi na vyono wenjila sunga mo muciligati muno muno ye mbago.

²⁵ Na kanyhi wukwidunhumula vyono wahimba masima mu zi'si zo wujenzi no kung'wa ne malenga gayo. Na vyono ne magulu ge wasilikale wako, galikanyanjila ne likolongo lya Nile, sunga likanyala.

²⁶ “Alu 'gwe hongo hamba si wali wumanyile vyono zizi zose yo nene mono naziwikaniza ku wulawa katali, ho zize ziwe nhavivyo? Sunga nalu, nakondya kuzifisiliza. Hambi nha yo nene mono nakupela vilungo ho wugongomeze makaya gono gena magomawakali, gawe matongo.

²⁷ Ne wanhu wono wekalaga mu makaya gago, nghawawusiza vilungo vyawo, wakawa no woga wuwaha, wakazilika. Wakehwana nhe mahanze gono gali mwi'wimbi, hamba mahanze gono gatimbile gono gacindice mwi'tembe mucanyha, gono gosuma kuwomvywa ne mbeho ye civuce ya kucilima.

²⁸ “Ninga ane, nizimanyile zako zose, na zono kwitumaga, na kono kujendelaga. Kanyhi nghumanyile na vyono wukuwa kungholelwa likuwo.

²⁹ Ninga nane nakondya kuzihulika zizo ze likuwo lyako, hamonga no widunhumuzi wako. Ninga nane luno, nokutobola zimhula zako, nghuvwice ndobogo, hamonga no luzali mu mulomo wako. Hanyuma nghugomole mu nzila yi yilya kono walawilila.”

³⁰ Hanyuma Isaya yakamulonjela mutemi Hezekiya, yakamutya, “Aci co citanjilo ca zizo zono si zoleka kwijela. Mwakawu, hamonga no mwaka wono wukuza, anye molya wuhemba wono wupasiciye weneco. Langa mu mwaka we kadatu, aho langa ho molohadika nyo weneco, no kududula nhwanga yenyu. Molohadika ne mizabibu no kulya zabibu zayo.

³¹ Ne wanhu wa Yuda wono wasigala, wolotula nhe vilimwa vyono mbeyu yayo yinjize milela yayo kusi muno yo muhangha, no kulela mana.

³² Namo mu Yelusalemi na mwi'tunda lya Sayuni, molowa mowali wanhu wono wasigaye. Hambi Muwaha Mulungu we mihanga, nha yo yatemya zizi zijele.

³³ “Na kanyhi azi zo nghani zono Muwaha Mulungu yakuzilonga kuli mutemi wa Ashuli, yakutya, U mutemi wa Ashuli, hamba si kosuma kwinjila mwi'kaya lili, hamba kuguma songa monga du. Hasina musilikale hamba monga mono yena ne ngula yakwe, mono kolisejelela likaya, hamba hasina mono kololipilima likaya, hamba kulizenjela yigagala.

³⁴ Nayo mutemi wa Ashuli kowuya ne nyuma yatyatizye nzila yono yayizize, hamba kwinjila mwi'kaya lili yaye. Ane nene no Muwaha Mulungu, vyo nghutya.

³⁵ Nane nolidima likaya lili no kulikamisa, ku soko ye lilumbo lyangu, na ku soko yo wihuwizo wono namwihuwiziza Dawudi u mwitumami wangu.”

³⁶ Lolulolulo malayika wo Muwaha Mulungu yakawa kubita ku nghambi ye Waashuli, yakawa kuwawulaga wasilikale we Waashuli waficile elufu yigana limonga na makumi munana na yihano. Na mwizuwa lye kejete, hakali mitondo muno muno, wasilikale wose we Waashuli wakawa wakondya kufwa!

³⁷ Nayo Senakelibu u mutemi we Waashuli, yali yeza kuziwona zizo, hodu yakawa kutuluka yakawa kuwuya ku Ninawi.

³⁸ Na mwi'zuwa linji lono yali yenjiye mu wuhembelo wo mulungu wakwe Nisiloki, yakuhemba, ale baho, i wanagwe wejete Adilameleki na Shalezeli, wakawa kumusepa, wakawa kumuwulajila mumo sogo yawo ne mimaje yawo. Wene wakawa kutiziza ku yisi ya Alalati. No mwanagwe yunji, litagwa lyakwe yali Esale-hadoni yuyo yo yakahala wutemi wo sogo yawo.