Isaya 36 - Luganuzi Luswanu Kuli Wanhu Wose 2002

Waashuli wakuyogofya Yelusalemi

¹ Na mu mwaka we likumi na yine, lono Hezekiya yali mutemi wa Yuda, Senakelibu u mutemi wa Ashuli, yakagahoma makaya ga Yuda ge magomawakali, yakagasola.

² Hanyuma yakamutuma mwitumami wakwe muwaha, hamonga ne lipuga liwaha lye wasilikale, ku wulawa ku Lakishi, wabite ku Yelusalemi, wakamulonjele mutemi Hezekiya, yelavye mweneco kuli Senakelibu. Nayo mwitumami yuyo, yakema behi ne likololozi lye lilamba lya kucanyha, mu nzila ngazi yono yakolelaga ha mugunda wo mukanza myenda.

³ Hobaho Wayuda wadatu wakawa kuza kumuhinjiliza, nawo wali awano. Eliyakimu u mwana wa Hilikiya u mwitumami muwaha wa mwi'kulu, na Shebina u mwandici, hamonga na Yowa u mwana wa Asafu, mono yandikaga zinghomo ze zinghani ze vilo vivilya.

⁴ Nayo u mwitumami we Ciashuli, yakawalonjela vyono, u mutemi wa Ashuli yakusaka kumanya, cicici cono mutemi Hezekiya yetumbiye.

⁵ Kanyhi yakutya, “Mwene Hezekiya wukwihwesa wulonje du wuli wene, wo wosuma kwituma mulimo we vilungo we wasilikale? Alo mwene, wukwihwesa nani lo mono kokutaziza, lono agwe weza kuyibedegala yisi ya Ashuli?

⁶ Ane manyile nha vyono, agwe witumbiye vyono yisi ya Misili yo yokutaza. Ninga wumanye, nha vyono yiyo, yowa nho munhu mono yakusola lidete-lulenga, kawa kujenda yakwisimatiziza, ninga wumanye vyono lidete lilyo lyobeneka likucifugule, mu muwoko wako. Ale, no mutemi wa Misili nayo vyo kowa yenha, hono munhu yunji yamwitumbile.”

⁷ Nayo yu yulya u mwitumami we Ciashuli yakajendelela kulonga yakatya, “Hamba lunji mononjela nha vyono anye mumwitumbiye Mulungu wenyu? Heya hamba yiwe nhavivyo, ninga si yo yuyu Hezekiya mono yahawusa hanhu hose hono helile ho Muwaha Mulungu, hamonga ne makumbicilo gayo, lono yawalonjelela wanhu wose wa Yuda na Yelusalemi, vyono wose wawe kubita kuhemba ha cikumbicilo cimonga du.

⁸ Holeka alu, nane nowika ha mwande yenyu wisumanize no mutemi wa Ashuli. Ane nomupelenyi fwalasi elufu nyejete, hono musume kutuga wanhu wenji wono wosuma kuzitumamila.

⁹ Ninga waco nye! Nha si mosuma kwisumaniza hamba no mwitumami mudodo du bwete, wo mutemi wa Ashuli, na 'kuno muwalanjiliye Wamisili wamuletelenyi matuka go wulugu hamonga ne wasilikale wapanda fwalasi.

¹⁰ Alo 'nye mukwihwesa nha vyono lono nayihomela yisi yenyu no kuyongomeza, mono yanhaza nani? Alu mumanye nha vyono, Muwaha Mulungu yo yamhela wutazi wakwe. Hamby nha yo mweneco mono yanonjela vyono nize niyihome no kuyongomeza.”

¹¹ Eliyakimu na Shebina na Yowa, nawo wakamulonjela yuyo mwitumami wakatya, “Alu, wulongane nase mu nonga ye Cialameya. Hambi nase nha ciyimanyile nonga yiyo. Ninga wulece kulonga mu nonga ye Cihebelaniya, hambi wanhu wose wono wekaye mucanyha ye lijinji, nha wakuyihulika.”

¹² Ninga mwene yakamupitula yakatya, “Alu, 'nye, mulece kwihwesa nha vyono mutemi wa Ashuli kanhuma ho nonje zizi na nyenye hamonga no mutemi wenyu du, aa ng'o. Langa nghulonga na kuli wanhu wose wono wekaye mwi'jinji mucanyha nawo wose wazihulice. Hambi wene nha wo wolya mavi gawo, kanyhi wang'we ne matunzi gawo weneco, hamonga na nyenye wose.”

¹³ Hodu nhondo mwitumami yuyulya, yakenuka yakema wima, yakawa kwanza kuzoza mu nonga ye Cihebelaniya, yakutya, “Ale, wose muhulicize zono mutemi wa Ashuli yakumulonjelenyi.

¹⁴ Yakumusugulenyi, nha vyono mulecele lukulu kuhulika wukonji wa Hezekiya. Hamby nha yakumukonjenyi du, hamba si kosuma kumuponyenyi yaye.

¹⁵ Kanyhi, mulece kumuleceleza yamupepelezenyi mumwitumbile Muwaha Mulungu. Mulece kwihwesa nha vyono Muwaha Mulungu komuponyenyi, no kugemila mapuga getu ge Waashuli ho galece kulisola likaya lyenyu.

¹⁶ Holeka mulece kuzihulika zono yakuzilonga Hezekiya ye! Hambi mutemi wa Ashuli, nha kalajiliza vyono muwuce mwi'kaya mwiyilavye nyo weneco kuli mwene. Na hono munoze nhavivyo, wose mokombolwa muwe kulya ne zabibu zenyu zono zili mu mibici yenyu ye mizabibu, hamonga ne zinghuyu zono zili mu mibici yenyu ye mikuyu, hamonga no kung'wa malenga gono gakulawa mu visima vyenyu nyo weneco,

¹⁷ sunga yaze yamusolenyi yamutegulenyi mukekale mu yisi yono yihwanile yisi yenyu, hono howa ho yili ne migunda ya zabibu, yono yosuma kumupelenyi divayi, kanyhi no wuhemba wono mowa kunoza mikate.

¹⁸ Holeka mulece kumuleceleza yuyo Hezekiya yamuputuzenyi, ho mwihwese nha vyono Muwaha Mulungu komuponyenyi. Mwihwesaje ta! Mwene ho yili milungu yo yose ye nghungugo yo yose, yono yasuma kuyiponya yisi yawo ku wulawa mu miwoko yo mutemi wa Ashuli?

¹⁹ Na hono yali yiwe vyo yinha, alu milungu ya Hamati na Alipadi yili hayi lo? Hamba milungu ya Sefalavayimu, nayo yili hayi? Wulenyi ho yuli mulungu hamba monga wa muli milungu yiyo, mono yayiponya Samaliya?

²⁰ Mwene na nili lwene, lono milungu yi yino yose ye zi'si zizo, yono yasuma kuyiponya yisi yayo mu miwoko yo mutemi wa Ashuli? Alu hono zili nhavivyo, alu cicici cono coleka anye mwihwese nha vyono Muwaha Mulungu kosuma kuyiponya Yelusalemi?”

²¹ Ninga wanhu wose wakanyamala twii, nha vyono wali wakondya kulonjelwa no mutemi Hezekiya wanyamale. Holeka si wapitula hamba nghani bwete.

²² Ninga ho bahobaho Eliyakimu na Shebina, hamonga na Yowa, wakavidemulanga vivwalo vyawo ko wusungu wuwaha, wakawa kubita kuli mutemi Hezekiya kumumanyiza zizo zose zono mwitumami we Ciashuli yalonjile.