Isaya 30 - Luganuzi Luswanu Kuli Wanhu Wose 2002

Wilumbanize ne yisi ya Misili wono wusina cambuzi

¹ U Muwaha Mulungu yakutya, “I walongola wono watemile mu yisi ya Yuda, wose wali mu wongomezwe du, hambi nha wambedegala'ne. Wene 'mbi nha wakwituma zono zili mu mahweso gawo du, zono ane si niwakomboye wazitume. Kanyhi wakwilumbaniza no wilumbanize wono ane si niwakomboye wawunoze. Wakucila konjeleza wubi mucanyha yo wubi wunji.

² Wakubita kulondola wutazi ku Misili, akuno si wamuye kumbuza 'ne. Ati wakusaka yisi ya Misili yo yiwadime, na ku soko yiyo holeka 'lu, wamwitumbila muno u mutemi wa Misili.

³ Ninga yuyo mutemi wa Misili, kowa yasina vilungo vyo kuwataziza yaye. Hambi u wutazi wono wolawa kuko ku Misili, nha womalicila du mu wongomele wuwaha muno.

⁴ Hamba wawe wawaha we yisi ya Misili, wakondya kwinjila mu makaya ga Zowani na Hanesi, gono gali mu wutemi wa Misili,

⁵ ninga i wanhu wa Yuda wolokalala vyono wali wetumbiye likungugo lyono si lyowaletela cambuzi, langa likuwagwisa du, hamba kuwapela wutazi nha vyono wali walanjiliye.”

⁶ Ayi nayo yo nghani yo Mulungu kuli vilimu vyose vyono vikaye mu nyika yo lubavu lwa kutakama, yakutya, “I wawaha wa Yuda, wajendaga muhinzo mutali, wakukola mu yisi yono yina mbali nyinji, i hanhu hono gekalaga masimba, mono mogali mazoka gono gena sumu nghali muno, hamonga ne mazoka gono gagulukaga. Wakukola mumo akuno ho wapaciye ne vinhu vyo wuguzi wukamu muno mu zindogowe na mu zingamiya zawo, ho walitegulile vipegwa likungugo lyono si lyosuma hamba kuwapela wutazi wo wose yaye.

⁷ Hambi Misili, nha yisina wutazi wo wose hamba wudodo bwete. Si holeka nane nghayicemela yiyo Misili litagwa lya fumbo, lyono likutya, ‘Nzoka yono yisina Sumu.’ ”

Wanhu wono wasina cihuliko

⁸ Mulungu yakanonjela nizandice mu citabu ze wanhu vyono wenha, ho hawe ne cikumbucizo ca nhondo zose cono cikulajila zo wubi wawo vyono zinha.

⁹ Hambi wene nha wasina cihuliko kuli Mulungu nhondo zose. Wekalaga wakulamba du, hamba si wendile no kugebata mejizo go Muwaha Mulungu yaye.

¹⁰ Wakuwalonjela wawizi wanyamale twii, wakutya, “Anye nyo wawizi, mulece kucilonjela za hayi ze ling'ani. Langa mweze kucilonjela zono na sese cosaka cizihulice. Mucilekaje 'se cijendelele no wukoci wetu.

¹¹ Holeka muwuce mu nzila yetu, hamba mulece kucimila mu wukolo wetu. Nase hamba si cikusacila lukulu kuzihulika zinghani zo Mulungu wenyu, u Mulungu wa Isilayeli.”

¹² Ninga 'lu, u Mulungu mono yelile, u Mulungu wa Isilayeli yakutya, nhavi, “Alu vyono mwakondya kuzibedegala zono nghumulonjelenyi, nanye mwakondya kuwetumbila wawo wanhu wagazi kanyhi walambi.

¹³ Nane nghumutyenyi vyono muli wasutyi. Alu mwehwana ne lijinji litali muno, lyono lina lizatu, lyono lidemuce ku wulawa kucanyha sunga ho hasi. Nanye mogwa hasi nhinicizo.

¹⁴ Nanye motulanjika mwiyagale nhe nyungu yono yitulice vibi no kuzaganzika, hawe hasina hamba cizaye cidodo cono cosigala, cono cokwila hamba kupalila moto bwete, hamba kukupila kunze malenga gono gali mwi'kandilo.”

¹⁵ Kanyhi Muwaha Mulungu we Mihanga, mono yelile, u Mulungu wa Isilayeli, yakuwalonjela wanhu yakutya, “Ale mumbuyilaje wose, kanyhi munyitumbile, nanye ho mowa ne vilungo, kanyhi mowa mupolile.” Ninga nye mukulema!

¹⁶ Ati langa mukusaka mwiponye nyo weneco kuli walugu wenyu, mu nzila yo kupanda zifwalasi zenyu mumanyhe muno, muwatize. Heya vyo yinha, hambi nye nha mukusaka mwiponye du! Mukwihwesa vyono zifwalasi zenyu zowa manyhi kuciza. Ninga mumanye nha vyono, wawo i walugu wenyu wono wakumutyatililenyi mu nyuma, wowa wamanyhi muno muno kumucizenyi nyenye.

