Isaya 31 - Luganuzi Luswanu Kuli Wanhu Wose 2002

Mulungu koloyidima Yelusalemi

¹ Woyi hee, kuli wose wono wabitaga kulondola wutazi ku Misili. Hambi nha wetumbiye vilungo vyo winji we wasilikale wa Misili, nha cinji, zifwalasi ne matuka go wulugu, hamonga ne wasilikale. Ninga hamba si wamwitumbiye Muwaha Mulungu, u Mulungu mono yelile wa Isilayeli, hamba si wakumulomba yawapele wutazi.

² Ninga mwene Mulungu, yamanyile zono yakwituma! Mwene kaletaga wongomele, kanyhi kawalajilaga cogofyo cakwe mu nzila yo kuwalipiciza i wanhu wabi, hamonga na wono wakuwacitila.

³ Ninga Wamisili nha wanhu du, hamba si milungu yaye. Sunga ne zifwalasi zawo nha nimu du, hamba si muhe yaye. Na lono Muwaha Mulungu yakwituma, likungugo lye vilungo lyolotijinhwa, nalyo likungugo lyono lisoceye lyono likutazwa, lyologwa. Nago gose vyono mejete, wolokongomezwa.

⁴ Muwaha Mulungu yakanonjela yakatya, “Nawo wadimi hamba wazoze vyono wozoza, yowa nghani ya bwete du, hamba si wosumila lukulu kulyogofya lisimba, ho liyilecele nimu yono liyiwulaje. Holeka nane yo nhavivyo, hasina cinhu co cose cono cosuma kunyimila ane no Muwaha Mulungu we mihanga, ho ndece kulidima litunda lya Sayuni.

⁵ Nha vyono ndeje yipapatikaga hacanyha ye linhuli lyono lina mana gayo ho yigadime, ale nane no Muwaha Mulungu u Mudaha Vyose, vyo noyidima Yelusalemi kanyhi noyicitila no kuyikamisa.”

⁶ U Muwaha Mulungu yakutya, “Anye nyo wanhu wa Isilayeli, mwakondya kunhendela wubi, hamonga no kumbedegala. Ninga aluno muwuye, mumbuyile nene!

⁷ Ninga lizuwa lyokuza, lono anye wose molovitajila lukulu i vihwani vyose vye fweza na vye zahabu, u wubi wono mwenozeza nyenye nyo weneco kwe miwoko yenyu.

⁸ Nayo yisi ya Ashuli, yolokongomezezwa lukulu mu wulugu, ninga si kwe vilungo vyo munhu yaye. Nawo Waashuli wolotiza ku wulugu wuwo. Ne wazelelo wawo, wolonozwa wawanda.

⁹ Nayo mutemi wawo kolotiza so woga. Nawo wetumami wakwe, wolokwinjilwa no woga wuwaha, wolotiza wazilece ne zibendela zawo zo wulugu.” Muwaha Mulungu vyo yakutya, u Muwaha Mulungu mono yakuwa kuhembwa mu Yelusalemi, mono no moto wakwe wakaga mumo so makumbiko.