Isaya 34 - Luganuzi Luswanu Kuli Wanhu Wose 2002

Mulungu kolowalipiciza i walugu wakwe

¹ Alu muze nye nyo wanhu we makungugo gose! Mwihangulize hamonga muhulicize. Nagwe go yinze, hamonga ne wanhu wose mono mwikaye mumo, muze muhulicize.

² Hambi Muwaha Mulungu nha yawakoleywe likuwo makungugo gose, hamonga ne wasilikale wawo wo wulugu. Nayo yakondya kuwawalila wongomezwe.

³ Kanyhi ne mivimba yawo, si yolozikwa yaye, langa yololekwa yiwole no kulavya munungho mubi. Ne matunda gose, golodunghuwala so sakami.

⁴ Nalyo lizuwa no mwezi, hamonga ne zinyelezi, vyolotulanjika vyose viwe manghundi. Nawo wulanga woloweya no kupalinjika nha nyhingo mhalinje. Nazo zinyelezi, zololagala hasi nhe mahamha gono gakulagala mu mubici wo muzabibu, hamba mu mukuyu.

⁵ Nayo Muwaha Mulungu yakondya kuwuwikaniza mumaje wakwe kuko ku wulanga, nawo woyitowa Edomu, i wanhu wono wawiciywe wongomele.

⁶ No mumaje wuwo wolokwila sakami ne mhama ye zingholo ne zimhene zono zikuwa kulavywa makumbiko. Nayo Muwaha Mulungu kololavya makumbiko gago mwi'kaya lya Bozila. Kowunoza wuwulaji wuwu wuwaha mu yisi ya Edomu.

⁷ Nawo wanhu wolomalika nhe zimbogo za mu mbago ne zinghambaku zindodo-ndodo. Ne yinze yolodunghuwala so sakami, kanyhi yolomema mhama yose.

⁸ Nalyo lyolowa lyo lipango lyono Muwaha Mulungu, koloyiponezya Sayuni, no kwilipiciza kuli walugu wakwe.

⁹ Ne makolongo ga Edomu, golohunduswa gawe lami. Ne manghundi gayo, gawe libwe lye cibiliti. Ne yisi yose yologubikwa ne lami.

¹⁰ Nayo lami yolowa yigubice mu yisi yose misi ne cilo, ne malyosi gayo gowa kudoma kucanyha cibitilila. Nayo yisi yokwikala vyo yitongo du ndelo na ndelo. Hamba hasina yunji kanyhi mono kolokola mu yisi yiyo.

¹¹ Nago matuwi ne mahowe go golokwikala mu yisi yiyo. Nayo Muwaha Mulungu koloyinoza kanyhi yilece kulela yiwe nha vyono yali lono yali yikali si nawumbwa.

¹² Kanyhi mu vilo vivyo, holowa hasina mutemi mono koloyitema yisi. Hambi ne walongola wose, nha wolowa wakondya kuwuka.

¹³ Nago mamivya hamonga ne matundulu, go golocindika mu makaya gawo go wutemi, na mu makaya gono mazenjele magomawakali. Nago macewe ne matuwi, wolowa wo wikalo wago.

¹⁴ Ne malimu ga mu mbago golowa kuyumba-yumba mumo. Nago mamyuhe mabi, gowa kwicemeleza geneco. Nalyo lizoka lye cilo, lyowa kuza mumo likulondola hanhu ha wuceho.

¹⁵ Nago matuwi golozenga mumo manhuli gayo, gataje ne magangha, gaganghase ne mana gayo, gagawilusize mumo sunga gaguluce. Nazo zi'ndi, zolowa kuza monga monga zikwihanguliziza zose mumo.

¹⁶ Ale, mulondole-londole mu citabu co Muwaha Mulungu, cono cikulolosa ze mikalile ye viwumbwa vyumi, mucisome, muziwone zono zikulongwa mumo. Hambi nha hasina ciwumbwa hamba cimonga cono colokwajilila. Na kanyhi hasina hamba cimonga cono cisina muyagwe. Hambi u Muwaha Mulungu, nha yo yazilajiliza ziwe nhavivyo. Kanyhi yo mweneco du mono kolovikongholela viwumbwa vyose hamonga.

¹⁷ Kanyhi yo mweneco du Muwaha Mulungu mono kolovigawila yisi, no kuvipela hanhu ho kwikala, hanhu na havyo. Navyo vyokwikala mumo mu yisi, ndelo na ndelo. Navyo lyowa lye gawo lyavyo sunga cibitilila.