Isaya 35 - Luganuzi Luswanu Kuli Wanhu Wose 2002

Nzila yo Wusiwanulwe

¹ Hambi nyika nha yosangalala. Ne maluwa gobonhola mu mbago.

² Nayo nyika yolokwimba no kusangalala so nyemo, hambi nha yolowa yanoga yawa swanu nhe matunda ga Lebanoni, na kanyhi yowa yina moso nhe migunda ya Kalimeli na Shaloni. Ne wanhu wose woloyiwona nhojo yo Muwaha Mulungu. Kanyhi wolowuwona wuwaha ne vilungo vyakwe.

³ Muyipele vilungo miwoko yono yisoceye, hamonga ne mafugamilo gono gakucicima so wusocele.

⁴ Muwalonjele wono wena nhumbula nyoga, mutye, “Ale, mweze ne vilungo, mulece kuwa na woga! Mulungu kokuza no kumuponyenyi kokuza yawalipicize walugu wenyu.”

⁵ Ne wabofu wolonuguzwa meso, wawone, nawo we ciziwi, wolosuma kuhulika.

⁶ Nawo we citewe, wolozumha-zumha no kuvina, nawo wono wali cibwibwi, wolokwimba na nyemo. Vikolongo vye malenga vyolohuluma mu nyika.

⁷ No musawawa wono wuli moto, wolopituka wuwe yilamba, ne yisi nghavu, yolomema mivwilo ye malenga. Ne hanhu hono macewe gekalaga, holocindika mahanze, hamonga ne madete-lulenga.

⁸ Kanyhi baho holowa na nzila mbaha, ne nzila yiyo yolocemwa “Nzila yo Wele.” No munhu mubi si koloyikola nzila yiyo langa yowa ku soko ye wanhu wono wayityatizye hamba wawe walele, ninga si wokwajilila mu nzila yiyo.

⁹ Ne masimba si golowa mumo yaye hamba malimu makali, si goloyikola nzila yiyo. Langa wawo du wono Muwaha Mulungu yakondya kuwaponya wawo du wo woloyikola nzila yiyo wakuwuya ku kaya.

¹⁰ Nawo wolokwinjila mu Yelusalemi wasangalaye, wakwimba ne mazi mawaha so nyemo, wolowa wasangalaye cibitilila, hambi wukalale no wusungu nha vyolowucila lukulu muli wene.