¹⁷ Kanyhi mumanye vyono muli nyenye, wanhu elufu monga, womutiza musilikale yumonga du we walugu wenyu, kolo wakumuwona yakuza. Holeka ku soko yiyo, wasilikale wahano du we walugu, womukwilenyi kumunozenyi anye wose mumanyhe no kutiza. Kanyhi howa hasina cinji co cose cono mosigazizwa mu wasilikale wenyu, langa libici lyo kutumbicila bendela lyo lyosigala lili wene du mwi'tunda mucanyha!

¹⁸ Ninga hamba nhavivyo, mwene Muwaha Mulungu wo lusungu kowa vyo yakali yakumuwonelenyi lusungu du. Kanyhi yewikanize ho yamuwonelenyi lusungu, hambi mwene nhondo zose nha ketumaga ze ling'ani. Holeka wamoti wono wamwitumbiye u Muwaha Mulungu.

Mulungu kowamotya wanhu wakwe

¹⁹ Nanye nyo wanhu mono mwikaye mu Yelusalemi, hamba si mololila kanyhi yaye. Hambi Muwaha Mulungu nha komululenyi, na kolo mukumulilila mukusaka wutazi kuli mwene, nayo komutazenyi.

²⁰ U Muwaha Mulungu komukozenyi mu magayo, ninga kanyhi mweneco kowa yali hamonga nanye ho yamwijizenyi, nanye hamba si momulondola yaye.

²¹ Nanye kolo mukupatuka mu nzila no kubita lubavu lo kulume hamba lo kucekulu, molihulika lizi lyo Muwaha Mulungu mu nyuma yenyu likutya, “Ayi yo nzila. Muyityatyaje yiyo.”

²² Nanye movisola vihwani vyenyu vyose vyono vihiliwe fweza, hamonga na vyono vihiliwe zahabu, muwe kuvitaga kutali, nha cinhu ca cikomaza, akuno mukuzoza mukutya, “Wuce ha meso gangu!”

²³ Nanye kolo mwahadika zimbeyu mu migunda yenyu, Muwaha Mulungu komutonyezezenyi mvula ho zicindice, no kumuletelenyi nhwanga mbaha muno. Ne mitugo zenyu zowa no wudimo winji muno.

²⁴ Nazo zing'ombe hamonga ne zindogowe zono zikumulimilenyi mu migunda yenyu, zowa kulya mahanze makavu maswanu muno.

²⁵ Na mwi'zuwa lyono golokumulwa magomawakali ge walugu wenyu, ne wanhu wawo wakuwulagwa, mwi'zuwa lilyo, vikolongo vye malenga vyolohuluma vikulawilila mucanyha ye matunda gose na mu vigongo vyose.

²⁶ Nawo mwezi wolong'alala nhe lizuwa. Nalyo lizuwa lyolong'alala wung'alale wuwaha muno kali mupunghati kuciza wung'alale walyo we vilo vyose, lyolotowelela wung'alale wa vilo mupunghati mwi'zuwa lilyo limonga. Na zizi zolokwijela mwizuwa lyono Muwaha Mulungu yeza kuwawopa bandeji wanhu wakwe, mu zinghomele zono yawapela, hamonga no kuwaponya.

Mulungu koyilipiciza yisi ya Ashuli

²⁷ Nalo lukumyo, hamonga ne vilungo vyo Muwaha Mulungu, vijelelaga kutali. Nawo moto hamonga ne lyosi, vilajilaga likuwo lyakwe. Mwene kalongaga, ne zinghani zakwe zikuwa kunyanya nho moto.

²⁸ Mwene kayilongozaga mbeho ku mwande yakwe, yiwa nhe lihwazi lye malenga, yiwa kuvikwanghwaniza vyose vyono yikwagana. Nayo yigafwagulizaga makungugo, yiwa kugongomeza, yiwa kugadumya ne mahweso gawo mabi.

²⁹ Ninga anye nyo wanhu wo Mulungu, molosangalala muno no kwimba nha vyono munozaga mu cilo ce sikukuu yono yelile. Kanyhi molosangalala nha wono wakujenda no mulilo we zifuluti, wakubita ku Nyumba yo Mulungu, u Muwaha Mulungu, u mudimi wa Isilayeli.

³⁰ No Muwaha Mulungu kolowanoza wanhu wose walihulice lizi lyakwe lye nhojo, waliwone ne likuwo lyakwe vyono linha. Na mwi'zuwa lilyo, kolowa lilambi lyo moto hamonga no mukukunzo we mvula ye mabwe.

³¹ Nawo Waashuli, wolokwinjilwa no woga wuwaha muno kolo wakulihulika lizi lyo Muwaha Mulungu no kuliwona likuwo lyakwe lyo kulipiciza.

³² Nayo Muwaha Mulungu lono yakuwatowa kali kenji, i wanhu wakwe wolowa wajendeleye no wutowa ng'oma ne masumbi. Hambi nha Mulungu du yali wene mono kolowahoma Waashuli.

³³ Ne likombo lyo moto muwaha, lyakondya kuwikanizwa ku wulawa katali, i hanhu hono kolotakamizizwa u mutemi wa Ashuli. Ne likombo lilyo yitali, kanyhi yigazi muno, nalyo limemile lilundo yiwaha lya ngwagu. Nayo Muwaha Mulungu kololyehelela, no mwehelo wakwe wolowa malambi ga moto, gono gololikoleleza moto likombo lilyo.