Isaya 33 - Luganuzi Luswanu Kuli Wanhu Wose 2002

Kulomba wutazi

¹ Woyi he kuli'nye nyo walugu wetu! Hambi nye nha mwagaluka kanyhi mukahiza. Ninga anye hasina mono yamugalukajenyi hamba kumuhizizenyi yaye. Ninga zinghani zenyu zizo zo wugaluci, hamonga no wuhizi, vyose vyoloduma lwa kamonga du. Hambi nanye nha molowa kwihiziza no kwikonga nyenye wose.

² Gwe go Muwaha Mulungu, wuciwonele lusungu. Hambi ase, nha cikwitumbiye gwegwe du. Weze kucikamisa vilo vyose, kanyhi weze kuciponya mu vilo vye magayo.

³ Na lono wukucilewanila, i makungugo gakutiza ku soko ye lizozo lyo wulugu.

⁴ Ne vinhu vyawo vikupumhwa no kusolwa mateka.

⁵ Lanjenyi ta u wuwaha wo Muwaha Mulungu vyono winha! Hambi mwene nha yo mutemi we vinhu vyose. Mwene koyimemya Yelusalemi wihuwilwa hamonga ne ling'ani.

⁶ Kanyhi koyipela wusikame mu nghungugo. Kanyhi kowa kuwadima wanhu wakwe nhondo zose, no kuwapela mahala hamonga no wizuce. Ne cogopo co Muwaha Mulungu, yolowa yo sawo yawo mbaha.

⁷ Lanjenyi ta, i we citung'ati wo wakulila wakulondola wutazi. Nawo wetumami wono wajelaga kuleta mulamu, wakulila ko wusungu wuwaha muno.

⁸ Ne zinzila zimbaha, zose zeza zina mbali, sunga ne wanhu weza si wakukola mu zinzila zizo kanyhi. Wilumbanize, hamonga ne cilagane, vyakondya kubenwa. Heza hasina hamba munhu monga kanyhi mono yakuvitonganiza yaye.

⁹ Alu yisi yakondya kulekwa, nayo yikusocela. Ne mbago mbaha ya Lebanoni, yanyala. Sunga ne lilolo lya Shaloni lyo moso mwinji, nalyo lyeza nha nyika. Namo mu Bashani na mwi'tunda lya Kalimeli, nhondo ne mahamha geza kukung'unhika mu mabici gayo.

U Muwaha Mulungu yakuwasugula i walugu wakwe

¹⁰ Muwaha Mulungu yakugalonjela makungugo gose yakutya, “Ale nokwituma, ho nilajile vyono ane nina vilungo.

¹¹ Hambi anye, nha mukwihwesa mahweso gono gasina cambuzi, na zose zono mukwituma, mukugaya bwete du. Ninga mumanye vyono, u muhe wangu wihwanile nha moto wono womongomezenyi.

¹² Nanye molofugunhika nhe mabwe gono wakuwa kuganyanya i wanoza swakala, mowa nhe mamivya gono ganyanywa gatakamila gawa mavu.

¹³ Holeka muwalekaje wanhu wose wono wali behi na wono wali kutali, wazihulice ze metumo gangu, ho wavimanye vilungo vyangu vyono vinha.”

¹⁴ Ne wanhu wabi wa ku Sayuni, wose wakucicima so woga, akuno wakutya, “Mbeka ning'aniza yo Mulungu yihwanile no moto wono wunyanyaga cibitilila. Alu mukwihwesa, yunji wa muli sese kosuma kupona mu moto wuwo?”

¹⁵ Ninga yene, kosuma kupona hono wuwe wuli mwituma ze ling'ani no kulonga ze ling'ani. Holeka wulece kwitumamila wuwaha wono wina nawo ho wuwakonje-konje waciwa, hamba wulece kubocela mafupo. Kanyhi wulecele lukulu kwilunza ne wanhu wono wehwesaga zo wuwulaji, hamba kwituma zimbi.

¹⁶ Na mbeka hono wulece kwituma zimbi zizo, nagwe kokwikala wupolile. Kanyhi kowa wuli mu wucitilwe wuwaha muno, nha kotya wuli mugati ye magomawakali gono gakamile muno muno. Nagwe kowa ne ndigwa yo kulya, hamonga ne malenga go kung'wa.

U lukumyo lwa mu vilo vyono vikuza

¹⁷ Hanyuma kanyhi molomuwona mutemi mono kolowa yatemile mu nhojo mbaha, mu yisi yono yitandaye mu zimbavu zose.

¹⁸ No woga wenyu wono mwali mwina baho katali wo kutowezwa kodi ne wajenzi, hamonga ne watandizi, vivyo vyose movisemwela lukulu.

¹⁹ Kanyhi hamba si molowawonela lukulu i wajenzi wedunhumuzi, wono walongaga nonga yono si muyimanyile yaye.

²⁰ Ale, mulanje ta ku Sayuni, likaya lyono ho hanhu hono canozezaga zi sikukuu zetu. Muyilangaje ta Yelusalemi! Baho howa ho hanhu du hono cosuma kwikala ko mulamu! Hambi nha howa hehwanile lihema lyono si lilawuswa yaye, lyono sunga ne zimambo zalyo, si zilasumika hamba hadodo kuwukulwe. Hamba ne milejehe yalyo si yiladumuka yaye.

²¹ Hambi u Muwaha Mulungu nha kolocilajila lukumyo lwakwe. Nase colokwikala mu zinyenje ze makolongo magazi hamonga ne vikolongo. Na mumo si zolokola ne zingalawa ze walugu yaye.

²² Ne milejehe yose ya mu zingalawa zizo, yitimbile du, ne matote gayo hamba si gakugoloka yaye!

²³ Holeka nase cosuma kuyisola sawo yose ye wasilikale we walugu wetu. Nase cowa cina sawo nyinji yono cosuma kuwagawila sunga na wono wali citewe. Nayo Muwaha Mulungu mweneco du yo kolowa mutemi wetu. Yo kolocitema no kucidima.

²⁴ Ne wanhu wose wono cowa cikalane nawo mu yisi yetu, hasina hamba monga mono kolo kwing'ulanza yawe kutya yatamwa, ne wanhu wose wono wokwikala mumo, wolonenelwa wubi wawo.